އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި އެވަޓަންއާއި ދެކޮޅަށް ކުޅުނު މެޗު 2-0 ގެ ނަތީޖާއަކުން ލިވަޕޫލުން ކާމިޔާބުކޮށް ވަގުތީގޮތުން ލީގު ތާވަލުގެ އެއްވަނައަށް ކުރިއަށް ޖެހިލައިފިއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ލިވަޕޫލުން މެޗު ޑޮމިނޭޓުކުރި އިރު، މިހާފުގައި އެޓީމުން އެންމެ ހުސް ފުރުސަތެއް ލިބުނީ ފޯވާޑް ލުއިސް ޑިއާޒް އަށެވެ. ނަމަވެސް އޭނާ ފޮނުވާލި ހަމަލާ އެވަޓަންގެ ޑިފެންޑަރުން ވަނީ ދިފާއުކޮށް ކޯނަރަކަށް ބޭރުކޮށްލާފައެވެ.

މިހާފުގައި އެވަޓަންގެ ފަރާތުން ރަގަޅު ޑިފެންސިވް ކުޅުމެއް ފެނިގެންދިޔަ އިރު އެޓީމަށް އިތުރު މައްސަލަތަކެއް ކުރިމަތިވީ ފުރަތަމަ ހާފުގެ 37 ވަނަ މިނެޓުގައި އެޓީމުގެ ތަޖުރިބާކާރު ޑިފެންޑަރު އޭޝްލީ ޔަންގް އަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

Advertisement

މެޗުގެ ދެވަަނަ ހާފުގައި ވެސް އެވަޓަންގެ މުޅި ޓީމު ފަހަތަށް ފައިބައިގެން ޑިފެންސް ކުރަމުންދަނިކޮށް ލިވަޕޫލުން މެޗުގެ ލީޑު ހޯދީ ދެވަނަ ހާފުގެ 75 ވަނަ މިނެޓުގައި އެޓީމަށް ލިބުނު ޕެނަލްޓީއަކުންނެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު ސަލާހް އެވެ.

މިމެޗުގައި ލިވަޕޫލުން ކާމިޔާބުކުރި ދެވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ވެސް ސަލާހް އެވެ. މިއީ އެޓީމުގެ އުރުގުއާއީގެ ފޯވާޑް ޑާވިން ނުނޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ. އަދި މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 9 މެޗުން 20 ޕޮއިންޓް ހަމަކޮށް ލަނޑުގެ ތަފާތުން އެޓީމު ވަނީ ލީގު ތާވަލުގެ އެއްވަނައަށް ވަގުތީގޮތުން ކުރިއަށް ޖެހިލާފައެވެ.

މިމެޗުން ބަލިވި އެވަޓަން ލީގުގައި ކުޅުނު 9 މެޗުން ލިބުނު 7 ޕޮއިންޓާއެކު މިވަގުތު އޮތީ ލީގު ތާވަލްގެ 16 ވަނައިގައެވެ.