ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ކުއާޓާ ފައިނަލުގެ ތިންވަނަ މެޗުގައި މިއަދުގެ ހަވީރު އަނަންތަރާ ދިގު މޯލްޑިވްސް އާއި އެސްޓޯރިއާ މޯލްޑިވްސް އިތާފުށި ވާދަކުރި މެޗު 2-2 ގެ ނަތީޖާއަކުން އެއްވަރުވެ، ނަތީއްޖާނެރުމަށް ޖެހި ޕެނަލްޓީގައި 6-7 ގެ ނަތީޖާއަކުން މޮޅު އަނަންތަރާ އިން މުބާރާތުގެ ސެމީ ފައިނަލުން ޖާގަ ހޯދައިފި އެވެ.

އިތާފުށި ކުއާޓާ ފައިނަލުން ޖާގަ ހޯދީ ގްރޫޕް ޑީގެ ޕްލޭއޮފްގައި 3-1 ގެ ނަތީޖާއަކުން ސައި ލެގޫން ބަލިކުރުމަށްފަހު އެވެ. އަދި އަނަންތަރާ ކުއާޓާ ފައިނަލުން ޖާގަ ހޯދީ ގުރޫޕް ސީގެ އެއްވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އަނަންތަރާ އިންނެވެ. މިލަނޑު ފުރަތަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން އަހުމަދު ހުމައިދު އެވެ. ނަމަވެސް އޭގެ ދެމިނެޓު ފަހުން އިތާފުށިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.

މިލަނޑު އެޓީމަށް ކާމިޔާބުކޮށްދިނީ ކެޕްޓަން އަބްދުﷲ ރަބާހް އެވެ. މިއީ އަނަންތަރާގެ ޕެނަލްޓީ އޭރިއާ ތެެރެއިން ލިބުނު ހުސް ފުރުސަތުގައި މުޅިން ހުސްކޮށް ހުރެ ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި ފުރަތަމަ ހާފުގެ އެންމެ ފަހު މިނެޓްގައި އެޓީމުގެ އަބްދުﷲ ރިމާހް އަށް ވަނީ މެޗުގެ ލީޑު ނެގުމަށް ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ.

އަނަންތަރާގެ ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ ރިމާހް ފޮނުވާލި ހަމަލާ އެޓީމުގެ ގޯލްކީޕަރު އިބްރާހިމް ހާމިދު ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މިމެޗުގައި ދެވަަނަ ފަހަރަށް ވެސް ކުރިހޯދީ އަނަންތަރާ އިންނެވެ. މިލަނޑު ދެވަނަ ހާފުގެ 30 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ކެޕްޓަން އަހުމަދު ހުމައިދު އެވެ.

މިއީ އިތާފުށީގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ހިތްގައިމު ލަނޑެކެވެ. މިލަނޑާއެކު 2-1 ގެ ނަތީޖާއަކުން އަނަންތަރާ ކުރީގައި އޮވެގެން މެޗު ނިމެން ދަނިކޮށް، ދެވަަނަ ހާފުގެ އިތުރު ވަގުތުގެ ތެރޭގައި އިތާފުށިން ވަނީ ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ނަތީޖާ އެއްވަރުކޮށްފައެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން އަބްދުﷲ ރަބާހް އެވެ. މިލަނޑާއެކު މެޗުގެ ފުރިހަމަ ވަގުތު ހަމަވިއިރު ދެ ޓީމު އޮތީ 2-2 ގެ ނަތީޖާއަކުން އެއްވަރުވެފައެވެ. މިއާއެކު މެޗުގެ ނަތީޖާ ނެރުމަށްޓަކައި ޖެހި ޕެނަލްޓީގައި 6-7 ގެ ނަތީޖާއަކުން ކުރިހޯދީ އަނަންތަރާ އެވެ.

އަނަންތަރާގެ އަހުމަދު ސުޖާއު އަލީ، އަބޫބަކުރު އިބްރާހިމް ، އަހުމަދު ހުމައިދު، ޝަހުދީ ޔޫސުފްގެ އިތުރުން އަބްދުﷲ ވިޝާލް ކުރިއަށް ފޮނުވާލި ޕެނަލްޓީ އެޓީމުން ކާމިޔާބުކުރި އިރު، އިތާފުށީގެ މޫސާ ހުމެއިދު، އަބްދުﷲ ރަބާހް، އިބްރާހިމް ރަފާހްގެ އިތުރުން އަބްދުﷲ ރިމާހު ކުރިއަށް ފޮނުވާލި ޕެނަލްޓީ އެޓީމުން ކާމިޔާބުކުރި ނަމަވެސް އެޓީމުގެ އަހުމަދު ސާދިން ޖެހި ޕެނަލްޓީ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ. މިއާއެކު 7-6 ގެ ނަތީޖާއަކުން މޮޅުވެ އަނަންތަރާ އިން ވަނީ މުބާރާތުގެ ސެމީ ފައިނަލުން ޖާގަ ހޯދާފައެވެ.

މިމެޗުގެ މޭން އޮފް ދަ މެޗަކަށް ހޮވުނީ އަނަންތަރާގެ ކެޕްޓަން އަހުމަދު ހުމައިދު އެވެ.