ފަލަސްޠީނުގެ ޣައްޒާގައި ޔަހޫދީން ހިންގަމުންދާ ގަތުލު ޢާއްމު އަނެއްކާވެސް އެހެން ހަރުފަތަކަށް ގެންދިޔުމަށް، ޣައްޒާއަށް ދެމުންދާ އިންޓާނެޓްގެ ޚިދުމަތް މެދުކަނޑާލައި ވަރުގަދައަށް ބޮން އަޅަން ފަށައިފިއެވެ. 

ޣައްޒާގެ ޚަބަރުތައް ގެނެސްދޭ މީޑިއާ ތަކުން ބުނެފައިވާ ގޮތުގައި މިރޭގެ ވަގުތެއްގައި ހަރުކަށި އިސްރާއީލުން ވަނީ ޣައްޒާގެ އިންޓަނެޓާއި މުވާސަލާތީ ޚިދުމަތްތައް ކަނޑާލާފައެވެ. އަދި އެއާއެކު ބޮމުގެ ވަރުގަދަ ހަމަލާތައް ދޭން ފަށާފައިވާއިރު މުޅި ސަރަހައްދު ވަނީ ބޮމުގެ ގަދަ ފަދަ އަޑުން ގުގުމާލާފައެވެ. 

ގުދުސަ ނެޓްވޯކުން މައުލޫމާތު ދީފައިވާ ގޮތުގައި، މިއީ މި އޮކްޓޯބަރ 7 ވަނަ ދުވަހު އިސްރާއީލް ހަމަލާތައް ދޭން ފެށިފަހުން ޣައްޒާއަށް ދެވެމުންދާ އެންމެ ނުރައްކާތެރި ވަރުގަދަ ހަމަލާތަކެވެ. އަދި މި ހަމަލާތައް ސީދާ އަމާޒުކުރަމުން ދަނީ ޣައްޒާގެ އާއްމުން ދިރިއުޅެމުންދާ ސަރަހައްދު ތަކަށް ކަމަށްވެސް މައުލޫމާތު ދީފައިވެއެވެ.

މިމަހުގެ ހަތްވަނަ ދުވަހު ފަލަސްތީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސްއިން އިސްރާއީލަށް ދިން ކުއްލި ހަމަލާތަކުގެ ސަބަބުން ބަދަލުހިފުމަށް ޔަހޫދީ އިސްރާއީލުން އަންނަނީ ޣައްޒާގެ އެކި ހިސާބުތަކަށް ހުއްޓުމެއް ނެތި ވަރުގަދަ ހަމަލާތަކެއް ދެމުންނެވެ. އިސްރާއީލުން ދެމުންދާ ހަމަލާތައް އާންމުން ދިރިއުޅޭ އިމާރާތްތަކާއި ހޮސްޕިޓަލްތަކަށް ވެސް ވަނީ އަމާޒުކޮށްފައެވެ.

އިސްރާއީލުގެ އެ އުދުވާނީ ހަމަލާތަކުގެ ސަބަބުން މިހާތަނަށް 7000 އަށްވުރެ ގިނަ މީހުން ޝަހީދުވެފައި ވާއިރު، ޝަހީދުވެފައިވާ ފަލަސްތީނުގެ މީހުންގެ 40 ޕަސެންޓަކީ ހަނގުރާމާގައި އެއްވެސް ބައިވެރިވުމެއް ނެތް ކުޑަކުދިންކަމަށް ޣައްޒާގެ ހެލްތު މިނިސްޓްރީން ވަނީ ބުނެފައެވެ.

ކަންމިހެން ހުރި އިރު، މިރޭގެ ހަމަލާތަކަށް ފަހު އެ އަދަދު އެތަކެއް އިންސައްތަ މަތިވެގެން ދިޔުމަކީ އެކަށީގެންވާ ކަމެއް ކަމަށް މީޑިއާ ރިޕޯޓްތައް ބުނެއެވެ.