ހައްދުފަހަނައަޅާފައިވާ އިޒްރާއިލްގެ ޔަހޫދީން ފަލަސްޠީނުގައި ހިންގަމުންދާ ގަތުލު ޢާއްމަށް ހިތްވަރުދީ، ދުނިޔޭގެ ބޮޑެތި ބާރު ތައް ކަމަށް ވަކާލާތުކުރަމުންދާ ގައުމުތަކުން އިޒްރާއީލަށް ތާއީދު ކުރާ ކަން ހާމަކުރަމުންދިޔުމާއި ގުޅިގެން އެފަރާތްތަކަށް ނައިފަރު ދާއިރާގެ މެންބަރު އަހުމަދު ޝިޔާމް ވަރުގަދަ ބަހުގެ ހަމަލާތަކެއް އަމާޒުކުރައްވައިފިއެވެ. 

ފަލަސްޠީނުގެ ހާލަތާއި ގުޅިގެން ހާމަވަމުންދާ ހުޅަނގުގެ މުނާފިގު ކަމާއި ގުޅުވައި ޝިޔާމް ފޭސްބުކް ގައި ކުރެއްވި ޕޯސްޓެއްގައި ވިދާޅުވީ، މިއަދުވެސް މުޅިދުނިޔެއަށް ފެނިގެން ދަނީ އިންސާނީ ޙައްޤުތައް އެހެން މީހުންނަށް ކިޔައިދޭންއުޅޭ ދުނިޔޭގެ ބޮޑެތި ޤައުމުތަކާ އެޤައުމުތަކުގެ ނުފޫޒު ހިނގާ ބޮޑެތި ޖަމިއްޔާ ޖަމާޢަތްތަކުގެ އަސްލުސޫރަ ކަމަށެވެ. 

އަދި ހަމައެހެންމެ، އެބައިމީހުންގެ ނުފޫޒުން މެދުއިރުމަތީގެ ބައެއް އިސްލާމީ ޤައުމުތަކުގެ މައިބަދަ ގުޑާފައިތިބި މިންވަރުވެސް މިއަދު ފެނިހާމަވަމުންދާ ކަމަށާ، އިންސާނީ ޙައްޤުތަކަށް މަސައްކަތްކުރާ ކަމަށްބުނެ އުފައްދާފައިހުރި ބަައިނަލްއަޤުވާމީ ޖަމިއްޔާ ޖަމާޢަތްތައް މިއަދު ތިބީ އަނގަމަތީ ޓޭޕްއަޅާ އަތްތައްބަނދެގެން ކަމަށް އޭނާ ވިދާޅުވި އެވެ. 

"ބައެއް ބޮޑެތި ބައިނަލް އަޤުވާމީ ނޫސް އެޖެންސީތަކުގެ ނޫސްވެެރިންގެ ގަލަންތަކުން ޙަޤީގަތް ހާމަކުރާ ލިޔުންތަކަށް ދެލިނުހިނގައެވެ." ޝިޔާމްގެ ޕޯސްޓުގައި ވިދާޅުވެފައިވެއެވެ. 

ޝިޔާމް އިތުރަށް ވިދާޅުވީ، ފަލަސްތީނުގެ ނަސްލު ނައްތާލަން އިޒުރޭލުން ހިންގާ ލޭއޮހޮރުވުން ދުނިޔޭގެ ހުރިހާބިތެއްގެ ހުރިހާ ރައްޔިތުންނަށްވެސް ފެންނަމުންދަ ކަމަށެވެ. އަދި ފަލަސްޠީނުގައި ހިނގަމުންދާ ކަންކަމުގެ ވާނުވާވެސް އެންމެނަށް އެނގޭ ކަން އޭނާ ފާހަގަކުރެއްވިއެވެ.

ޝިޔާމް ވިދާޅުވީ ފަލަސްތީނުގެ މުސްލިމުން ނިކަމެތި ހާލުގައި އުޅެމުންދާ މަންޒަރުތައް ނުފެންނަނީ އަދި އެ ރައްޔިތުންގެ ރުއިމާއި އާދޭހުގެ އަޑުތައް ނީވެނީ ދުނިޔެ ހިންގަން މަޖުބޫރުކޮށްފައި އޮތް ބައިނަލް އަޤުވާމީ ނިޒާމުގެ ބޮޑުންނަށް ކަމަށެވެ.

ޝިޔާމް ވިދާޅުވީ ފަލަސްތީނުގެ މުސްލިމުންގެ އުޅެމުންދާ ހާލަތު ފެނި ހަޤީގަތުގައިވެސް ހިތްކުދިކުދި ވެވަޑައިގެންފައިވާ ކަމަށެވެ. އަދި އެ ނިިކަމެތި މައުސޫމް އާއިލާ ތަކުގެ ކުށަކީ ކޮބައިތޯވެސް އޭނާ ވަނީ ސުވާލު ކުރައްވާފައެވެ. 

"ކޮންފަދަ ރަހުމުކުޑަ އަނިޔާވެރި ނާއިންސާފުވެރި  ނިޒާމެއްތޯ!!يا الله ފަލަސްތީނުގެ މުސްލިމުންނަށް ސާބިތުކަންދެއްވާ ފަލަސްތީނުގެ ބިމާ ރައްޔިތުން ޔަހޫދީންގެ ކިބައިން ރައްކާތެރިކުރައްވާށި. آمين" ޝިޔާމް ދުޢާކުރައްވާފައިއެވެ.

ޔަހޫދީން ޣައްޒާއަށް ދެމުންގެންދާ ހަމަލާތަކުގައި މިހާތަނަށް ޣައްޒާގެ 3،785 މީހަކު ވަނީ ޝަހީދު ވެފައެވެ. އޭގެ ތެރޭގައި 1،524 ކުޑަކުދިން ހިމެނޭއިރު، 1،000 އަންހެނުންނާއި 11 ނޫސްވެރިން ހިމެނެއެވެ.