މި ސަރުކާރުން ތައާރަފްކޮށް އެމްޓީސީސީން ފޯރުކޮށްދެމުން އަންނަ އާރުޓީއެލް ފެރީ އާއި އަތޮޅު ތެރޭގެ ބަހުގެ ޚިދުމަތަށް ބީއެމްއެލް ކާޑުން ފައިސާ ދެއްކޭ ގޮތަށް ހަަމަޖައްސައިފިއެވެ.

މި ހިދުމަތް ތައާރަފްކުރުމުގެ ގޮތުން މިއަދު މާފަންނު ވިލިމާލޭ ފެރީ ޓާމިނަލްގައި ބޭއްވި ރަސްމިޔާތެއްފގައި މި ޚިދުމަތް ތައާރަފްކޮށްދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މިއީ އާރުޓީއެލް ބަހުން އަދި ފެރީން ދަތުރުކުރާ ގިނަ ރައްޔިތުން ވަރަށް ބޭނުންވެފައިވާ ޚިދުމަތެއް ކަމަށެވެ.

އެގޮތުން ވިލިމާލެ، ތިލަފުށި، ގުޅީފަޅު އަދި ހުޅުމާލޭގެ ފެރީތަކުގެ އިތުރުން އައްޑޫ ސިޓީ، ކުޅުދުއްފުށި ސިޓީ، ހއ. ދިއްދޫ، ލ. ގަން، ލ. ފޮނަދޫ، ލ. އިސްދޫ/ކަލައިދޫ އަދި ފުވައްމުލަށް ސިޓީގެ ބަސްތަކަށް ވިސާ ނުވަތަ މާސްޓާ ކާޑް ބޭނުންކޮށްގެން ޓިކެޓަށް ފައިސާދެއްކޭނެ އިންތިޒާމު ހަމަޖެހިފައިވާނެ ކަމުގައި އާޒިމް ވަނީ ވިދާޅުވެފައެވެ. 

މީގެ ކުރިން އެ ކުންފުނިން ވަނީ މާލޭގައި ހިދުމަތްދޭ ހުރިހާ ބަހެއްގައި ބީއެމްއެލް ކާޑުން ފައިސާ ދެއްކޭ ގޮތް ހަދައިފައެވެ.

ވިސާ ކާޑު އަދި މާސްޓާ ކާޑުގެ އިތުރުން އާރްޓީއެލް ޓްރެވަލް އެޕް މެދުވެރިކޮށް ވެސް ފެރީ ޓިކެޓް ނެގޭނެ ކަމަށާއި އަދި އާރްޓީއެލް އެޕަށް އިތުރުކުރި އައު ފީޗާތަކާއެކު ފެރީ ޓިކެޓުގެ ތާރީހު ބަދަލުކޮށްލައި، ރީފަންޑް ހޯދަން ކަސްޓަމަރުންނަށް ފަސޭހަވެގެން ދާނެ ކަމަށް އެ ކުންފުނިން މައުލޫމާތުދެއެވެ.

އޭގެ އިތުރުން އެމްޓީސީސީން ބުނިގޮތުގައި ކިއުއާރް ކޯޑް ސްކޭން ކޮށްގެން ޓިކެޓް ބޭނުންކުރެވޭ ފީޗާއެއް ވެސް އާރްޓީއެލް އެޕަށް އިތުކޮށްފައިވާނެއެވެ. އަދި އެޕް އަޕްޑޭޓް ކޮށްލުމާއެކު ހުރިހާ ކަސްޓަމަރުންނަށް ވެސް އައު ފީޗާތައް ތަޖުރިބާކޮށްލެވޭނެއެވެ.

އާރުޓީއެލް ހިދުމަތް 65 އަހަރުން މަތީގެ މީހުންނަށާއި، ތިން އަހަރުން ދަށުގެ ކުޑަކުދިންނަށް އައިޑީކާޑު ދެއްކެވުމުން ހިލޭ ލިބޭނެއެވެ. އަދި ހާއްސަ އެހީއަށް ބޭނުންވާ ފަރާތްތަކުން އެންސްޕާއިން ދީފައިވާ ކާޑު ދެއްކެވުމުންވެސް ހިލޭ ދަތުރު ކުރެވޭނެއެވެ. އޭގެއިތުރުން، ޔުނީފޯމްގައި ތިބޭ ސްކޫލް ކުދިންނާއި ކޮލެޖް/ ޔުނިވާސިޓީގައި ކިޔަވާ ދަރިވަރުންނަށް ސްޓޫޑެންޓް ކާޑު ދެއްކެވުމުން ހިލޭ ދަތުރު ކުރެވޭނެއެވެ.