ވޯލްޑްކަޕާއި ކޮލިފިކޭޝަންގެ ޕްލޭއޮފްގައި މިއަދު ހަވީރު ބަންގްލަދޭޝް އާއި ދިވެހިރާއްޖެ ވާދަކުރި މެޗު 2-1 ގެ ނަތީޖާއަކުން ބަންގްލަދޭޝް އިން ކާމިޔާބުކޮށްފި އެވެ.

މެޗުގެ ފުރަތަަމަ ހާފުގައި ރާއްޖެގެ ޓީމުން ވަރުގަދަކޮށް ފެށި ނަމަވެސް މިމެޗުގައި ފުރަތަަމަ ލަނޑުޖަހައި ކުރިހޯދީ ބަންގްލަދޭޝް އިންނެވެ. މިލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ ހުސެއިން ރާކިބް އެވެ. މިއީ އެޓީމުގެ ފާހިމް އަރިމަތިން ހުރަސްކޮށްދިން ބޯޅައެއް ރާއްޖޭގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ބަންގްލަދޭޝްގެ ލީޑު ފުޅާކުރުމަށް ރާކިބްއަށް ވަނީ ވަރަށް ހުސް ދެ ފުރުސަތު ލިބި ބޭނުން ނުކުރެވިފައެވެ.

Advertisement

ރާއްޖެއިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 36 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު އިބްރާހިމް އައިސަމް އެވެ. ރާއްޖެ ޓީމަށް ލިބުނު ކޯނަރެއްގައި ހަމްޒާ ހުރަސްކޮށްދިން ބޯޅައެއް ބަންގްލަދޭޝްގެ ޕެނަލްޓީ އޭރިއާ މެދެންހާ ހިސާބުހުރެ ބޮލުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ފެށިގެން ފުރަތަމަ މިނެޓުގައި ބަންގްލަދޭޝް އިން ވަނީ ލަނޑެއް ކާމިޔާބުކޮށް ދެވަނަ ފަހަރަށް މި މެޗުގައި ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ފާހިމް އެވެ. މިއީ އެޓީމުގެ މުހައްމަދު ސުހައިލް ރާނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ނަމަވެސް އޭގެ 13 މިނެޓު ފަހުން ދިވެހިޓީމުގެ ކުޅުންތެރިޔަކަށް ކުރި ނުރައްކާތެރި ފައުލަކާ ގުޅިގެން ރެފްރީ ވަނީ މުހައްމަދު ސުހައިލް ރާނާ އަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

ބަންގްލަދޭޝް އިން އެއްކުޅުތެރިއަކު މަދުކޮށް ކުޅެމުންދިޔަ އިރު ވެސް އެޓީމުގެ އެޓޭކުތައް ފެނުނީ ދިވެހި ޓީމަށްވުރެ ވަރުގަދަކޮށެވެ. ނަތީޖާއެއްގެ ގޮތުން މެޗުގެ އިތުރު ވަގުތުގެ ތެރޭގައި އެޓީމުން އުފެއްދި ކައުންޓާ އެޓޭކެއް ހުއްޓުވަން އުޅުމުގެ ތެރޭގައި ދިވެހިޓީމުގެ ޒުވާން ޑިފެންޑަރު އަހުނަފް ރަޝީދު ކުރި ކުށަކާއި ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ.

މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ބަންގްލަދޭޝް ކުރީގައި އޮވެގެންނެވެ.