ވޯލްޑްކަޕް ކޮލިފައިންގ ސައުތު އެމެރިކާ ސަރަހައްދުގައި ރޭ ފަތިހު އަމިއްލަ ދަނޑުގައި ވެނަޒުއޭލާ އާއި ދެކޮޅަށް ބްރެޒިލް ކުޅުނު މެޗު އެއްވަރުވެއްޖެ އެވެ. މިމެޗު ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ. 

ވޯލްޑްކަޕް ކޮލިފައިންގައި ބްރެޒިލް އިން އަމިއްލަ ދަނޑުގައި އެންމެ ފަހުން ކުޅުނު 15 މެޗުން މޮޅުވެފައިވާ އިރު، މިނަތީޖާއާއެކު އެޓީމުގެ މޮޅުވުނުގެ ސިލްސިލާ ވަނީ ނިމުމަކަށް އައިސްފަ އެވެ.

ރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ބްރެޒިލް އިން މެޗު ޑޮމިނޭޓުކުރި ނަމަވެސް، މި ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ބްރެޒިލް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ ފެށިގެން ފަސްވަނަ މިނެޓްގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

މިލަނޑު އެޓީމަށް ކާމިޔާބުކޮށްދިނީ އާސެނަލްގެ ޑިފެންޑަރު ގެބްރިއަލް އެވެ. މިއީ އެޓީމަށް ލިބުނު ކޯނަރެއްގައި އަލް ހިލާލްގެ ފޯވާޑް ނޭމާ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި ދެވަަނަ ހާފުގެ 72 ވަނަ މިނެޓުގައި ބްރެޒިލްގެ ރެއާލް މެޑްރިޑް ފޯވާޑް ވިނީޝިއަސް ޖޫނިއަރ ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

ވެނެޒުއޭލާ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 85 ވަނަ މިނެޓުގައި ކާމިޔާބުކޮށްދިނީ ފޯވާޑް އެޑުއާޑް ބެލޯ އެވެ. މިއީ އެޓީމުގެ ޖެފްރިސަން ސަވަރީނޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ހިތްގައިމު ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. އަދި މިމެޗުން ލިބުނު އެއް ޕޮއިންޓާއެކު ކުޅުނު ތިން މެޗުން 7 ޕޮއިންޓް ހަމަކޮށް ބްރެޒިލް މިވަގުތު އޮތީ މިސަރަހައްދުގެ ދެވަނައިގައެވެ. އަދި ވެނަޒުއޭލާ އަށް ތިން މެޗުން ލިބުނު ހަތަރު ޕޮއިންޓާއެކު އެޓީމު މިވަގުތު އޮތީ 10 ޓީމު ހިމެނޭ މިސަރަހައްދުގެ ހަ ވަނައިގައެވެ.