އަންނަ އަހަރު ބޭއްވުމަށް ހަމަޖެހިފައިވާ ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިހާބުގައި އެ އިދާރާގެ ރައީސް ކަމުގެ މަގާމަށް ކުރިމަތިލައްވާނެކަން، ކުރީގެ އެއް ނަންބަރު ފޯވާޑް އަދި މިހާރު ރައްޔިތުން މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) އިއުލާންކުރައްވައިފި އެވެ.

ޓޮމްގެ ސޯޝަލް މީޑިއާ ޕޯސްޓެއްގައި ލިޔެފައި ވަނީ “ފުޓްބޯޅަ އެސޯސިއޭޝަންގެ ކުރިއަށް އޮތް އިންތިހާބުގައި އަޅުގަނޑު ވާދަކުރަން ނިންމައިފިން. ފުޓްބޯޅަ ވެއްޓިފައިވާ އަނދަވަޅުން ސަލާމަތް ކުރުމުގައި ކްލަބުތަކާއި ފުޓްބޯޅަ ކޮމިއުނިޓީގެ އެހީތެރިކަން ދެއްވުން އެދެން” ޓޮމްގެ ޕޯސްޓުގައިވެ އެވެ.

ޓޮމް ވަނީ 2016 ވަނަ އަހަރު ކުރު މުއްދަތެއްގައި އެފްއޭއެމްގެ ރައީސްކަން ކުރައްވާފަ އެވެ. ހަތަރު މަސްދުވަހުގެ އެ މުއްދަތުގައި ޓޮމް އަށް އެ މަގާމް ގެއްލުނީ އޭރުގެ ޖެނެރަލް ސެކްރެޓަރީ އަދި މިހާރު އެފްއޭއެމްގެ ރައީސް ބައްސާމް އަދީލް ޖަލީލް މަގާމުން ވަކިކުރުމުގައި އުސޫލާ ހިލާފްވެގެންނެވެ. އެ މައްސަލައިގައި އޭރު އެފްއޭއެމްގެ އެކްސްކޯގައި ތިބި ފަސް މެމްބަރަކު އިސްތިއުފާދެއްވީ އެވެ.

އެ އަހަރު ބޭއްވި އެފްއޭއެމްގެ އިންތިހާބުގައި ބައްސާމާ ވާދަކުރައްވައި ޓޮމް އަށް ނާކާމިޔާބުވި އެވެ. އެފަހަރު އިންތިހާބު ކާމިޔާބުކުރައްވައި ބައްސާމް މިހާރު އަންނަނީ އޭނާގެ ދެ ވަނަ ދައުރު ފުރިހަމަކުރައްވަމުންނެވެ. މިހާރު ގުނަމުންދާ ބައްސާމްގެ ދައުރު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.

އދ. މަހިބަދޫ އަށް އުފަން ޓޮމް އަކީ ރާއްޖޭގެ ތާރީހު ދުށް އެންމެ މޮޅު އެއް ފޯވާޑެވެ. ކްލަބް ލެވެލްގައި ނިއު ރޭޑިއަންޓާއި އުފަން ރަށުގެ އިތުރުން ވީބީ ސްޕޯޓްސް ކްލަބްގެ ޖާޒީގައި ފެނުނެވެ. ގައުމީ ޓީމުގައި ވެސް ޓޮމް އަކީ ވިދުން ގަދަ ފޯވާޑެކެވެ. ގައުމީ ޓީމަށް ކުޅުނު 38 މެޗުގައި ޓޮމް 16 ގޯލު ޖެހި އެވެ.

ޓޮމް އަކީ ކުރިއަށް އޮތް އެފްއޭއެމްގެ އިންތިހާބުގައި ރައީސްކަމަށް ވާދަކުރައްވާނެކަން އިއުލާންކުރެއްވި ފުރަތަމަ ބޭފުޅާ އެވެ. މީގެއިތުރުން އެފްއޭއެމްގެ ރައީސްކަމުގެ މަގާމަށް ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ވެސް ޝައުގުވެރިވާކަމަށް ބުނެ މީޑިއާތަކުން ރިޕޯޓުކޮށްފައި ވެއެވެ. ނަމަވެސް އެކަމާއި ގުޅިގެން އަޝްފާގުގެ ފަރާތުން ރަސްމީކޮށް އެއްޗެއް ނުބުނެ އެވެ.