ފަލަސްތީނުގެ މައްސަލައާއި ޖެހުމުން އިންސާނީ ހައްގުގެ ނަމުގައި މަސައްކަތްކުރާ ބޭރުގެ ބޮޑެތި ޖަމިއްޔާތަކުގެ އަސްލު ސޫރަ ފެންނަމުންދާކަމަށް ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ. 

ޝިޔާމު މިފަދައިން ވިދާޅުވެފައި ވަނީ ފަލަސްތީނު މުސްލިމުންގެ ހައްގުގައި ބައިނަލްއަގްވާމީ ޖަމުއިއްޔާތަކުން ބަސް ބުނަމުން ނުދާތީ ކަންބޮޑުވުން ފާޅުކުރައްވާ ފޭސްބުކުގައި ލިޔުއްވި ޕޯސްޓެއްގަ އެވެ.

ޝިޔާމް ފޭސްބުކުގައި ލިޔުއްވި ޕޯސްޓެއްގައި ވިދާޅުވީ އިންސާނީ ޙައްޤުތައް އެހެން މީހުންނަށް ކިޔައިދޭން އުޅޭ ދުނިޔޭގެ ބޮޑެތި ޤައުމުތަކާ އެޤައުމުތަކުގެ ނުފޫޒުހިނގާ ބޮޑެތި ޖަމިއްޔާ ޖަމާޢަތްތަކުގެ އަސްލު ސޫރަ މިއަދު ފެންނަމުންދާ ކަމަށެވެ.

އަދި އެ މީހުންގެ ނުފޫޒުން މެދުއިރުމަތީގެ ބައެއް އިސްލާމީ ޤައުމުތައްވެސް "މައިބަދަ" ގުޑާފައި ތިބި ކަމަށާއި ފަލަސްތީނަށް އެހީ ނުވާ ކަމަށް ޝިޔާމް ވިދާޅުވި އެވެ.

ޝިޔާމް ވިދާޅުވީ އިންސާނީ ހައްގުތަކަށް މަސައްކަތްކުރާ ކަމަށް ބުނެ އުފައްދާފައި ހުރި ބައިނަލްއަގުވާމީ ޖަމުއިއްޔާ ޖަމާއަތްތައް މިއަދު ތިބީ އަނގަމަތީ ޓޭޕުދަމާ އަތް ބަނދެގެން ކަމަށެވެ. އަދި އެ މައްސަލައިގެ ހަގީގަތް ހާމަކުރަންވީމާ ބައެއް ބޮޑެތި ބައިނަލް އަގުވާމީ ނޫސް އޭޖެންސީތަކުގެ ނޫސްވެރިންގެ ގަލަންތަކުގެ ދެލި ނުހިނގާކަމަށެވެ.

ފަލަސްތީނު މުސްލިމުންގެ ނަސްލު ނައްތާލަން އިޒުރޭލުން ހިންގާ ލޭއޮހޮރުވުން ދުނިޔޭގެ ހުރިހާ ބިތެއްގެ ހުރިހާ ރައްޔިތުންނަށް ފެންނަމުންދާ ކަމަށާއި ވާނުވާވެސް އެނގޭ ކަމަށް ޝިޔާމް ވިދާޅުވި އެވެ. ނަމަވެސް ބައިނަލްއަގުވާމީ ބޮޑުންނަށް އެ މަންޒަރުތައް ނުފެންނަ ކަމަށް ހަދައިގެން ތިބިކަމަށް ވިދާޅުވި އެވެ.

ޝިޔާމް ވިދާޅުވީ ފަލަސްތީނުގައި އެތައްހާސް ފުރާނައެއް ރަހުމެއްނެތި ޝަހީދުވާކުރާ މަންޒަރު ފެނިގެންދާއިރު، މި މަންޒަރުތައް ދުނިޔެ ހިންގަން މަޖުބޫރުކޮށްފައި މިއޮތް ބައިނަލް އަޤުވާމީ ނިޒާމުގެ ބޮޑުންނަށް ނުފެންނަ ކަމަށެވެ. އެމީހުންނަށް ފަލަސްތީނުގެ ޖައްވުން އަރާ ކަޅު ދުންތައް ނުފެންނަ ކަމަށާއި، ކުޑަކުއްޖެއް އަންހެނެއް ނުބަލާ ރަޙުމެއް ހަމްދަރުދީއެއްނެތި އެތައްސަތޭކަ އާއިލާއެއް ޝަހީދުކުރަމުންދާތަން ވެސް ނުފެންނަކަން ޝިޔާމު ފާހަގަކުރެއްވި އެވެ.

އޭގެ އިތުރުން ހޮސްޕިޓަލެއް މަދުރަސާއެއް ރެފިއުޖީ ކޭންޕެއް ނުބަލާ ބޮންއަޅާ އިމާރާތްތައް ވެސް ބިމާ ހަމަކުރަމުންދާތަން ނުފެންނަކަމަށް ޝިޔާމުގެ އެޕޯސްޓުގައި ވިދާޅުވެފައި ވެއެވެ. އެއާއެކު އޭނާ ވިދާޅުވީ ފެނާއި ކަރަންޓާއި ކާއެއްޗެއް ނެތް ތާނގައި މިއަދު ފަލަސްތީނުގެ ރައްޔިތުންނަށް ބައިނަލް އަޤުވާމީ މުއާހަދާތައް ބުނާ އެންމެ އަސާސީ ޙައްޤު ކަމުގައިވާ ދިރިހުރުމުގެ ޙައްޤުވެސް ނެތް އިރު ބައިނަލްއަގުވާމީ ޖަމުއިއްޔާތަކަށް އެ ތަންތަން ނުފެންނަކަމަށް ޝިޔާމު ވިދާޅުވި އެވެ.

އެއީ އަނިޔާވެރި އިންސާފުގެ ނިޒާމެއް ކަމަށް ވިދާޅުވެ ޝިޔާމް ވަނީ ފަލަސްތީނުގެ މުސްލިމުންނަށް ސާބިތުކަން ދެއްވައި ފަލަސްތީނުގެ ބިމާ ރައްޔިތުން ޔަހޫދީންގެ ކިބައިން ރައްކާތެރިކުރެއްވުން އެދި ދުއާ ދަންނަވާފަ އެވެ.