ޔުއެފާ ޗެމްޕިއަންސްލީގު ގްރޫޕް އެފްގައި ބުދަ ދުވަހުގެރޭ އަމިއްލަ ދަނޑުގައި 3-0 ގެ ނަތީޖާއަކުން އޭސީ މިލާން އަތުން މޮޅުވެ ޕީއެސްޖީ އިން ގުރޫޕްގެ އެއްވަނަ މަގާމަށް ކުރިއަށް ޖެހިލައިފިއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ޕީއެސްޖީ އިން މެޗު ޑޮމިނޭޓުކުރި އިރު، މިމެޗުގައި އެޓީމުން ލީޑު ނެގީ ފުރަތަމަ ހާފުގެ 32 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ކިލިއަން އެމްބާޕޭ އެވެ. މިއީ އެޓީމުގެ ޒުވާން މިޑްފީލްޑަރު ވޮރެން ޒައިރޭ- އެމެރީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޕީއެސްޖީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޕީއެސްޖީ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފު ފެށިގެން ތިންވަނަ މިނެޓުގައި އެޓީމުން ލަނޑެއް ކާމިޔާބުކުރި އެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ ލަނޑުޖެހުމުގެ ކުރިން ޕީއެސްޖީގެ ކުޅުންތެރިއެއް ފައުލް ކޮށްފައިވާތީ އެއީ ރަނގަޅު ލަނޑެއް ނޫންކަމަށެވެ.

Advertisement

ނަމަވެސް އޭގެ ފަސް މިނެޓު ފަހުން އެޓީމުގެ ލީޑު ފުޅާކޮށްދިނީ ރެންޑަލް ކޮލޯ މުއާނީ އެވެ. މިއީ އެޓީމުގެ އުސްމާން ޑެންބެލޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިމެޗުގައި އެޓީމުން ކާމިޔާބުކުރި ތިންވަނަ ލަނޑު ފަހުހާފުގެ 89 ވަނަ މިނެޓުގައި ކާމިޔާބުކޮށްދިނީ ސައުތު ކޮރެއާގެ މިޑްފީލްޑަރު ކަންގް-އިން ލީ އެވެ. މިއީ ވެސް އެޓީމުގެ ޒުވާން މިޑްފީލްޑަރު ވޮރެން ޒައިރޭ- އެމެރީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ޕީއެސްޖީ ކުރީގައި އޮވެގެންނެވެ. އަދި މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ހަ ޕޮއިންޓް ހަމަކޮށް އެޓީމުން ވަނީ ގްރޫޕްގެ އެއްވަނައަށް ކުރިއަށް ޖެހިލާފައެވެ. މިގުރޫޕްގެ ދެވަނައިގައި ހަތަރު ޕޮއިންޓާއެކު އޮތީ މިރޭ ނިއުކާސަލް ޔުނައިޓެޑް އަތުން މޮޅުވި ޑޯޓްމަންޑް އެވެ. އަދި މިމެޗުން ބަލިވި އޭސީ މިލާން ކުޅުނު ތިން މެޗުން ލިބުނު ދެ ޕޮއިންޓާއެކު މިވަގުތު އޮތީ ގްރޫޕްގެ ފުލުގައެވެ.