ހައްދުފަހަނައަޅާފައިވާ އިސްރާއީލުގެ ސިފައިން ފަލަސްތީނަށް ދެމުން ގެންދާ ހަމަލާތަކާއި ގުޅިގެން ހާލުގައި ޖެހިފައިވާ ރައްޔިތުންނަށް އެހީވުމަށް އިންޓަނޭޝަނަލް އެއިޑް ކެމްޕެއިން (އައިއޭސީ) ހުޅުވި ފަންޑަށް މިހާތަނަށް 23 މިލިއަނަށްވުރެ ގިނަ އަދަދަކަށް ފައިސާ ލިބިފައިވާ ކަމަށް އައިއޭސީން ބުނެފިއެވެ.

މިމަހުގެ ހަތްވަނަ ދުވަހު ފަލަސްތީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސްއިން އިސްރާއީލަށް ދިން ކުއްލި ހަމަލާތަކުގެ ސަބަބުން ބަދަލުހިފުމަށް ޔަހޫދީ އިސްރާއީލުން އަންނަނީ ޣައްޒާގެ އެކި ހިސާބުތަކަށް ހުއްޓުމެއް ނެތި ވަރުގަދަ ހަމަލާތަކެއް ދެމުންނެވެ. އިސްރާއީލުން ދެމުންދާ ހަމަލާތައް އާންމުން ދިރިއުޅޭ އިމާރާތްތަކާއި ހޮސްޕިޓަލްތަކަށް ވެސް ވަނީ އަމާޒުކޮށްފައެވެ.

އިސްރާއީލުގެ އެ އުދުވާނީ ހަމަލާތަކުގެ ސަބަބުން މިހާތަނަށް 7000 އަށްވުރެ ގިނަ މީހުން ޝަހީދުވެފައި ވާއިރު، ޝަހީދުވެފައިވާ ފަލަސްތީނުގެ މީހުންގެ 40 ޕަސެންޓަކީ ހަނގުރާމާގައި އެއްވެސް ބައިވެރިވުމެއް ނެތް ކުޑަކުދިންކަމަށް ޣައްޒާގެ ހެލްތު މިނިސްޓްރީން ވަނީ ބުނެފައެވެ. އަދި އެ ހަމަލާތަކުގައި އެތަކެއް ގެއެއް ސުންނާފަތިވެ އެތައް ހާސް ރައްޔިތުން ހާލުގައި ޖެހިފައިވާއިރު އައިއޭސީން ވަނީ އެ ފަރާތްތަކަށް ދިވެހިންގެ އެހީ ފޯރުކޮށްދިނުމަށް އެ ޖަމިއްޔާއިން ކުރަމުންދާ މަސައްކަތަށް އެހީވުމުގެ ފުރުސަތު ހުޅުވާލައިފައެވެ. 

Advertisement

އެއާއެކު މުޅި ދިވެހިރާއްޖެ އެއްކޮށް ފަލަސްތީނަށް އެހީވުމަށް އަތުގުޅާލައި ފަންޑު ހޯދުމުގެ މަސައްކަތް ފަށާފައިވާއިރު، ދިވެހިންގެ ފަރާތުން މިހާތަނަށް "ޣައްޒާ އެމަޖެންސީ ރިލީފް 2023" ފަންޑަށް 23،987،108 ރުފިޔާ އަދި 13،023 އެމެރިކާ ޑޮލަރު ލިބިފައިވާ ކަމަށް އައިއޭސީން ވަނީ ބުނެފައެވެ. 

އައިއޭސީން ވަނީ އިސްލާމީ އުއްމަތަށް ދިމާވާ ހުރިހާ ކަމެއްގައި ރައްޔިތުން ދެއްވާ އެހީ އަދި އެބޭފުޅުންނަށް ދެއްވާ އެއްބާރުލުމަށް ހުރިހާ ރައްޔިތުންނަށް ޝުކުރު ދަންނަވާފައެވެ.

ދިވެހިންގެ ފަރާތުން ލިބެމުންދާ އެ އެހީ، އައިއޭސީން އަންނަނީ ހުއްޓުމެއްނެތި ފަލަސްތީނުގެ ހާލުގައި ޖެހިފައިވާ ފަރާތްތަކަށް ފޯރު ކޮށްދެމުންނެވެ.