ވޯލްޑްކަޕް ކޮލިފައިންގ 2024 ގެ ސައުތު އެމެރިކާ ސަރަހައްދުގައި ރޭ ފަތިހު އަމިއްލަ ދަނޑުގައި 1-0 ގެ ނަތީޖާއަކުން ޕެރަގުއޭ އަތުން އާޖެންޓީނާ މޮޅުވެއްޖެ އެވެ.

ރޭގެ މެޗަކީ އާޖެންޓީނާގެ ކޯޗުކަމުގެ މަގާމާއި ލިއޮނަލް ސްކޮލޯނީ ހަވާލުވިފަހުން އެޓީމު ކުޅުނު 50 ވަނަ މެޗެވެ. އަދި އޭގެ ތެރެއިން އެޓީމު ބަލިވެފައިވަނީ އެންމެ މެޗަކުންނެވެ. އެޓީމު ބަލިވެފައިވަނީ މިދިޔަ އަހަރުގެ ފަހުކޮޅު ގަތަރުގައި ބޭއްވުނު ފީފާ ވޯލްޑް ކަޕް ފުޓްބޯޅަ މުބާރާތުގެ ގުރޫޕް ސްޓޭޖު ފުރަތަމަ މެޗުގައި 2-1 ގެ ނަތީޖާއަކުން ސައުދީ އަރަބިއާ އަތުންނެވެ.

ރޭގެ މެޗު ފެށިގެން ތިންވަނަ މިނެޓުގައި އާޖެންޓީނާ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު ނިކޮލަސް އޮޓަމެންޑީ އެވެ. މިއީ އެޓީމަށް ލިބުނު ކޯނަރެއްގައި ރޮޑްރިގޯ ޑި ޕޯލް ހުރަސްކޮށްދިން ބޯޅައެއް މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

އާޖެންޓީނާގެ ލަނޑަށްފަހު މިހާފުގައި އެޓީމުން ވަނީ މެޗު ކޮންޓްރޯލްކޮށްގެން ކުޅެ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އޭގެ ތެރެއިން ފުރުސަތެއްގައި ފުރަތަމަ ހާފުގެ 43 ވަނަ މިނެޓުގައި ޕެރަގުއޭގެ ޕެނަލްޓީ އޭރިއާ ބޭރުން އެޓީމުގެ މިޑްފިލްޑަރު ރޮޑްރިގޯ ޑި ޕޯލް ފޮނުވާލި ބާރު ހަމަލާއެއް އަމާޒުވީ ގޯލްގެ އަރިމަތީ ދަނޑިއަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބަދަލު ކުޅުންތެރިއެއްގެ ގޮތުގައި އާޖެންޓީނާގެ ކެޕްޓަން ލިއޮނަލް މެސީ ކުޅެން ނުކުތްއިރު، ދެވަަނަ ހާފުގެ 76 ވަނަ މިނެޓުގައި އެޓީމަށް ލިބުނު ކޯނަރެއްގައި މެސީ ގޯލު ކުރިމައްޗަށް ހުރަސްކޮށްދިން ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މީގެ އިތުރުން މެޗުގެ އިތުރު ވަގުތުގެ ތެރޭގައި އެޓީމަށް ލިބުނު ހިލޭ ޖެހުމަކުން މެސީ ފޮނުވާލި ބާރު ހަމަލާގެ ހުރަހަކަށް ވީ ވެސް ގޯލުގެ އަރިމަތީ ދަނޑިއެވެ. މިއާއެކު ދެވަަނަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކޮލިފައިންގައި ކުޅުނު ތިން މެޗުން ވެސް މޮޅުވެ 10 ޓީމު ހިމެނޭ މި ސަރަޙައްދުގެ ރޭންކިންގެ އެއްވަނައިގައި 9 ޕޮއިންޓާއެކު މިވަގުތު އޮތީ އާޖެންޓީނާ އެވެ. އަދި މިމެޗުން ބަލިވި ޕެރަގުއޭ ތިން މެޗުން ލިބުނު އެއް ޕޮއިންޓާއެކު މިވަގުތު އޮތީ 8 ވަނައިގައެވެ.