ރައްޔިތުންގެ މަޖިލީހުގެ ރައީސްގެ މަގާމުން، ރައީސް މުހައްމަދު ނަޝީދު ދުރު ކުރުން ހުއްޓުވަން ޑިމޮކްރެޓްސް އަށް ކުރެވޭނީ ދެ ކަންތައް ކަމަަށާ އެ ދެ ކަންވެސް ހައްލު ކުރާނެ ގޮތް އެނގިވަޑައިގަންނަވާ ކަމަށް ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވެއްޖެ އެވެ.
ރޭ ޑިމޮކްރެޓްސްއިން އެ ޕާޓީގެ ހަރުގޭގައި ބޭއްވި ޖަލްސާގައި ވާހަކަ ދައްކަވަމުން އެ ޕާޓީގެ ޕީޖީ ލީޑަރު ޢަލީ ޢާޒިމް ވަނީ، ރައީސް ނަޝީދުގެ އިތުބާރު ނެތްކަމުގެ މައްސަލާގައި އެމްޑީޕީއަށް ކާމިޔާބު ނުވާނެ ކަމަށް ވިދާޅުވެފައެވެ.
"އެމްޑީޕީ އަނެއްކާވެސް ތިދަތީ ބަލިވަން. ބޮޑުތަނުން ބަލިވާން ތިދަނީ. އަޅުގަނޑުމެން އިރާދަކުރެއްވިއްޔާ މަޖިލީހުގއި ތިބެގެން ރައްޔިތުންގެ މަޖިލީހުގެ ރައީސް ވަކިކުރަން ތި ހުށައަޅާފައި އޮތް ހުށައެޅުން ބަލައިގަނެގެންނެއް ވަކިކުރެވޭނެ އެއްވެސް ގޮތެއް ނެތް. އެ ފުރުސަތެއް އަޅުގަނޑުމެނެއް ނުދޭނަން"
ޢަލީ ޢާޒިމް
އާޒިމްގެ އެވާހަކަ އާއި ގުޅިގެން ނިޔާޒު ކުރެއްވި ޓްވީޓެއްގައި ވަނީ، ރައީސް ނަޝީދުގެ މައްސަލަ ކާމިޔާބު ވިޔަ ނުދިނުމަށް ޑިމޮކްރެޓްސް އަށް ކުރެވޭނީ ދެ ކަންތައް ކަމަށެވެ.
އެއީ ނައިބު ރައީސް އީވާ އަބްދުالله ޖަލްސާގެ ރިޔާސަތަށް ވަޑައިނުގަތުން ނުވަތަ ޖަލްސާގެ ނިޒާމު ގެއްލުވާލުން ކަމަށް އޭނާ ވިދާޅުވި އެވެ.
"އެ 2 ކަމަށް ވެސް އެމް.ޑީ.ޕި ގެ ހައްލު އެބައޮތް. ފަހަތަށް ޖެހުމެއް ނެތް." ނިޔާޒް ވިދާޅުވި އެވެ.
އާދީއްތަ ދުވަހު ރައީސް ނަޝީދުގެ އިތުބާރު ނެތްކަމުގެ މައްސަލައިގައި ވޯޓު ނެގުން ތާވަލުކޮށްފައިވީ ނަމަވެސް އެ ދުވަހުގެ ޖަލްސާގެ ކުރިއަށް ދާނެ ކަމާއިމެދު ވަނީ ސުވާލު އުފެދިފަ އެވެ. އެގޮތުން ރިޔާސަތުގައި ނަޝީދު ނޫން ބޭފުޅަކު އިންނަވަން ޖެހޭ އިރު، މަޖިލީހުގެ ނައިބު ރައީސް އީވާގެ ހާލުކޮޅު ރަނގަޅު ނޫން ކަމަށް ޑިމޮކްރެޓްސް ގެ ބައެއް މެންބަރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
