‎އެސްޓީއޯ މަކިޓަރ ޖޫނިރ ޗެމްޕިއަންޝިޕް ކުޅުދުއްފުށި ސިޓީގައި މިއަދު ހެނދުނު ފަށާފައިވާއިރު، ހޮނިހިރު ދުވަހުގެ ރޭ ބޭއްވުމަށް ހަމަޖެހިފައި އޮތް މުބާރާތް ފެށުމުގެ ރަސްމިއްޔާތު މޫސުން ގޯސްވުމާއި ގުޅިގެން ވަނީ މިރެއަށް ފަސްކޮށްފައެވެ.

ނަމަވެސް މުބާރާތުގެ އިވެންޓުތައް ފެށުމުގެ ކުރިން މިއަދު ވަނީ ދިދަ ނެގުމުގެ ރަސްމިއްޔާތާއި، މުބާރާތުގެ ލަވަ ލޯންޗުކޮށްފައެވެ. މުބާރާތުގެ ލަވަ ހުށަހަޅައިދިނީ ރާއްޖޭގެ މަޝްހޫރު ލަވަ ކިޔުންތެރިޔަ ޝަލަބީ އާއި އަޝްރާއެވެ.

މުބާރާތް ފެށުމަށްޓަކައި ބޭއްވި މި އިވެންޓުގައި ކުޅުދުއްފުށި ސިޓީގެ މޭޔަރާއި، ކައުންސިލަރުންނާއި، އެތްލެޓިކްސް އެސޯސިއޭޝަންގެ އިސްވެރިން ބައިވެރިވެފައިވެއެވެ.

Advertisement

މިރަސްމިއްޔާުގައި ވާހަކަ ދައްކަވަމުން ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވީ ކޮންމެ ކަމެއްވެސް ކާމިޔާބުކުރުމަށް، އެކުރާކަމެއް ލޯބިން ކަމަށް ކަމޭހިތައިގެން ކުރުމަކީ ވަރަށް މުހިންމު ކަމެއް ކަމުގައެވެ. މީގެ އިތުރުން އެމަނިކުފާނުގެ ވާހަކަފުޅުގައި މުބާރާތް ކުރިއަށްދާއިރުގަވެސް އަދި ކޮންމެ ކަމެއްގައި ހަރަކާތްތެރިވިއަސް ރިވެތި އަހުލާގައި ތިބުމަށް އެތްލީތުންނަށް ވަނީ ހަނދާކޮއްދީފައެވެ.

ކުޅުދުއްފުށި ސިޓީގައި ބާއްވާ މިމުބާރާތުގައި 35 ސްކޫލަކުން ވާދަ ކުރެއެވެ. މުބާރާތުގައި 1124 އެތުލީޓުން ވާދަ ކުރެއެވެ. މުބާރާތުގައި ވާދަކުރަނީ 505 އަންހެން އެތުލީޓުންނާއި، 619 ފިރިހެން އެތުލީޓުންނެވެ.

މުބާރާތް ފެށުމުގެ ރަސްމިއްޔާތު މިރޭ 20:15 ގައި ކުޅުދުއްފުށި ސިޓީ ސްޓޭޑިއަމްގައި އޮންނާނެއެވެ. މިމުބާރާތް ކުރިއަށް ދާނީ މިމަހުގެ 15 އިން 20ގެ ނިޔަލަށެވެ. މުބާރާތް ނިންމުމަށްވެސް ޚާއްސަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ.