ރާއްޖޭގައި ބޭއްވޭ އިވެންޓް ތަކަކީ ސިއްޚީ ދުޅަހެޔޮ ކަމަށް ފެތޭ އިވެންޓަކަށް ހެދުމަށް އުފެއްދި ޤަވާއިދަށް އަމަލުކުރަން ފަށައިފިއެވެ.
މި ޤަވާއިދަކީ ސިއްޙީގޮތުން ރަނގަޅު އާދަކާދަ އާންމު ދިރިއުޅުމުގައި ބޭނުންކުރުމަށް ބާރުއެޅުމަށާއި، ސާރުކާރާއި ސަރުކާރު ހިއްސާވާ ކުންފުނިތަކުން ރާވާ ހިންގާ ކުޅިވަރު މުބާރާތްތަކާއި، ފެއަރ އަދި މުނިފޫހި ފިލުވުމުގެ ހަރަކާތް ތަކުގެ އިތުރުން ސްކޫލްތަކުގައާއި އޮފީސްތަކުން ކުރިޔަށްގެންދާ އެކިއެކި ރަސްމިއްޔާތުތަކާއި ބައްދަލުވުންތަކާއި، މުހިންމު ދުވަސްތައް ފާހަގަ ކުރަން ބާއްވާ ޙަފްލާތަކާއި އެއްވުންތަކަކީ ސިއްޚީ ދުޅަހެޔޮކަމަށް ބާރުދޭ ބައްދަލުވުންތަކަކަށް ހެދުމުގެ މަޤްސަދުގައި އެކުލަވާލެވިފައިވާ ޤަވާއިދެކެވެ.
މި ޤަވާއިދުގައި ބައްދަލުވުންތައް އިންތިޒާމް ކުރުމުގެ ކުރިން ސަމާލުވާންވީ ކަންކަން އެއްހަމައެއްގެ ތެރެއިން ކަނޑައެޅި، ދެމެހެއްޓެނިވި ގޮތެއްގައި ކަންކަން ކުރާނެގޮތް ހިމަނައިފައިވެއެވެ.
ހަމަ މިއާއިއެކު ހަރަކާތްތަކާއި ބައްދަލުވުންތަކުގައި ސިއްހަތަށް ފައިދާހުރި ކެއިންބުއިން ފޯރުކޮށްދިނުމާއި، ދުންފަތުގެ އިސްތިއުމާލު ނުކުރާ ޖިސްމާނީ ހަރަކާތްތެރިކަމަށް ހިތްވަރުދޭ މާޙައުލެއް ތަނަވަސްކޮށްދިނުމާއެކު ޞިއްޙީ ގޮތުން ފައިދާހުރި ގޮތަށް ހަރަކާތްތައް ބައްޓަން ކުރާނެ ގޮތްތައް ހިމެނިފައިވެއެވެ.
އަދި މި ޤަވާއިދަށް ސަރުކާރާއި ސަރުކާރު ހިއްސާވާ ކުންފުނިތަން ޢަމަލު ކުރުމަށް ނަސޭހަތްތެރިވެ ބާރުއެޅުމާއެކު އޭގައިވާ ކަންކަން ތަންފީޒު ކުރެންވެމުންދާވަރު ކަމާގުޅުންހުރި އިދާރާތަކުން މޮނީޓަރުކޮށް އަޅަންޖެހޭ ފިޔަވަޅުތައް އެޅުމަށް ސޯޝަލް ކައުސިލްއިން ވަނީ ނިންމަވާފައެވެ.
Advertisement
This content is created and paid for by advertisers and does not involve Voice Journalists
