ޔުއެފާ ޔޫރޯ 2024 ކޮލިފައިންގ ގްރޫޕް ބީގައި މިރޭ ރަށުން ބޭރުގައި ނެދަލޭންޑްސް 2-1 ގެ ނަތީޖާއަކުން ބަލިކޮށް ބާކީ ދެ މެޗު އޮއްވައި ފުރާންސް ޔޫރޯ24 އަށް ކޮލިފައިވެއްޖެ އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ފްރާންސް އިންނެވެ. މިލަނޑު ފުރަތަމަ ހާފުގެ 7 ވަނަ މިނެޓުގައި ކާމިޔާބުކޮށްދިނީ ޕީއެސްޖީގެ ފޯވާޑް ކިލިއަން އެމްބާޕޭ އެވެ. މިއީ އެޓީމުގެ މާސޭ ޑިފެންޑަރު ޖޮނަތަން ކްލައުސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. 

ފްރާންސްގެ ލަނޑަށްފަހު ނެދަލޭންޑްސް އިން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމުގެ މިޑްފިލްޑަރު ވީރުމަން އާއި ޒަވީ ސިމޯންސްގެ އިތުރުން ޑިފެންޑަރު ހާޓްމަން އަށް ލިބުނު ހުސް ފުރުސަތުގައި ބޭނުންނުކުރެވި، ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފު ވެސް ވަރުގަދަކޮށް ފެށީ ފްރާންސް އިންނެވެ. އެގޮތުން ދެވަނަ ހާފުގެ 53 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް ލީޑު ފުޅާކޮށްފައެވެ. މިލަނޑު ވެސް އެޓީމަށް ކާމިޔާބުކޮށްދިނީ އެމްބާޕޭ އެވެ. މިއީ ޔޫރޯ ކޮލިފައިންގައި ގައުމީ ޓީމަށް ކުޅުނު 6 މެޗުގައި އެމްބާޕޭ ކާމިޔާބުކުރި 6 ވަނަ ލަނޑެވެ. އަދި މިއީ ފުރާންސްގެ ގައުމީ ޓީމަށް މިހާތަނަށް ކުޅުނު 72 މެޗުގައި އެމްބާޕޭ ކާމިޔާބުކުރި 42 ވަނަ ލަނޑެވެ.

ނެދަލޭންޑްސް އިން ނަތީޖާގެ ފަރަގު ކުޑަކުރި ލަނޑު މެޗުގެ 83 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ހާޓްމަން އެވެ. މިއީ އެޓީމުގެ ފޯވާޑް ސްޓީވަން ބާގްވިން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު 6 މެޗުން މޮޅުވެ ގްރޫޕް ބީގެ އެއްވަނައިގައި މިވަގުތު އޮތީ ފްރާންސް އެވެ. އަދި މިމެޗުން ބަލިވި ނެދަލޭންޑްސް ކޮލިފައިންގައި ކުޅުނު ފަސް މެޗުން ލިބުނު 9 ޕޮއިންޓާއެކު އެޓީމު މިވަގުތު އޮތީ މިގުރޫޕްގެ ތިންވަނައިގައެވެ.