ސަރުކާރު ބަންދު ދުވަސްދުވަހު މަސައްކަތް ކުރާ ސަރުކާރުގެ މުވައްޒަފުންނަށް ހާޒިރީ އެލަވަންސް ދޭން ފަށައިފިއެވެ.

ބަންދު ދުވަސް ދުވަހު މަސައްކަތް ކުރާ މުވައްޒަފުންނަށް ހާޒިރީ އެލަވަންސް ދޭން ފަށައިފައި ވަނީ ދައުލަތުގެ ޕޭ ފްރޭމްވޯކަށް ބަދަލު ގެނެސްގެނެވެ.

މީގެކުރިން ޢަމަލުކުރަމުން އައި ޕޭ ފްރޭމްވޯކްގެ މިންގަނޑުގައިވާ ގޮތުން ހާޒިރީ އެލަވަންސް ދެމުން އަންނަނީ ރަސްމީ ދުވަސްތަކުގައި މަސައްކަތް ކުރާނަމައެވެ.

Advertisement

ނަމަވެސް މި ހަފުތާގެ އާދިއްތަ ދުވަހުން ފެށިގެން ވަނީ އެ މާއްދާއަށް ޢަމަލުކުރާ ގޮތަށް ބަދަލު ގެނެސްފައެވެ.

އެގޮތުން ރަސްމީ މަސައްކަތު ދުވަހުގެ އިތުރުން ރަސްމީ ބަންދު ދުވަސްތަކުގައި ވެސް ޑިއުޓީ އުސޫލުން އޮފީހަށް ހާޒިރުވެ މަސައްކަތް ކުރާނަމަ ހާޒިރީ އެލަވަންސް ލިބޭނެއެވެ.

އޮފީހަށް ހާޒިރުވުންކަމަށް މާނަކޮށްފައިވަނީ މުވައްޒަފު ޖިސްމާނީ ގޮތުން އޮފީހަށް ހާޒިރުވުމާއި އޮންލައިންކޮށް މަސައްކަތް ކުރަންޖެހޭ ހާލަތެއްގައި ’ސައިން-އިން‘ ވެގެން ހާޒިރުވުމެވެ.

މީގެއިތުރުން ރަށްރަށަށް ނުވަތަ ރާއްޖެއިން ބޭރަށް ކުރަންޖެހޭ ރަސްމީ ދަތުރުތަކުގެ ދުވަސްތައް އެލަވަންސްގައި ހިމަނާނެއެވެ. އަދި ވަޒީފާގެ ގާނޫނުގައި ބަޔާންކޮށްފައިވާ ރަސްމީ ބަންދު ދުވަސްތަކާއި ހުކުރު ދުވަސްތަކުގައި މުވައްޒަފު އިދާރާއަށް ހާޒިރުވެ ޑިއުޓީ އުުސޫލުން އިދާރާގެ ރަސްމީ މަސައްކަތު ގަޑީގެ ގޮތުގައި ކަނޑައަޅާފައިވާ ޖުމްލަ ވަގުތުގެ މަދުވެގެން ދެބައިކުޅަ އެއްބައި ވަގުތު މަސައްކަތް ކުރާނަމަ ވެސް ހާޒިރީ އެލަވަންސް ލިބޭ ގޮތައް ވަނީ ޕޭ ފްރޭމްވޯކަށް ބަދަލުގެނެސްފައެވެ.