ހައްދުފަހަނައަޅާފައިވާ އިސްރާއީލުގެ ޔަހޫދީ ސިފައިން، ފަލަސްޠީނުގައިވާ މުގައްދަސް ބިނާ ކަމުގައިވާ އަލް މަސްޖިދުލް އަޤުޞާ އަށް ހުކުރު ކުރަން މުސްލިމުން ވަނަ ނުދީ ހުރަސް އަޅައިފިއެވެ.
މަސްޖިދުލް އަގްސާ ހުންނަ ސަރަހައްދުން، އަލްޖަޒީރާއަށް އެ ނޫހުގެ ރިޕޯޓަރ މައުލޫމާތު ދީފައިވާ ގޮތުގައި ކޮންމެ ހަފްތާއެއްގެވެސް ހުކުރު ދުވަހުގެ ހުކުރު ނަމާދު ކުރާ ވަގުތަކީ އަޤްޞާ މިސްކިތް އެއްކޮށް ފުރާލާފައި އޮންނަ ވަގުތެކެވެ. އެހެން ނަމަވެސް މިއަދުގެ މެންދުރުގެ އެވަގުތުގައި، އަޤްޞާ މިސްކިތަށް ހުކުރު ކުރަން ވަދެވުނީ ވަރަށް މަދު މީހުންނަށް ކަމަށާ، އެހެން އެކަންވީ އެ މިސްކިތަށް ވަންނަ ގޭޓްތައް ކައިރީ ތިބި އިސްރާއީލުގެ ފުލުހުން ހުކުރަށް ދިޔަ މީހުންނަށް އަނިޔާކޮށް، އެމީހުންނަށް ހުރަސް އެޅުމުން ކަމަށްވެސް އެ ރިޕޯޓަރު ވަނީ ބުނެފަ އެވެ.
"އަޤްޞާ މިސްކިތަށް އާއްމުކޮށް ވަދެ އުޅޭ ގޭޓުން ވަންނަން ދިޔަ ފަލަސްތީނުގެ ރައްޔިތެއް ގައިގައި ޖަހައި އިސްރާއީލުގެ ފުލުހުން ވަނީ އަނިޔާ ކޮށްފައި. އެ ނޫން މީހެއް ގައިގައިވެސް އެ ފުލުހުން ޖަހާފައި ވާއިރު އޭނާ ބުނަމުން ދިޔައީ އޭނާ މިސްކިތަށް ވަންނަން ދިޔައީ ނަމާދު ކުރަން ކަމަށް. މިއަދު އެއްވެސް މީހަކަށް މިސްކިތާއި ކައިރިވެލަންވެސް އުނދަގޫ ހާލަތެއްގައި ކަންކަން އޮތީ. އެހެން ނޫނީ މި ގަޑި އަކީ އެތައް ހާސް މީހަކު މިސްކިތަށް އަންނަ ވަގުތެއް. ހުޅަނގު އައްސޭރީގެ މަގުތައް ބަންދުކޮށް، މީހުން މިސްކިތާއި ކައިރިވިޔަވެސް މިއަދަކު ނުދިން." އަލްޖަޒީރާގެ ނޫސްވެރިޔާ ބުނެފައިވެއެވެ.
ފަލަސްޠީނުގެ މިނިވަންކަމަށްޓަމައި ޖިހާދުކުރަމުންދާ ހަމާސް ޖަމާއަތުން މިމަހު 7 ވަނަ ދުވަހު އިސްރާއީލަށް އަމާޒުކޮށް ދިން ހަމަލާއާއި ގުޅިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ފަލަސްތީނާ ދެކޮޅަށް ހަނގުރާމަ އިއުލާން ކޮށްފައެވެ.
އެއާއެކު، އިސްރާއީލްގެ ޖައްބާރު ސިފައިން، ހުއްޓުމެއްނެތި ފަލަސްޠީނުގެ އާއްމުންނަށް އަމާޒުކޮށް، ހުއްޓުމެއްނެތި ވަރުގަދަ ހަމަލާތައް ދެމުންދާއިރު، އެ ހަމަލާތަކުގައި 7000 އަށްވުރެ ގިނަ މީހުން ވަނީ ޝަހީދުކޮށްލައިފައެވެ. އަދި އެތައް ހާސް ބަޔަކު ވަނީ ޒަހަމްވެސް ކޮށްލައިފައެވެ. އޭގެ ތެރެއިންވެސް އެންމެ ގިނައީ އަންހެނުންނާއި ކުޑަކުދިންނެވެ.
ޣައްޒާއަށް އިސްރާއީލުން ދެމުން އަންނަ ހަމަލާތަކުގެ އިތުރުން އިންސާނިއްޔަތު ކަމެއް ނުބަހައްޓާ، ޣައްޒާގެ ރައްޔިތުންނަށް ބޯފެނާއި، އެހެނިހެން ތަކެތި ދިނުމަށް އިސްރާއީލުގެ ޔަހޫދީން ވަނީ ހުރަސް އަޅާފައެވެ.
Advertisement
This content is created and paid for by advertisers and does not involve Voice Journalists
