އދ.ދަނގެތިން ކުޑަ އިންޖީނު ދޯންޏެއްގައި މަހަށް ނިކުމެ އުޅެނިކޮށް ގެއްލުނު އދ.ދަނގެތީ، ނޫލައިޓް، އުމުރުން 68 އަހަރުގެ ޔޫސުފް އިބްރާހިމް (ޔޫސުންބެ)، ހޯދުމުގެ މަސައްކަތުގައި އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަން އަދިވެސް ހަރަކާތްތެރިވަމުންދާ ކަމަށް އެ އިދާރާއިން ބުނެފިއެވެ.

އެމްއެންޑީއެފްއިން ބުނީ، އެމީހާ ހޯދުމުގެ މަސައްކަތުގައި އޮކްޓޯބަރު 15 ވަނަ ދުވަހު ޑައިވްކޮށްގެންނާއި، އޭރިއަލް ސަރޗް، އަދި ސަރފޭސް ސަރޗްތަކެއް ވެސް ކުރިއަށްގެންފޮސްފައިވާ ކަމަށެވެ. އަދި ޑައިވްކޮށްގެން 78،850 ސްކޮޔަރ މީޓަރުގެ ސަރަހައްދެއް ބަލާފައިވާއިރު، މި ޑައިވްތަކުގައި އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންގެ ޑައިވަރުންނާއެކު އދ.ދަނގެތިން ވެސް ޑައިވަރުންތަކެއް ބައިވެރިވެފައިވާ ކަމަށް އެ އިދާރާއިން ބުނެއެވެ.

މީގެ އިތުރުން، ވައިގެ މަގުން އެމްއެންޑީއެފް ޑޯނިއަރ އެއަރކްރާފްޓުގައި 156.87 ސްކޮޔަރ ނޯޓިކަލް މޭލުގެ ސަރަހައްދެއް ބަލާފައިވާއިރު، ކަނޑުމަގުން އެމްއެންޑީއެފް ކޯސްޓްގާޑުގެ ފާސްޓް އިންޓަރސެޕްޓަރ ކްރާފްޓް "ހަކުރާ" ވަނީ 4.11 ސްކޮޔަރ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް އެމްއެންޑީއެފްއިން މައުލޫމާތު ދެއެވެ. 

މީގެ އިތުރުން އެމްއެންޑީއެފްއިން ބުނީ، ގެއްލުނު މީހާ ހޯދުމުގެ މަސައްކަތުގައި އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންއަށް ލިލީ ބީޗް ރިޒޯޓް އެންޑް ސްޕާއާއި، ވިލަމެންދޫ އައިލެންޑް ރިޒޯޓް އެންޑް ސްޕާއާއި، ނޯވާ މޯލްޑިވްސްއާއި، އަމާޔާ ރިޒޯޓް ކުޑަ ރަށް މޯލްޑިވްސްއާއި، އދ.ދަނގެތީގެ އާންމުންގެ ފަރާތުން އެހީތެރިކަން ލިބެމުންދާ ކަމަށެވެ. 

ދަނގެތިން "ވޮއިސް" އަށް މައުލޫމާތު ދިން ފަރާތެއް ބުނެފައިވާ ގޮތުގައި ޔޫސުންބެ ހޮނިހިރު ދުވަހު މަހަށް ނުކުމެ އުޅުނު ދޯނި ފެނިފައިވަނީ ވެލިނަގަން ގޮސްއުޅުނު ބަޔަކަށެވެ. އަދި އެމީހުންނަށް ދޯނި ފެނުނު އިރު ދޯނީގައި އެއްވެސް މީހަކު ނެތް ކަމަށާ، އަދި ދޯންޏަށް އަރައި ބެލި ބެލުމުން އޭގައި ހުރިހާ އެއްޗެއް ހުރިކަމަށް ވެސް ބުންޏެވެ. 

މީގެ އިތުރުން ޔޫސުންބެ ގެއްލެން މެދުވެރިވި ވަކި ސަބަބެއް ނޭނގުނު ނަމަވެސް، އޭނާ އަކީ ދޯނި ދުއްވަން ހުއްޓައިވެސް، ނިދި ޖެހިގެން މޫދަށް ވެއްޓި، ނޫނީ ދޯނި ފަރަށް އެރުން ފަދަ ކަންކަން މީގެ ކުރިންވެސް ދިމާވެފައިވާ މީހެއް ކަން އެރަށު މީހުން ފާހަގަކޮށްފައިވެއެވެ. އެހެންކަމުން ކަނޑަށް ވެއްޓެން މެދުވެރިވި ސަބަބަކީ ނިދުން ކަމުގައި ވުންވެސް އެކަށީގެންވާ ކަމަށް އެރަށު މީހުން މައުލޫމާތު ދެއެވެ.