2032 ވަނަ އަހަރުގެ ޔޫރޯ ފުޓްބޯޅަ މުބާރާތް އިޓަލީ އަދި ތުރުކީގައި ބޭއްވުމަށް ޔޫރަޕުގެ ފުޓުބޯޅައިގެ މައި އިދާރާ (ޔުއެފާ) އިން ނިންމައިފި އެވެ.

ޔުއެފާ އިން މިގޮތަށް ނިންމީ އަންގާރަ ދުވަހު ނިއޯންގައި ކުރިއަށް ގެންދިޔަ 2028 އަދި 2032 ވަނަ އަހަރުގެ ޔޫރޯ ބާއްވާނެ ގައުމެއް ކަނޑައެޅުމަށް ބޭއްވި ރަސްމިއްޔާތުގައެވެ.

މިރަސްމިއްޔާތުގައި 2028 ވަނަ އަހަރުގެ ޔޫރޯ އަޔަލެންޑާއި އިނގިރޭސިވިލާތުގައި ބޭއްވުމަށް ނިންމާފައިވާއިރު، މިއީ އިޓަލީން ޔޫރޯ ފުޓުބޯޅަ މުބާރާތް ހޯސްޓު ކުރާނެ ހަތަރު ވަނަ ފަހަރެވެ. މީގެ ކުރިން 1968 އަދި 1980 ގައި އެ ޤައުމުގައި ޔޫރޯ މުބާރާތް ވަނީ ބާއްވައިފަ އެވެ. މީގެ އިތުރުން 2020 ވަނަ އަހަރުގެ މުބާރާތް، ކޯވިޑުގެ ސަބަބުން 2021 އަށް ފަސްކުރިއިރު، އިޓަލީން ވަނީ ބައެއް މެޗުތައް ހޯސްޓު ކޮށްފަ އެވެ. އަނެއްކޮޅުން މިއީ ތުރުކީން ޔޫރޯ ފުޓުބޯޅަ މުބާރާތް ހޯސްޓު ކުރާނެ ފުރަތަމަ ފަހަރެވެ.

އިޓަލީ އަދި ތުރުކީ އެކުވެގެން ހުށަހެޅި ބިޑުގައި ވަނީ މުބާރާތް ބޭއްވުމަށް 20 ސްޓޭޑިއަމެއް ހިމަނައިފަ އެވެ. ނަމަވެސް އޭގެ ތެރެއިން ފައިނަލް ކުރާނީ 10 ސްޓޭޑިއަމް އެވެ. 2026 ވަނަ އަހަރުގެ އޮކްޓޫބަރު މަހުގެ ތެރޭގައި އެ ސްޓޭޑިއަމްތައް ފައިނަލް ކުރާނީ ދެ ޤައުމަށް ހަމަހަމަ އުސޫލުން. ކޮންމެ ޤައުމަކަށް ފަސް ސްޓޭޑިއަމްގެ އުސޫލުންނެވެ.

ބިޑު ކާމިޔާބު ކުރުމަށްފަހު ދެ ޤައުމުން ވެސް ބުނެފައިވާ ގޮތުގައި، މިއީ ދެ ޤައުމު އެކުވެގެން ހާސިލްކުރެވުނު ވަރަށް މުހިންމު ކާމިޔާބެކެވެ. މިކަމުގެ ސަބަބުން އެ ދެ ޤައުމުގެ ދެމެދުގައި އިތުރަށް ގުޅުން ބަދަހިވެގެން ދާނެ ކަމަށާއި، ޚާއްސަކޮށް ތުރުކީގައި ފުޓުބޯޅަ ކުރިއެރުވުމަށް ގިނަ މަސައްކަތްތަކެއް ކުރެވޭނެ ކަމަށް ވެސް ބުނެފައިވެ އެވެ.

މީގެ އިތުރުން އިޓަލީ އާއި ތުރުކީން ވަނީ ކުރިއަށް އޮތް އަހަރުތަކުގެ ތެރޭގައި އެކުގައި މަސައްކަތްކޮށް، ފުރިހަމަ މުބާރާތެއް ބާއްވާނެ ކަމުގެ ޔަގީންކަން ވެސް ދީފަ އެވެ.