ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ސީގެ ޕްލޭއޮފްގައި މިއަދު ހަވީރު 7-4 ގެ ނަތީޖާއަކުން ފިހަޅޮހި އައިލެންޑް ރިސޯޓް ބަލިކޮށް މުބާރާތުގެ ކުއާޓާ ފައިނަލުގެ ޖާގައެއް އޮޒެން ރިޒާވް ބޮލިފުށިން ކަށަވަރުކޮށްފި އެވެ.

މިދެޓީމު މުބާރާތުގެ ގުރޫޕް ސްޓޭޖުގައި ވާދަކުރި މެޗު ފަސޭހަކަމާއި އެކު 6-2 ގެ ނަތީޖާއަކުން ކާމިޔާބުކުރީ ބޮލިފުށިން ނެވެ. އަދި މިމެޗު ފެށިގެން ފުރަތަމަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު އާޒިމް އެވެ. ނަމަވެސް އޭގެ ހަ މިނެޓް ފަހުން މެޗުގެ 7 ވަނަ މިނެޓުގައި ފިހަޅޮހިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.

ފިހަޅޮހި އާއި ބޮލިފުށި ވާދަކުރި މެޗުގެ ތެރެއިިން 

މިލަނޑު އެޓީމަށް ކާމިޔާބުކޮށްދިނީ މުހައްމަދު އައުސަމް އެވެ. ނަމަވެސް ފުރަތަމަ ހާފު ނިމުމުގެ ކުރިން ބޮލިފުށިން ވަނީ ގާތްގާތުގައި ދެ ލަނޑު ކާމިޔާބުކޮށް މެޗުގެ ލީޑު ހޯދާފައެވެ. އެގޮތުން އެޓީމުގެ ދެވަނަ ލަނޑު ފުރަތަމަ ހާފުގެ 11 ވަނަ މިނެޓުގައި ކެޕްޓަން އިބްރާހިމް ސައީދު ކާމިޔާބުކުރި އިރު އޭގެ ދެމިނެޓު ފަހުން އެޓީމުގެ ތިންވަނަ ކާމިޔާބުކޮށްދިނީ ޒިދާން އަބްދުލް ގަނީ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-1 ގެ ނަތީޖާއަކުން ބޮލިފުށި ކުރީގައި އޮވެގެންނެވެ.

ފިހަޅޮހި އާއި ބޮލިފުށި ވާދަކުރި މެޗުގެ ތެރެއިިން 

މެޗުގެ ދެވަަނަ ހާފު ވެސް ވަރުގަދަކޮށް ފެށީ ބޮލިފުށިން ނެވެ. އަދި މިހާފުގައި އެޓީމުގެ އެޓޭކުތައް އިތުރަށް ވަރުގަދަކުރި އިރު، މިމެޗުގައި އެޓީމުން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 31 ވަނަ މިނެޓުގައި ކާމިޔާބުކޮށްދިނީ ކެޕްޓަން އިބްރާހިމް ސައީދު އެވެ. އަދި އޭގެ ދެ މިނެޓު ފަހުން އެޓީމުގެ ޒިދާން އަބްދުލް ގަނީ ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 5-1 އަށް ބަދަލުކޮށްފައެވެ.

ފިހަޅޮހި އާއި ބޮލިފުށި ވާދަކުރި މެޗުގެ ތެރެއިިން 

ނަމަވެސް މެޗުގެ ފަހު ވަގުތުކޮޅުގެ ތެރޭގައި ފިހަޅޮހިން ވަނީ ގާތްގާތުގައި ތިން ލަނޑު ކާމިޔާބުކޮށް ބޮލިފުށި ޕްރެޝަރަށް ވައްޓާލާފައެވެ. އެގޮތުން އެޓީމުގެ ދެވަނަ ލަނޑާއި ތިންވަނަ ލަނޑު ފަހުހާފުގެ 38 ވަނަ މިނެޓާއި 40 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން މުހައްމަދު ރަޒީން އެވެ. އަދި އެޓީމުގެ ހަތަރުވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ލައިޒާން މައުސޫމް އެވެ.

ބޮލިފުށީގެ ކެޕްޓަން އިބްރާހިމް ސައީދު 

ނަމަވެސް ޖެހިގެން އައި މިނެޓުގައި ބޮލިފުށީގެ ކެޕްޓަން އިބްރާހިމް ސައީދު ވަނީ ލަނޑެއް ކާމިޔާބުކޮށް މިމެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި މެޗު ނިމުމުގެ ކުރިން އެޓީމުގެ 7 ވަނަ ލަނޑު ކާމިޔާބުކޮށްދިނީ މުހައްމަދު އިރުފާން އެވެ. މިލަނޑާއެކު މެޗުގެ ކުޅުން ނިމިގެންދިޔައީ 7-4 ގެ ނަތީޖާއަކުން ބޮލިފުށި ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ބޮލިފުށީގެ ކެޕްޓަން އިބްރާހިމް ސައީދު އެވެ.

ފިހަޅޮހި ޓީމުގެ ކޯޗު އަލީ މުހައްމަދު ޓީމަށް އިރުޝާދު ދެނީ 

މިމެޗުގައި ފިހަޅޮހި ޓީމަށް އިތުރު މައްސަލަތަކެއް ކުރިމަތިވީ އެޓީމުގެ ތަޖުރިބާކާރު ކޯޗު އަލީ މުހައްމަދު ތަކުރާރުކޮށް ރެފްރީގެ ނިންމުންތަކާއި ހިތްހަމަ ނުޖެހުން ފާޅު ކުރުމުން މެޗުގެ ދެވަަނަ ހާފުގައި، މެޗުގެ ރެފްރީ އޭނާއަށް ދެވަަނަ ރީނދޫ ކާޑާއެކު ރަތްކާޑު ދައްކައި ދަނޑުން ފޮނުވާލުމުންނެވެ.

އަލީ މުހައްމަދު އަކީ ފިހަޅޮހި ޓީމާއެކު ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯންގެ ފައިނަލުގައި ޖެހިޖެހިގެން ހަތަރު އަހަރު ކުޅެ 2013, 2014, 2015 އަހަރު އެޓީމަށް ޗެމްޕިއަންކަން ހޯދައި ދީފައިވާ ތަޖުރިބާކާރު ކޯޗެކެވެ. އަދި އަލީ މުހައްމަދުގެ ކޯޗުކަމުގައި އެޓީމު ބަލިވީ 2016 ވަނަ އަހަރުގެ ފައިނަލުގައެވެ.