ޔުއެފާ ޔޫރޯ 2024 ކޮލިފައިންގ ގްރޫޕް އޭގައި ބުރާސްފަތި ދުވަހުގެ ރޭ އަމިއްލަ ދަނޑުގައި ސްކޮޓްލޭންޑާއި ދެކޮޅަށް ކުޅުނު މެޗު 2-0 ގެ ނަތީޖާއަކުން ސްޕެއިނުން ކާމިޔާބުކޮށްފިއެވެ. އަދި މިއީ ޔޫރޯ ކޮލިފައިންގައި އެޓީމު އަމިއްލަ ދަނޑުގައި ޖެހިޖެހިގެން މޮޅުވި 25 ވަނަ މެޗެވެ.

މިއަހަރުގެ މާޗް މަހުގެ ފަހުކޮޅު ސްކޮޓްލޭންޑްގައި މިދެޓީމު ވާދަކުރި މެޗު 2-0 ގެ ނަތީޖާއަކުން ސްޕެއިން ބަލިވެފައިވާއިރު، ގުރޫޕްގެ އެއްވަނަ ހޯދުމަށް މިމެޗުން މޮޅުވުން އެޓީމަށް އޮތީ މަޖުބޫރުވެފަ އެވެ.

މެޗު ފެށިގެން ދެވަނަ މިނެޓުގައި ސްޕެއިނުގެ ބާސާ ފޯވާޑް ފެރާން ޓޮރޭސް އަށް މެޗުގެ ލީޑު ނެގުމަށް ވަރަށް ހުސް ފުރުސަތެއް ލިބި ބޭނުން ނުކުރެވި ދިޔައިރު، މިހާފުގައި ސްކޮޓްލޭންޑްގެ ފަރާތުން ފެނިގެންދިޔައީ ވަރަށް ޑިފެންސިވް ކުޅުމެކެވެ.

މުޅި ޓީމު ފަހަތަށް ފައިބައިގެން ޑިފެންސް ކުރަމުންދިޔައިރު މިހާފުގައި އެޓީމަށް ސްޕެއިންގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ސްޕެއިނުން އެޓީމުގެ އެޓޭކުތައް އިތުރަށް ވަރުގަދަކުރި އިރު މިހާފުގައި ވެސް އެންމެ ފުރަތަަމަ ނުރައްކާތެރި ހަމަލާއެއް ފެނިގެންދިޔައީ ސްޕެއިނުގެ ފަރާތުންނެވެ.

އެޓީމުގެ އެތްލެޓިކޯ މެޑްރިޑް ފޯވާޑް އަލްވާރޯ މޮރާޓާ އަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ ގޯލާއި އަމާޒުނުވެ ދަނޑިކައިރިން ބޭރަށް ދިޔައިރު، ދެވަަނަ ހާފުގެ 60 ވަނަ މިނެޓުގައި ސްކޮޓްލޭންޑުން ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ ލަނޑުޖެހުމުގެ ކުރިން އެޓީމުގެ ކުޅުންތެރިއަކު ފައުލުކޮށްފައިވާތީ އެއީ ރަނގަޅު ލަނޑެއް ނޫންކަމަށެވެ.

މިމެޗުގައި ސްޕެއިނުން ކަމިޔާބުކުރި ފުރަތަމަ ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ އަލްވާރޯ މޮރާޓާ އެވެ. މިއީ އެޓީމުގެ ޖީސަސް ނަވާސް  އަރިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި ސްޕެއިނުން ކަމިޔާބުކުރި ދެވަނަ ލަނޑު މެޗު ނިމެން ހަތަރު މިނެޓަށް ވެފައި ވަނިކޮށް ކާމިޔާބުކޮށްދިނީ އޮއިހާން ސަންސެޓް އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ފަސް މެޗުން ލިބުނު 12 ޕޮއިންޓާއެކު ސްޕެއިން މިވަގުތު އޮތީ ގްރޫޕްގެ ދެވަނައިގައެވެ. އަދި މިމެޗުން ބަލިވި ސްކޮޓްލޭންޑް އިތުރަށް އެއް މެޗު ކުޅެގެން ލިބުނު 15 ޕޮއިންޓާއެކު މިވަގުތު އޮތީ ގްރޫޕްގެ އެއްވަނައިގައެވެ.

ޔޫރޯ ކޮލިފައިންގައި ރޭ ކުޅެވުނު އިތުރު މެޗުތަކުގެ ނަތީޖާތަކަށް ބަލާއިރު، ހާލަންޑްގެ ދެލަނޑާއެކު 4-0 ގެ ނަތީޖާއަކުން ނޯވޭ އިން ވަނީ ސައިޕްރަސް ބަލިކޮށްފައެވެ. ކްރޮއޭޝިޔާ 1-0 ގެ ނަތީޖާއަކުން ތުރުކީ އަތުން ބަލިވިއިރު، ޕޮލެންޑް ވަނީ 2-0 ގެ ނަތީޖާއަކުން ފެރޯ އައިލެންޑް ބަލިކޮށްފައެވެ.