ޔުއެފާ ޔޫރޯ24 ކޮލިފައިންގ ގްރޫޕް އީގައި މިރޭ ރަށުން ބޭރުގައި 1-1 ގޭ ނަތީޖާއަކުން ޕޮލެންޑާއި އެއްވަރުކޮށް މޯލްޑޯވާ އިން މުބާރާތަށް ކޮލިފައިވުމުގެ އުންމީދު ދަމަހައްޓައިފި އެވެ.

އަނިޔާގެ ސަބަބުން ކެޕްޓަން ލެވަންޑޯވްސްކީ އާއި ނުލައި ޕޮލެންޑުން މިމެޗު ފެށިއިރު، ފުރަތަމަ ހާފުގައި އެޓީމުން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމަށް ލިބުނު ފުރުސަތުތަކުގެ ބޭނުން ނުކުރެވި ދިޔައިރު، ފުރަތަމަ ހާފުގެ 26 ވަނަ މިނެޓުގައި މޯލްޑޯވާ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

މިލަނޑު އެޓީމަށް ކާމިޔާބުކޮށްދިނީ ފޯވާޑް އަޔަން ނިކޮލެސްކޫ އެވެ. މިއީ އެޓީމަށް ލިބުނު ކޯނަރެއްގައި މިޑްފީލްޑަރު ވަޑިމް ރަޓާ ގޯލު ކުރިމައްޗަށް ހުރަސްކޮށްދިން ބޯޅައެއް މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މޯލްޑޯވާ ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފުގައި ޕޮލެންޑުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 53 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް ކަރޯލް ސްވިޑާސްކީ އެވެ. މިއީ އެޓީމުގެ މިޑްފިލްޑަރު ޕިއޮޓްރް ޒިއެލިންސްކީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެއިތުރުންވެސް މިހާފުގައި ޕޮލެންޑުން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. އަދި މިދެޓީމު މިދިޔަ ޖޫން މަހު ވާދަކުރި މެޗު 3-2 ގެ ނަތީޖާއަކުން ކާމިޔާބުކޮށް މޯލްޑޯވާ އިން ވަނީ އެގައުމުގެ ތާރީޚްގައި ފުރަތަމަ ފަހަރަށް ޕޮލެންޑްގެ މައްޗަށް ކުރި ހޯދާފައެވެ.

މިމެޗުން ލިބުނު އެއް ޕޮއިންޓާއެކު ހަ މެޗު ކުޅެގެން މޯލްޑޯވާ އަށްް 9 ޕޮއިންޓަ ލިބިފައިވާއިރު، އެޓީމު މިވަގުތު އޮތީ ގްރޫޕްގެ ހަތަރުވަނައިގައެވެ. އަދި މިމެޗުން ލިބުނު އެއް ޕޮއިންޓާއެކު 7 މެޗު ކުޅެގެން ޕޮލެންޑަށް 10 ޕޮއިންޓް ލިބިފައިވާއިރު އެޓީމު މިވަގުތު އޮތީ ގްރޫޕްގެ ތިންވަނައިގައެވެ. މިގުރޫޕްގެ އެއްވަނައިގައި ހަ މެޗުން 13 ޕޮއިންޓާއެކު އަލްބޭނިއާ އޮތްއިރު ދެވަނައިގައި އޮތީ 6 މެޗުން 11 ޕޮއިންޓް ހޯދާފައިވާ ޗެކް ރިޕަބްލިކް އެވެ.