ސައުދީ ޕްރޮފެޝަނަލް ލީގުގެ އަލް ހިލާލްގެ ފޯވާޑް ނޭމާ ޖޫނިއާގެ ކަކުލަށް އަނިޔާވެ ކުޅުމާއި ދުރުގައި ގިނަ ދުވަސްތަކެއް ވަންދެން ހުންނަން ޖެހިއްޖެއެވެ.

އުމުރުން 31 އަހަރުގެ ފޯވާޑަށް އަނިޔާވީ މިދިޔަ އަންގާރަ ދުވަހު ފީފާ ވޯލްޑް ކަޕް ކޮލިފައިންގައި އުރުގުއޭ އަތުން 2-0 ގެ ނަތީޖާއަކުން ބްރެޒިލް ބަލިވި މެޗުގަ އެވެ. އެމެޗުގެ ފުރަތަމަ ހާފުގެ އިތުރު ވަގުތުގެ ތެރޭގައި ނޭމާއަށް އަނިޔާވީ އުރުގުއޭގެ ކުޅުންތެރިއަކު ކުރި ފައުލެއްގެ ސަބަބުން އޭނާ ވެއްޓުނު ވަގުތު ފައިއެޅުނު ގޮތަކުން ކަމަށް ބެލެވެ އެވެ. މިއާއެކު ފުރަތަމަ ހާފު ނިމުމުގެ ކުރިން ނޭމާ ވަނީ ބަދަލުކޮށްފަ އެވެ.

މެޗަށް ފަހު ހެދި ސްކޭންތައް ދައްކާގޮތުން އޭނާގެ ވައަތު ފައިގެ ކަކުލުގެ އޭސީއެލްގެ އިތުރުން މެނިސްކަސް އަށް ވެސް ވަނީ ގެއްލުންތަކެއް ލިބިފަ އެވެ. އަދި އޭނާ އަށް ލިބިފައިވާ އަނިޔާ ސީރިއަސްކަމަށް ފެންނާތީ ވީހާވެސް އަވަހަށް ސާޖަރީ ހެދުމަށް ކުޅުންތެރިޔާ އަންނަނީ ތައްޔާރު ވަމުންނެވެ.

ނޭމާއަށް ލިބިފައިވާ އަނިޔާގެ ސަބަބުން އެންމެ ބޮޑު ގެއްލުމެއްވާނެ ކަމަށް ބެލެވެނީ ދާދި ފަހުން އޭނާ ގުޅުނު ސައުދީގެ ކުލަބު އަލް ހިލާލް އަށެވެ. ސައުދީ ލީގަށް ގެނައި އެންމެ އަގުބޮޑު ކުޅުންތެރިޔާ އެކުލަބާއި ގުޅުނު އިރު ވެސް ހުރީ އަނިޔާގައެވެ.

މިސީޒަނުގައި މިހާތަނަށް ނޭމާ، އަލް ހިލާލްގެ ޖާޒީގައި ފަސް މެޗު ކުޅެފައިވާއިރު ކާމިޔާބުކުރެވިފައި ވަނީ އެންމެ ލަނޑެކެވެ. އަދި މިއަނިޔާ އާއެކު މިސީޒަނުގެ ބާކީ ބައިގައި ނޭމާ ދަނޑުމަތިން ފެނިދާނެ ކަމަކަށް ނުބެލެވެއެވެ. މީގެ އިތުރުން ޖޫން މަހު އެމެރިކާގައި ބާއްވާ ކޮޕަ އެމެރިކާ ފުޓްބޯޅަ މުބާރާތުގައި ވެސް ނޭމާ ފެނުމުގެ ފުރުސަތު ވަރަށް ކުޑަ އެވެ. ނަމަވެސް މުބާރާތަށް ގިނަ ދުވަސްތަކެއް އޮތުމުން ސާޖަރީއަށް ފަހު ނޭމާ ފިޓުވެވެދާނެ ކަމަށް ބެލެވެ އެވެ.

ބާސެލޯނާ އާއި ޕީއެސްޖީގެ ކުރީގެ ފޯވާޑް ނޭމާ އަކީ އަނިޔާގެ މައްސަލަ ބޮޑު ކުޅުންތެރިއެކެވެ. އޭނާ ކުރިން ކުޅުނު ދެ ކުލަބުގައިވެސް އަނިޔާގެ މައްސަލަތަކުގެ ސަބަބުން ސީޒަންގެ ގިނަ މެޗުތަކެއް ގެއްލިފައި ވެއެވެ. ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި 222 މިލިއަން ޔޫރޯގެ ޓްރާންސްފާ ފީއެއްގައި ޕީއެސްޖީ ބަދަލުވުމަށް ފަހުން އެ ކުލަބުގައި ހޭދަކުރި ހަ ސީޒަނުގައި އަނިޔާގެ ސަބަބުން ނޭމާއަށް 100 އަށް ވުރެ ގިނަ މެޗު ގެއްލިފައިވެއެވެ.

މި ފަހަރު ނޭމާ އަށް މި ލިބުނު އަނިޔާ އަކީ އޭނާގެ ކަކުލަށް ލިބުނު އެންމެ ސީރިއަސް އަނިޔާ އެވެ. މީގެ ކުރިން އޭނާގެ ފައިގެ ކުޑަ ހުޅަށް ގިނަ އަނިޔާތަކެއް ލިބިފައިވާއިރު، ފައިތިލައިގެ ކަށިގަނޑުވެސް ދެ ފަހަރެއްގެ މަތިން ބިންދައިގެން ދިޔަ އެވެ.

މީގެ އިތުރުން 2014 ވަނަ އަހަރުގެ ވޯލްޑްކަޕް ކުއާޓާ ފައިނަލުގައި ކޮލަމްބިއާ އާއި ދެކޮޅަށް ކުޅުނު މެޗުގައި ނޭމާގެ ބުރަކަށްޓަށް ލިބުނު އަނިޔާއަކާއި ގުޅިގެން މުބާރާތުގެ ސެމީފައިނަލްގައި ނުކުޅެވުނު އިރު، އެޗުން ބްރެޒިލް ވަނީ 7-1 ގެ ތަފާތުބޮޑު ނަތީޖާއަކުން އަމިއްލަ ސަޕޯޓަރުންގެ ކުރިމަތީގައި ޖަރުމަނު އަތުން ބަލިވެފައެވެ.