ވެލާނާ އިންޓަރނޭޝަނަލް އެއަރޕޯޓްގައި އެހެން މީހުންނަށް އުނދަގޫ ކޮށް ހަދާތީ ފުލުހުންގެ ބެލުމުގެ ދަށަށް ގެންދިޔުމަށްފަހު އިމިގްރޭޝަނާ ހަވާލުކުރި ޗައިނާ އަންހެން މީހާ ޕޮލިސް ސްޓޭޝަންގައި ބަނޑަހަ ޖަހައިގެން އުޅޭތީ، އެގޮތަށް އެކަން ނުކުރުމަށް ތަކުރާރުކޮށް ބުނެފައިވާނެ ކަމަށް ފުލުހުން ބުނެފިއެވެ.

މިދިޔަ ހަފްތާގެ ތެރޭގައި އެ ޗައިނާ މީހާ ފުލުހުންގެ ބެލުމުގެ ދަށަށް ގެންގޮސްފައިވަނީ އެއަރޕޯޓްތެރޭގައި އެހެން މީހުންނަށް އުނދަގޫ ވާނެ ހެން އަޑުގަދަކޮށް ތަންތަނަށް ކުޅުޖެހުން ފަދަ ޢަމަލުތައް ހިންގަމުން ދަނިކޮށެވެ.

މައުލޫމާތު ލިބިފައިވާ ގޮތުގައި އޭނާ އެއަރޕޯޓް ތެރޭގައި ގިނަ ދުވަސްތަކެއް ވަންދެން އުޅެފައިވެއެވެ. އަދި އެހާ ގިނަ ދުވަހު އޭނާ އެއަރޕޯޓް ތެރޭގައި އުޅެފައިވަނީ ވިސާގެ މައްސަލަ ޖެހިގެނެވެ.

މި މީހާ ފުލުހުންގެ ބެލުމުގެ ދަށަށް ގެންދިޔުމަށްފަހު އިމިގްރޭޝަން އާ ހަވާލުކޮށްފައިވާ ކަމަށް މިމަހު 19 ވަނަ ދުވަހު ފުލުހުންގެ އިދާރާއިން ވަނީ މައުލޫމާތު ދީފައެވެ. 

ނަމަވެސް އިމިގްރޭޝަން ޑިޓެންޝަން ގައި އަންހެނުން ބައިތިއްބާނެ ތަނެއް ނުހުންނާތީ އަންހެން މީހާ އެތަނުގައި ނުބެހެއްޓޭނެ ކަމަށް ބުނެ ދޫކޮށްލާފައިވާ ކަމަށް މައުލޫމާތު ލިބިފައިވެއެވެ. މިފަދަ މީހުން ބެލެހެއްޓުމުގެ ޒިންމާ ހަވާލުކުރެވިފައިވާނީ އިމިޤްރޭޝަނައާއެވެ.

އޭނާ މިވަގުތު ހުރީ މާފަންނު ޕޮލިސް ސްޓޭޝަނުގައި ކޭންޕު ޖަހައިގެންނެވެ. އޭނާ އެތަނުގައި އުޅެމުންދާތާ 6 ދުވަސް ވެފައިވާއިރު އިމިޤްރޭޝަނުން އޭނާގެ ކަންކަމާ ހަވާލުވެފައެއްނުވެއެވެ.

މިކަމާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، އެމީހާ އަކީ ފުލުހުންގެ ބެލުމުގެ ދަށުގައި ނުވަތަ ބަންދެއްގައިވެސް ހުރި މީހެއް ނޫން ކަމަށެވެ.

"އޭނާ ޕޮލިސް ސްޓޭޝަންގައި އުޅޭތީ ތަކުރާރުކޮށް ނަސޭހަތްދީ އެގޮތަށް ކަންތައް ނުކުރުމަށް އެދިފައި ވާނެ. އޭނާ އަކީ އޮކްޓޯބަރ 19 ވަނަ ދުވަހު އިމިގްރޭޝަން އާއި ހަވާލު ކޮށްފައިވާ މީހެއް." މީޑިއާ އޮފިޝަލް ވިދާޅުވެފައިވެއެވެ. 

މިކަމާއި ގުޅިގެން އިމިގްރޭޝަންގެ ބަހެއް ލިބޭތޯ ގުޅައި މެސެޖު ކޮށްގެންވެސް އެ ތަނުގެ ބަހެއް ލިބޭގޮތް ވަނީ ނުވެފަ އެވެ.