ހައްދުފަހަނައަޅާފައިވާ އިސްރާއިލްގެ ޔަހޫދީން ފަލަސްޠީނުގައި ހިންގަމުންދާ ޖަރީމާތައް ކުށްވެރިކޮށް، ދިވެހިރާއްޖެއިން އިސްރާއިލާ ދެކޮޅަށް ނުކުމެފައިވާކަން އެނގި، ދިވެހި ރާއްޖެ އައުމުގައި އިސްރާއިލް ޕާސްޕޯޓް ހުރި މީހުން ސަމާލުވުމަށް އެޑްވައިޒަރީ ނެރެފިއެވެ. 

ފަލަސްތީނުގެ ބިންތަކަށް ގަދަކަމުން ވެރިވެގަނެ، އިސްރާއީލްގެ ނަމުގައި ވަކި ދައުލަތެއް ހަދައިގެން އުޅޭ އިސްރާއިލާއި ދެކޮޅަށް ދިވެހީން މީގެ ކުރިންވެސް ވަނީ އަޑު އުފުލައި ފަލަސްތީނާއި އެކުވާކަން ދައްކާލާފައެވެ.

އަދި މިފަހުން، މިމަހު 7 ވަނަ ދުވަހު، ފަލަސްޠީނުގެ މިނިވަންކަމަށްޓަމައި ޖިހާދުކުރަމުންދާ ހަމާސް ޖަމާއަތުން އިސްރާއިލަށް ދިން ކުއްލި ހަމަލާއާއެކު، އިސްރާއީލުން ފަލަސްތީނާ ދެކޮޅަށް ހަނގުރާމަ އިއުލާންކޮށް ހިންގަމުންގެންދާ ޖަރީމާތަކާއި ދެކޮޅަށްވެސް ދިވެހީން ދަނީ ކެނޑި ނޭޅި އަޑު އުފުލަމުންނެވެ. 

އެގޮތުން، ދިވެހިރާއްޖޭގެ ހުރިހާ ރަށެއްގައިހެން، ފަލަސްތީނާއި އެކު ދިވެހީން ވާކަން އަންގައި، އިސްރާއީލާއި ދެކޮޅަށް ބޮޑެތި ހިނގާލުންތަކާއި ހަރަކާތްތައް ބާއްވާފައި ވާއިރު، މިހާރު ދިވެހިން ގޮވާލަމުންދާނީ އިސްރާއީލް ފަތުރުވެރިން ރާއްޖެ އައުން މަނާ ކުރުމަށެވެ. މުޅި މީސްމީޑިއާގައި ދިވެހީން މި ޝުޢޫރު ފާޅުކޮށް، ރާއްޖޭގައި ތިބި އިސްރޭލުގެ ފަތުރުވެރިން މި ގައުމުން ބާލައި، ހަނގުރާމައިން ސަލާމަތް ވުމަށް އެމީހުން އަންނަ ތަނަކަށް ރާއްޖެ ނުހެދުމަށް ހުއްޓުމެއް ނެތި ދިވެހިން އަންނަނީ ގޮވަމުންނެވެ. 

ދިވެހިންގެ މި އަޑު ދިވެހި ސަރުކާރަށް އަދި އިވިފައި ނުވާ ނަމަވެސް، އިސްރޭލުގެ ޔަހޫދީ ސަރުކާރަށް ވަނީ އިވިފައެވެ. 

އެގޮތުން، އެކަމާއި ގުޅިގެން، އިސްރޭލުގެ ފޮރިން މިނިސްޓްރީން ރޭ ދަންވަރު ނެރެފައިފައިވާ އެޑްވައިޒަރީ އެއްގައި ވަނީ، ރާއްޖޭގެ މާހައުލު މިހާރު އޮތީ އިސްރާއީލާ ވަރަށް ބޮޑަށް ދެކޮޅަށް ކަމަށް ބުނެފައެވެ. އެހެންކަމުން، އެ މިނިސްޓްރީން ވަނީ އިސްރާއީލްގެ މީހުން ރާއްޖެއާމެދު ސަމާލުވެ، ރާއްޖެ ނައުމަށް އެ މީހުންގެ މީހުންނަށް އަންގާފައެވެ. 

"ދިވެހިރާއްޖޭގައި، އިސްރާއީލާމެދު އޮތް ދެކޮޅުވެރިކަމުގެ އޮއިވަރު މިހާރު އަންނަނީ ވަރަށް ބޮޑަށް ބާރުވަމުން. އެހެންކަމުން، މިވަގުތުގައި، އިސްރާއީލްގެ ރައްޔިތުން ދިވެހުރާއްޖެއަށް ދަތުރު ނުކުރުމަށް އެދެން" އިސްރާއީލްގެ ފޮރިން މިނިސްޓްރީން ނެރުނު އެޑްވައިޒަރީގައި އެދިފައިވެއެވެ. 

މި މަހުގެ 7 ވަނަ ދުވަހު އިސްރާއީލުން ޣައްޒާއަށް ދޭން ފެށި ނުރައްކާތެރި ހަމަލާ ތަކުގައި މިހާތަނަށް ފަލަސްތީނުގެ 3800 އަށް ވުރެ ގިނަ މީހުން ޝަހީދުވެ، 14,000 އަށްވުރެ ގިނަ މީހުން ޒަޚަމް ވެފައިވާއިރު، ޝަހީދުވި ގިނަ މީހުންގެ ތެރޭގައި 1500 އަށް ވުރެ ގިނަ ކުޑަކުދީން ހިމެނެއެވެ.