އިންތިޚާބީ ރައީސް ޑރ މުހައްމަދު މުއިއްޒު ރައީސުލްޖުމްހޫރިއްޔާ ކަމުގެ ހުވާކުރެއްވުމަށް ހުރަސްއެޅުމަށް ނިމެމުން މިދާ ސަރުކާރު ހިންގާ މައި ޕާޓީ އެމްޑީޕީގެ ޕާލަމެންޓްރީ ގުރޫޕުން ފެށި ހަނގުރާމަ އަކީ ބަލިވާނެ ހަނގުރާމައެއްކަން ހާމަކުރައްވާ ކުރީގެ ބަންޑާރަ ނައިބު އާޒިމާ ޝުކޫރު ބަހުގެ ހަމަލާތަކެއް އަމާޒުކުރައްވައިފި އެވެ. 

އެމްޑީޕީގެ ގިނަ މެމްބަރުންތަކެއްގެ ސޮޔާއެކު މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމަށް މަޖިލީހަށް ހުށައަޅާފައިވާ މައްސަލައާއި އިންތިޚާބީ ރައީސް ޑރ މުހައްމަދު މުއިއްޒުގެ ހުވާކުރުމުގެ ރަސްމިއްޔާތާއި ގުޅުވާ އެމްޑީޕީގެ ޕީޖީން ވަނީ ރައީސް ނަޝީދުގެ ރިޔާސަތުގައި ޑރ މުއިއްޒު ކުރައްވާ ހުވާ ބަލައިނުގަންނާނެ ކަމަށާއި، އަދި ޑރ މުއިއްޒުގެ ކެބިނެޓަށް ރުހުން ވެސް ނުދޭނެކަމަށް ބުނެފައެވެ. 

އެކަމާއި ގުޅިގެން ގިނަ ފާޑުކިޔުންތަކެއް އެމްޑީޕީއަށް އަމާޒުވަމުން އަންނައިރު، އެކަމާއި ގުޅުވާ އާޒިމާ ޝުކޫރު ވަނީ އެމްޑީޕީގެ އެ ނިންމުމަކީ އެއްވެސް ރަނގަޅު ނަތީޖާއެއް ނިކުންނާނެ ކަމެއްތޯ އައްސަވާ ސުވާލު އުފައްދަވާފައެވެ. 

Advertisement

އެގޮތުން އާޒިމާ ލިޔުއްވި ޕޯސްޓެއްގައި ވަނީ ޑރ މުއިއްޒު ހުވާކުރެއްވުމަށް ހުރަސްއެޅުމުން މަޖިލީހުގެ ރިޔާސަތުން ނަޝީދު ބޭލޭނެތޯ އައްސަވާ ސުވާލުކުރައްވާފަ އެވެ. އަދި އެފަދައިން އެކަން ކުރުމުން ސަރުކާރު ހުއްޓުމަކަށް ގެނެވޭނެތޯ ވެސް ސުވާލު ކުރައްވާފައި ވެއެވެ. 

އެއާއެކު އާޒިމާ ވިދާޅުވީ އެމްޑީޕީ ޕީޖީން އެ ފެށީ ފުރަތަމަ ވެސް ބަލިވާނެ ހަނގުރާމައެއް ކަމަށެވެ. އަދި އެފަދަ ކަންކަން ކުރުމުން ހާމަވެގެންދަނީ ސަރުކާރުގެ ގާނޫނީ ވަކީލުންގެ ފެންވަރެއް ނެތް މިންވަރު ކަމަށާއި، އެ ވަކީލުން ތިއްބަވައިގެން ޗާގޯސް މައްސަލަ މޮރިޝަސް ކޮޅަށް ނިމުމަކީ ހައިރާންވާންވީ ކަމެއް ނޫން ކަމަށް ވެސް އާޒިމާ ސިފަކުރެއްވި އެވެ. 

އިންތިޚާބީ ރައީސް ހުވާކުރެއްވުމަށް އެމްޑީޕީން ހުރަސްއަޅަނީ ރައީސް އިބްރާހިމް މުހައްމަދު ޞާލިހުގެ އެންގެވުމަށްކަން ފާހަގަކޮށް ދަ ޑިމޮކްރެޓްސްއިން ވަނީ އެ އަމަލު ކުށްވެރިކޮށްފަ އެވެ. އަދި އެކަން މިހާރުން މިހާރަށް ހުއްޓާލާ ޑިމޮކްރަސީގެ ރީތި އާދަތަކުގައި އެމްޑީޕީން ހިފައިގެން ކުރިއަށް ދިއުމަށް ވެސް އެ ޕާޓީން ވަނީ ގޮވާލާފަ އެވެ.