ޔުއެފާ ޔޫރޯ ކޮލިފައިންގ ގުރޫޕް ޑީގައި މިރޭ ރަށުން ބޭރުގައި 2-1 ގެ ނަތީޖާއަކުން ވޭލްސް އަތުން ބަލިވެ، ކްރޮއޭޝިޔާ އަށް ކޮލިފައިންގެ ފުރުސަތު ހަނިވެއްޖެ އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކްރޮއޭޝިޔާ އިން ކުޅުނު ނަމަވެސް މިހާފުގައި އެޓީމުގެ ކުރިއަށް ކުޅޭ ކުޅުންތެރިންނަށް ވޭލްސްގެ ގޯލްކީޕަރު ހާސްކޮއްލެވޭ ވަރުގެ ހަމަލާއެއް ފޮނުވާލެވިފައެއް ނުވެއެވެ.

މިހާފުގައި ލަނޑުޖަހާނެ އެންމެ ހުސް ފުރުސަތެއް ލިބުނީ ވޭލްސް އަށެވެ. ކްރޮއޭޝިޔާގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި އެޓީމުގެ ހެރީ ވިލްސަން ފޮނުވާލި ބާރު ހަމަލާ ކްރޮއޭޝިޔާގެ ގޯލްކީޕަރު ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަނަ ހާފު ކްރޮއޭޝިޔާ އިން ފެށީ ތިން ބަދަލަކާއެކުގައެވެ. ނަމަވެސް މިހާފު ފެށިގެން ދެވަނަ މިނެޓުގައި ވޭލްސް އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ފްލަމްގެ މިޑްފީލްޑަރު ހެރީ ވިލްސަން އެވެ. މިއީ އެޓީމުގެ ބޯންމައުތުގެ މިޑްފީލްޑަރު ޑޭވިޑް ބްރޫކްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ވޭލްސް އިން އެޓީމުގެ ލީޑު ފުޅާކުރި ލަނޑު ދެވަނަ ހާފުގެ 60 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ވިލްސަން އެވެ. މިއީ އެޓީމުގެ ލީޑްސްގެ މިޑްފީލްޑަރު ޑެނިއަލް ޖޭމްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ކްރޮއޭޝިޔާ އިން ނަތީޖާގެ ފަރަގު ކުޑަކުރި ލަނޑު މެޗުގެ 75 ވަނަ މިނެޓުގައި ކާމިޔާބުކޮށްދިނީ އެޓީމުގެ އެޓްލާންޓާގެ މިޑްފީލްޑަރު މާރިއޯ ޕަސަލިކް އެވެ. މިއީ އެޓީމުގެ ތަޖުރިބާކާރު މިޑްފިލްޑަރު ލޫކާ މޮޑްރިޗް ނަގައިދިން ކޯނަރެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ވޭލްސް ކުރީގައި އޮވެގެންނެވެ. އަދި މިމެޗުން ލިބުނު ތިން ޕޮއިންޓާއެކު ކުޅުނު ހަ މެޗުން 10 ޕޮއިންޓް ހަމަކޮށް ވޭލްސް އިން ވަނީ ކްރޮއޭޝިޔާ ފަހަތަށް ޖައްސާލުމަށްފަހު ގްރޫޕްގެ ދެވަނައަށް ކުރިއަށް ޖެހިލާފައެވެ. ކްރޮއޭޝިޔާ އަށް ވެސް ހަ މެޗުން 10 ޕޮއިންޓް ލިބިފައިވީ ނަމަވެސް ވޭލްސްއަށް ކުރި ލިބެނީ ދެޓީމުގެ ކުރިމަތިލުންތަކުގެ ތިލަފަތް އެޓީމުކޮޅަށް ބުރަވާތީއެވެ.