ސަރުކާރު ކުންފުނިތަކުގެ ތެރެއިން އެންމެ ބޮޑަށް ދަރާފައިވާ ކުންފުނި ކަމަށްވާ ފެނަކައިން، ވެރިކަން ބަދަލުވާން އެއްް މަސްދުވަހަށް ވެފައި ވަނިކޮށް ކުންފުނި ހިންގުމާއި ގުޅޭ ބޮޑެތި ބަދަލު ތަކެއް ގެންނަމުންދާ ކަމަށް މައުލޫމާތު ލިބިއްޖެއެވެ. 

"ވޮއިސް" އަށް މައުލޫމާތު ލިބިފައިވާ ގޮތުގައި ފެނަކައިން މިހާރު މަސައްކަތް ކުރަމުންދަނީ އެ ކުންފުނިން ކަރަންޓުގެ ޚިދުމަތްދޭ 153 ރަށުގައި ހުރި ތެޔޮ ތާނގިތައް އައުކުރަން ބޭނުންވާ ސާމާނު ގެނައުމަށް ކުންފުންޏަކާ ހަވާލުކުރުމުގެ މަސައްކަތް ކުރަމުންނެވެ.

ޑީސަލް ތާންގީ އައު ކުރުމަށް ނިންމާފައިވާ ބައެއް ރަށްތައް

އަދި އެކަން ކުރުމަށްޓަކައި، އެކަމާއި ގުޅޭ ހުއްދަތައް ހޯދަން ބޭނުންވާ ޑިޕާޓްމަންޓް ތަކުގެ ހެޑުން ޗުއްޓީ ނަގައި އެ ޑިޕާޓްމަންޓްތައް އެހެން ފަރާތްތަކާއި ވެސް ވަނީ މިހާރު ހަވާލުކޮށްފައެވެ. އެގޮތުން އެ ކުންފުނީގެ 4 ޑިޕާޓުމެންޓެއްގެ ވެރިންވަނީ މި މަހުގެ 15 ވަނަ ދުވަހުން ފެށިގެން 19 ވަނަ ދުވަހަށް ޗުއްޓީއެއް ނަގާފައެވެ. 

މައުލޫމާތު ލިބިފައިވާ ގޮތުގައި އަވަސް އަރުވާލައިގެން މި މަސައްކަތް ކުރުމަށް ޕްރެޝަރު ކުރައްވަމުން ދަނީ އެ ކުންފުނީގެ ސީއެސްއޯގެ މަޤާމަށް ޕްރޮމޯޓުކޮށްފައިވާ ޒާހިރު އުސްމާނާއި، އެ ކުންފުނީގެ މެނޭޖިން ޑިރެކްޓާ އަޙްމަދު ސަޢީދެވެ. އަދި ޑީސަލް ޓޭންކުތައް އައުކުރުމަށް ބޭނުންވާ ސާމާނުތައް ގަންނަން މަސައްކަތްކުރަނީ އެމްޑީ ސައީދުއާ ގުޅުން އޮންނަ ކުންފުންޏެއް މެދުވެރިކޮށް އެތައް ގުނައެއް އަގުބޮޑުކޮށް ކަމަށްވެސް މައުލޫމާތު ލިބެއެވެ. 

މި ފަސް އަހަރު ތެރޭގައި ސަރުކާރު ކުންފުނިތަކުން އެންމެ ގިނަ ކޮރަޕްޝަންގެ މައްސަލަތައް އޭސީސީއަށް ހުށަހެޅިފައިވަނީ ފެނަކައިގެއެވެ. އަދި އެ ކުންފުނި ސަޕްލަޔަރުންނަށް ބިލިއަނުން ދަރާފައިވާއިރު، އެ ފައިސާ ނުލިބިގެން ދޭތެރެއިން އެ ފަރާތްތަކުން އަންނަނީ މުޒާހަރާ ވެސް ކޮށް އަޑު އުފުލަމުންނެވެ. އެތަނުން ބައެއް ކުންފުނިތައް އޮތީ ބަނގުރޫޓު ވުމުގެ މަގުމަތީގައެވެ.