ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ބީގައި މިއަދު ހަވީރު ކުޅެވުނު ފުރަތަމަ މެޗުގައި 15-4 ގެ ތަފާތުބޮޑު ނަތީޖާއަކުން އެނބޫދޫ ވިލެޖް ބަލިކޮށް ގުރޫޕްގެ ދެވަނަ ޓީމުގެ ގޮތުގައި ހޮލިޑޭ އިން ކަނޑޫމާ އިން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

މިމެޗުގެ ފުރަތަމަ ހާފުގައި ގިނަ ލަނޑުތަކެއް ފެނިގެންދިޔަ އިރު ކަނޑޫމާ އިން މިހާފުގައި 9 ލަނޑު ކާމިޔާބުކުރި އިރު އެނބޫދޫ އިން ވެސް ވަނީ ދެ ލަނޑު ކާމިޔާބުކޮށްފައެވެ. މިހާފުގައި ކަނޑޫމާގެ އަހުމަދު ޝިފާއު ތިން ލަނޑު ކާމިޔާބުކޮށް ހެޓްރިކް ހެދި ހަދާފައެވެ. 

މީގެ އިތުރުން އެޓީމުގެ އިމްހާދު އަބްދުލް ގައްޔޫމް އާއި މުހައްމަދު މުސާފް އިބްރާހިމް މިއިން ކޮންމެ ކުޅުންތެރިއެއް ދެ ލަނޑު ކާމިޔާބުކުރި އިރު މުހައްމަދު ޝާއިފް ރަޝީދު ވަނީ އެއް ލަނޑު ކާމިޔާބުކޮށްފައެވެ. އަދި އެޓީމުގެ 9 ވަނަ ލަނޑަކީ އެނބޫދޫ ގެ އަބްދުﷲ ޒުހުރީގެ އަތުން ބައިކޮޅަށް ވަން ލަނޑެކެވެ.

މިހާފުގައި އެނބޫދޫ އިން ކަމިޔާބުކުރި ފުރަތަމަ ލަނޑު މެޗު ފެށިގެން 7 ވަނަ މިނެޓުގައި އަބްދުﷲ ނާސިހް ކާމިޔާބުކުރި އިރު، އެޓީމުގެ ދެވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އަބްދުﷲ ޒުހުރީއެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 9-2 ގެ ނަތީޖާއަކުން ކަނޑޫމާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ކަނޑޫމާ އިން އިތުރު ފަސް ލަނޑު ކާމިޔާބުކުރިއިރު އެނބޫދޫ އިން މިހާފުގައި ވެސް ވަނީ 2 ލަނޑު ކާމިޔާބުކޮށްފައެވެ. މިހާފުގައި ކަނޑޫމާގެ އަހުމަދު ޝަރީފް އާއި އިމްހާދު އަބްދުލް ގައްޔޫމް އަދި މުހައްމަދު ޝާއިފް ރަޝީދު މިއިން ކޮންމެ ކުޅުންތެރިއެއް ދެލަނޑު ކާމިޔާބުކޮށްފައެވެ. 

މިމެޗުގައި ކަނޑޫމާގެ އިމްހާދު އަބްދުލް ގައްޔޫމް ހަތަރު ލަނޑު ކަމިޔާބުކުރި އިރު، މުހައްމަދު ޝާއިފް ރަޝީދު ވެސް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ. 

ދެވަނަ ހާފުގައި އެނބޫދޫގެ ލަނޑުތައް ކާމިޔާބުކޮށްދިނީ އަލީ ޒިދާން އާއި އަބްދުﷲ ޒުހުރީއެވެ. މިއާއެކު މެޗުގެ ކުޅުން ނިމިގެންދިޔައީ 15-4 ގެ ނަތީޖާއަކުން ކަނޑޫމާ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވިފައިވަނީ ކަނޑޫމާގެ މުހައްމަދު މުސާފް އިބްރާހިމްއެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން 5 ޕޮއިންޓް ހަމަކޮށް ކަނޑޫމާ އިން ގްރޫޕް ސްޓޭޖްގެ މެޗްތައް ނިންމާލީ ގްރޫޕް ބީގެ ދެވަނައިގައެވެ. އަދި މިމެޗުން ބަލިވި މުބާރާތް ނިންމާލީ ކުޅުނު ތިން މެޗުން ވެސް ބަލިވެ ގްރޫޕްގެ ފުލުގައި އޮވެއެވެ.