ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ބީގައި މިއަދު ހަވީރު ކުޅެވުނު ދެވަނަ މެޗުގައި 2-1 ގެ ނަތީޖާއަކުން ތާޖް އެގްޒޯޓިކާ ރިސޯޓް އެންޑް ސްޕާ ބަލިކޮށް ގްރޫޕްގެ އެއްވަނަ ޓީމުގެ ގޮތުގައި ސަން ސިޔާމް އޮޅުވެލި މޯލްޑިވްސް މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އޮޅުވެލިން ނެވެ. މިލަނޑު ފުރަތަމަ ހާފުގެ 12 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ޒައިން އެވެ. މިއީ އެޓީމުގެ އަލީ ޝިޔާއު ތަނަވަސްކޮށްދިން ފުރުސަތެއްގައި ތާޖުގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

އޮޅުވެލިން މެޗުގެ ލީޑު ހޯދި ފަހު މިހާފުގައި އެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އޮޅުވެލި ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފުގެ ވަރަށް ކުރީކޮޅު ތާޖުގެ މުހައްމަދު އާސިފް އަށް ވަނީ މެޗުގެ ނަތީޖާ އެއްވަރުކުރުމަށް ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ. ދެވަނަ ހާފުގެ 23 ވަނަ މިނެޓުގައި އޮޅުވެލީގެ ޕެނަލްޓީ އޭރިއާ ބޭރުން ބޯޅަ ހޯދުމަށް ފަހު އޭނާ ފޮނުވާލި ހަމަލާ ގޯލާ އަމާޒުނުވެ ދަނޑިކައިރިން ބޭރަށް ދިޔައިރު، ޖެހިގެން އައި މިނެޓުގައި އޮޅުވެލިން ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އަބްދުﷲ ސިނާން އެވެ. 

މިއީ އެޓީމުގެ އަލީ ޝިޔާއު ފޮނުވާލީ ބާރު ހަމަލާއެއް ތާޖުގެ ކީއްޕަރު އަތުގައި ޖެހިފައި ނުކުތް ވަގުތު ޕޮއިންޓް އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ތާޖު އިން ނަތީޖާގެ ފަރަގު ކުޑަކުރި ލަނޑު ދެވަނަ ހާފުގެ 32 ވަނަ މިނެޓުގައި ކާމިޔާބުކޮށްދިނީ ޒީދާން އަލީ އެވެ. މިއީ އެޓީމުގެ މުހައްމަދު އާސިފް މުޅިން ހުސްކޮށްލާފައި ޖައްސާލި ބޯޅައެއް އޮޅުވެލީގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. 

މީގެ އިތުރުން ވެސް ދެވަނަ ހާފުގައި ތާޖު އިން ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމުން ފޮނުވާލި ގިނަ ހަމަލާތަކެއްގެ ހުރަހަކަށްވީ މިމެޗުގައި މޮޅު ކުޅުމެއް ދެއްކި އޮޅުވެލި މޯލްޑިވްސްގެ ގޯލްކީޕަރު އަހުމަދު ޝަރަފް އެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އޮޅުވެލި ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ވެސް އޮޅުވެލި މޯލްޑިވްސްގެ ގޯލްކީޕަރު އަހުމަދު ޝަރަފް އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން 7 ޕޮއިންޓް ހަމަކޮށް ގުރޫޕްގެ އެއްވަނަ ޓީމުގެ ގޮތުގައި އޮޅުވެލިން މުބާރާތުގެ ކުއާޓާ ފައިނަލުން ޖާގަ ހޯދި އިރު، މިމެޗުން ބަލިވި ތާޖް އިން މުބާރާތް ނިންމާލީ ކުޅުނު ތިން މެޗުން ލިބުނު ހަތަރު ޕޮއިންޓާއެކު ގުރޫޕްގެ ތިންވަނައިގައެވެ.