ޒަޔަނިސްޓް ޔަހޫދީ އިސްރާއީލު ސިފައިންނާއި ފަލަސްތީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސް ޖަމާއަތާ ދެމެދު މިހާރު ހިނގަމުންދާ ހަނގުރާމައިގައި ހާލުގައި ޖެހެމުންދާ ފަލަސްތީނުގެ އާއްމު ރައްޔިތުންނަށް އިންސާނީ އެހީ ފޯރުކޮށްދޭން އދ އިން ދެކޮޅު ހަދައިފިއެވެ. 

ރޭ އދ.ގެ ސަލާމަތީ މަޖިލީހުގައި ބޭއްވި ބައްދަލުވުމުގައި އިސްރާއީލާއި ހަމާސްއާ ދެމެެދު ހިނގަމުންދާ ހަނގުރާމަ ވަގުތުން މެދުކަނޑާލާ ޣައްޒާއަށް އިންސާނީ އެހީ ފޯރުކޮށްދިނުމަށް ރަޝީއާއިން ވަނީ ހުށަހަޅާފައެވެ. 

ރަޝިޔާއިން ހުށަހެޅި އެ ގަރާރަށް ތާއިދު ކޮށް ޗައިނާ، ޔޫއޭއީ، ގަބޯން އާއި މޮޒަމްބިކިއު އިން ވޯޓު ދީފައިވާއިރު, ޣައްޒާ ރައްޔިތުންނަށް އެހީ ފޯރުކޮށްދިނުމާއި ދެކޮޅަށް އެމެރިކާ، އިނގިރޭސިވިލާތް، ފްރާންސް އަދި ޖަޕާނުން ވަނީ ވޯޓު ދީފައެވެ. 

Advertisement

އެމެރިކާ، އިނގިރޭސިވިލާތް އަދި ފްރާންސްއަކީ ވީޓޯ ކުރުމުގެ ބާރު އޮންނަ ތިން ގައުމު ކަމަށް ވުމާއެކު އެ ގައުމުތަކުން ފަލަސްތީނަށް އެހީ ފޯރުކޮށްދޭން ދެކޮޅު ހެދުމާއިއެކު އެ ގަރާރު ވަނީ ފާސްވާގޮތް ނުވެފައެވެ. 

ރަޝިޔާގެ ގަރާރާއި އެމެރިކާއިން ދެކޮޅު ހެދީ ހަމާސްގެ ހަމަލާތައް ކުށްވެރިކޮށްފައި ނުވާތީ ކަމަށް ބުނެއެވެ.

ރަޝިއާއިން ފަލަސްތީނާއި އެއްކޮޅަށް ހުށަހެޅި މި ގަރާރު ފާސް ވެފައި ނުވާއިރު، ބްރެޒިލްއިން ފަލަސްތީނާއި ދެކޮޅަށް، ހަމާސްގެ މުޖާހިދުން ކުރަމުންދާ ޖިހާދު ކުށްވެރިކޮށް އދ.ގެ ސަލާމަތީ މަޖީލީހަށް ވަނީ ގަރާރެއް ހުށަހަޅާފައެވެ. ނަމަވެސް ރަޝީޔާއިން ވަނީ މި ގަރާރު ދެކޮޅުކަން ހާމަކޮށްފައެވެ. އަދި ރަޝިޔާ އަކީ ވީޓޯ ކުރުމުގެ ބާރު އޮންނަ ގައުމަކަށް ވާއިރު, އެ ގަރާރުގެ ވޯޓުގައި ރަޝީއާއިން ދެކޮޅު ހަދައިފި ނަމަ، އެ ގަރާރު ފާހެއް ނުވާނެއެވެ. 

ރަޝިޔާއިން މިހާރު ވަނީ އެ ގަރާރާއި އެ ގައުމުން ދެކޮޅު ކަމަށް ބުނެފައެވެ. ރަޝިޔާއިން ދެކޮޅު ހަދައިފިނަމަ ވީޓޯ ކުރުމުގެ ބާރު ލިބޭ ގައުމަަކަށް ވުމުން ގަރާރު ފާހެއް ނުވާނެއެވެ.

ފަލަސްޠީނުގެ ރައްޔިތުންނަށް އިޒްރާއިލުން ދެމުންދާ ހަމަލާތަކުގެ ސަބަބުން 3000 އެއްހާ މުސްލިމުން ޝަހީދު ވެފައިވާ އިރު އޭގެ ތެރެއިން 64 ޕަސެންޓް ޚިއްސާ ކުރަނީ ކުޑަކުދިންނާއި އަންހެނުން ކަމަށް ފަލަސްޠީނުގެ ދައުލަތުގެ މީޑިއާއި އިން ވަނީ ބުނެފައެވެ.