ވޯލްޑްކަޕް ކޮލިފައިންގ ޕްލޭއޮފް ފުރަތަމަ ލެގުގައި މިއަދު ހަވީރު ބަންގްލަދޭޝް އާއި ދެކޮޅަށް ދިވެހިރާއްޖޭ ކުޅުނު މެޗު 1-1 ގެ ނަތީޖާއަކުން ދެޓީމް އެއްވަރުވެއްޖެ އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. މިހާފުގައި ރާއްޖެ ޓީމުން އެންމެ ހުސް ފުރުސަތެއް ލިބުނީ ކެޕްޓަން އަލީ ފާސިރު އަށެވެ.

ބަންގްލަދޭޝްގެ ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި ފާސިރު ފޮނުވާލި ހަމަލާ ކީއްޕަރު ދިފާއުކުރި އިރު އެބޯޅަ ބޭރަށް ދިޔައީ ގޯލުގެ އަރިމަތީ ދަނޑީގައިޖެހިފައެވެ.

މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ރާއްޖެ ޓީމުން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް ދެޓީމަށް ވެސް ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ލިބި ބޭނުންނުކުރެވިފައެވެ. އަދި މިމެޗުގައި ރާއްޖެ ޓީމުން ލީޑު ހޯދި ލަނޑު ދެވަނަ ހާފުގެ 87 ވަނަ މިނެޓުގައި ކާމިޔާބުކޮށްދިނީ ދެވަަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ހަސަން ނަޒީމް އެވެ.

މިއީ ރާއްޖެ ޓީމުގެ އިބްރާހިމް މަހުދީ އަރިމަތިން ހުރަސްކޮށްދިން ބޯޅައެއް ދިފާއުކުރަން އުޅުމުގެތެރޭގައި ބަންގްލަދޭޝް ކުޅުންތެރިއެއްގެ ބޮލުގައި ޖެހިފައި ލިބުނު ބޯޅަ މުޅިން ހުސްކޮށް ހުރެ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ރާއްޖޭގެ ލަނޑަށްފަހު މެޗުގެ އިތުރު ވަގުތުގެ ތެރޭގައި ލީޑު ފުޅާކުރުމަށް ދިވެހި ޓީމުގެ ކެޕްޓަން އަލީ ފާސިރުއަށް ވަނީ ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ. އިބްރާހިމް މަހުދީ އަރިމަތިން ހުރަސްކޮށްދިން ބޯޅައެއް ބަންގްލަދޭޝްގެ ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ ފާސިރު ފޮނުވާލި ބޯޅަ ދިޔައީ ގޯލާއި އަމާޒުނުވެ މާދުރުން ބޭރަށެވެ.

މިމެޗުގައި ބަންގްލަދޭޝް އިން ނަތީޖާ އެއްވަރުކުރި ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ މެޗުގެ 90 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ސާދު އެވެ. މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. މިދެޓީމުގެ މެދުގައި ކުޅެވޭ ޕްލޭއޮފްގެ ދެވަަނަ ލެގު ބަންގްލަދޭޝްގައި މިމަހުގެ 17 ވަނަ ދުވަހުގެ ހަވީރު ކުޅުމަށް ހަމަޖެހިފައިވާނީ ރާއްޖެ ގަޑިން 16:30 ގައެވެ.

މިދެޓީމު އެންމެ ފަހުން ކުޅުނު މެޗު 3-1 ގެ ނަތީޖާއަކުން ބަންގްލަދޭޝް ކާމިޔާބުކޮށްފައިވާއިރު، މިއީ މިއަހަރުގެ ޖޫން މަހު ބޭއްވުނު ސާފްޗެމްޕިއަންޝިޕަށް ފަހު ދިވެހި ޓީމުން ކުޅުނު ފުރަތަމަ މެޗެވެ. އެމުބާރާތުގައި ދިވެހި ޓީމުން ނެރުނު ދަށް ނަތީޖާތަކުގެ ސަބަބުން އެފްއޭއެމް އަށް ބޮޑެތި ފާޑުކިއުންތަކެއް އަމާޒުވި ނަަމަވެސް މިމެޗަށް ތައްޔާރުވުމުގެ ގޮތުން ވެސް އެފްއޭއެމް އިން އެއްވެސް ކަމެއް ކޮއްފައި ނުވެއެވެ. ނަމަވެސް މިމެޗު ކުޅެމުންދިޔަ އިރު ގަލޮޅު ދަނޑުގައި އެފްއޭއެމްގެ ރައީސްއަށް ޝުކުރު އަދާކޮށް ބޭނާއެއް ދަމާފައި ހުއްޓެވެ.