ގާނޫނަށް ގެންނަންޖެހޭ ބަދަލުތައް ގެނެސްގެން ޖުޑީޝަލް ސާވިސް ކޮމިޝަން (ޖޭއެސްސީ) ސިޔާސީ ނުފޫޒުން އެއްކިބާ ކުރައްވާނެ ކަމަށް އިންތިޚާބީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ޑރ. މުޢިއްޒުގެ ކެންޕެއިންގެ ތެރެއިން އެންމެ ގަދައަށް އެމަނިކުފާނު ދެއްކެވި އެއް ވާހަކަ އަކީ ޝަރުޢީ ދާއިރާ އިސްލާހު ކުރުމުގެ ވާހަކައެވެ. އެވާހަކަ އާއި ގުޅުވައި، ޝަރުއީ ދާއިރާ މިނިވަން ކުރުމަށް ގެންނަވާނީ ކޮން އިސްލާހުތަކެއްތޯ، ބޭރުގެ ނޫހެއް ކަމަށްވާ އަލް ޖަޒީރާ އިން ކުރި ސުވާލަކަށް ޖަވާބު ދެއްވަމުން މުއިއްޒު ވިދާޅުވީ އެކަމަށްޓަކައި ޖޭއެސްސީ އިސްލާހު ކުރުމަކީ މުހިންމު ކަމެއް ކަމަށެވެ.

މުޢިއްޒު ވިދާޅުވީމޖ ގޮތުގައި ޖުޑީޝަރީ މިނިވަންނުވުމުގެ އެންމެ ބޮޑު އެއް ސަބަބެއްކަމަށް ޑރ.މުޢިއްޒު ވިދާޅުވީ ޖޭއެސްސީ އެކުލެވިފައި އޮތް ގޮތުން ޖުޑީޝަރީއަށް ސިޔާސީ ނުފޫޒު ފޯރުމެވެ.

އަދި އެމަނިކުފާނުގެ ވެރިކަމެއްގައި ޖުޑީޝަރީއަކީ މިނިވަންކަމާއެކު މަސައްކަތްކުރާ އަދުލުވެރި ބާރަކަށް ހެއްދެވުމަށް ފުރަތަމަ ދުވަހުން ފެށިގެން މަސައްކަތްކުރައްވާނެ ކަމުގައިވެސް ޑރ.މުޢިއްޒު ވިދާޅުވިއެވެ.

މުއިއްޒު ވިދާޅުވީ ޖޭއެސްސީގައި ސިޔާސީ އެއްވެސް ބޭފުޅަކަށް ވެސް އަދި ދައުލަތުގެ މަގާމެއްގައި ހުރި ބޭފުޅަކަށް ވެސް ހުރެވިގެން ނުވާނެ ކަމަށާ، އެތަނުގައި ތިބެންޖެހޭނީ، ޝަރުއީދާއިރަގެ ތަޖުރިބާހުރި އެ ދާއިރާއިން ކިޔަވައިގެން ތިބި މީހުން ކަމަށެވެ. އަދި އެމަނިކުފާނު ޖޭއެސްސީ އެކުލަވާލާނީ އެފަދައިން ކަމަަށް ވިދާޅުވި އެވެ. އެގޮތުން، ރިޓަޔާޑް ފަނޑިޔާރުން ފަދަ ބޭފުޅުން ޖޭއެސްސީގައި ތިއްބަވާ ގޮތަށް ކޮމިޝަނުގެ އެކުލެވުން ބަދަލުކުރުމަކީ އެންމެ ރަނގަޅު ގޮތް ކަމަށް އެމަނިކުފާނު ދެކެލައްވާ ކަަމަށް ވިދާޅުވި އެވެ.