ޔޫއެފާ ޔޫރޯ24 ކޮލިފައިންގ ގްރޫޕް އޭގައި މިރޭ އަމިއްލަ ދަނޑުގައި 1-0 ގެ ނަތީޖާއަކުން ސްޕެއިން އަތުން ބަލިވެ، މުބާރާތަށް ކޮލިފައިވުމުގެ ފުރުސަތު ނޯވޭއަށް ގެއްލިއްޖެ އެވެ.

މިދެޓީމު އެންމެ ފަހުން ކުޅުނު މެޗު ފަސޭހަކަމާއި އެކު 3-0 ގެ ނަތީޖާއަކުން ސްޕެއިން ކާމިޔާބުކޮށްފައިވާއިރު، މިމެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރީ ސްޕެއިނުންނެވެ. އަދި މިހާފުގައި އެޓީމުން ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ތަނަވަސްކޮށްފައެވެ.

އެގޮތުން ފުރަތަމަ ހާފުގެ 20 ވަނަ މިނެޓުގައި އެޓީމުގެ އަލްވާރޯ މޮރާޓާ ލަނޑެއް ކާމިޔާބު ކުރި ނަމަވެސް، ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ ސްޕެއިނުންނެވެ. އެގޮތުން ދެވަނަ ހާފު ފެށިގެން ހަތަރުވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ބާސެލޯނާގެ ޒުވާން މިޑްފީލްޑަރު ގަވީ އެވެ.

ސްޕެއިންގެ ލަނޑަށްފަހު ނޯވޭ އިން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މިހާފުގައި އެޓީމުން އެންމެ ހުސް ފުރުސަތެއް ލިބުނީ މެންޗެސްޓާ ސިޓީގެ ފޯވާޑް އެރްލިންގް ހާލަންޑް އަށެވެ. މެޗު ނިމެން ހަ މިނެޓަށް ވެފައި ވަނިކޮށް ސްޕެއިނުގެ ޕެނަލްޓީ އޭރިއާ ތެެރެއިން ހާލަންޑަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ ސްޕެއިންގެ ގޯލްކީޕަރު އުނައި ސިމޯން ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ހަ މެޗުން 15 ޕޮއިންޓް ހަމަކޮށް ގުރޫޕް އޭގެ އެއްވަނައިގައި މިވަގުތު އޮތީ ސްޕެއިން އެވެ. އަދި މިގުރޫޕްގެ ދެވަނައިގައި އޮތް ސްކޮޓްލޭންޑަށް ވެސް ހަ މެޗުން 15 ޕޮއިންޓް ލިބިފައިވާއިރު މި ދެޓީމު ވެސް ވަނީ މުބާރާތަށް ކޮލިފައިވެފައެވެ.

މިމެޗުން ބަލިވި ނޯވޭ ކުޅުނު 7 މެޗުން ލިބުނު 10 ޕޮއިންޓާއެކު ބާކީ އެއްމެޗު އޮއްވައި އެޓީމަށް ވަނީ ކޮލިފައިންގެ ދޮރު ބަންދުވެފައެވެ. މިއާއެކު މިއަހަރުގެ ބެލެންޑޯ އެވޯޑަށް ވާދަކުރަމުން އަންނަ ހާލަންޑްގެ އިތުރުން ޕްރެމިއާ ލީގުގައި މޮޅު ކުޅުމެއް ދައްކަމުން އަންނަ އާސެނަލްގެ ކެޕްޓަން މާޓިން އޮޑެގާޑް ވެސް، އަންނަ އަހަރު ޖަރުމަނުގައި އޮންނަ ޔޫރަޕުގެ އެންމެ ޝަރަފްވެރި މުބާރާތުން ނުފެންނާނެއެވެ.