ހައްދުފަހަނައަޅާފައިވާ އިޒްރާއިލުގެ ޔަހޫދީ ސިފައިން، މެދުކެނޑުމެއް ނެތި ފަލަސްތީނަށް ދެމުންދާ ހަމަލާތަކިގައި ޝަހީދުކޮށްލި މީހުންގެ ޢަދަދު 8000 އިން މައްޗަށް އަރައިފިއެވެ.

ފަލަސްޠީނުގެ ހެލްތު މިނިސްޓްރީން މިއަދު އާއްމު ކޮށްފައިވާ މައުލޫމާތު ތަކުގައި ބުނެފައިވާ ގޮތުން، މި އޮކްޓޯބަރ މަހުގެ 7 ވަނަ ދުވަހުން ފެށިގެން ޒަޔަނިސްޓް ޔަހޫދީން ފަލަސްތީނަށް އަމާޒުކޮށް ދެމުންދާ ހަމަލާތަކުގައި މިހާތަނަށް 8000 އަށްވުރެ ގިނަ މީހުން ވަނީ ޝަހީދުވެފައެވެ. އަދި އޭގެ ތެރެއިންވެސް ދެބައި ކުޅަ އެއްބަޔަކީ ކުށެއް ނެތް މައުސޫމް ކުޑަ ކުޑަކުދިން ކަމަށް އެ މިނިސްޓްރީން ވަނީ ފާހަގަކޮށްފައެވެ.

މި އަދަދަކީ ޝަހީދުވެފައިވާކަން ކަށަވަރުވެފައިވާ މީހުންގެ އަދަދަށް ވާއިރު، އިމާރާތް ތަކުގެ ދަށުވެފައިވާ މީހުންނާއި ކުދިން ނެގެމުންދާ ވަރަކަށް ޝަހީދުވި މީހުންގެ އަދަދު އެތައް ގުނައެއް މަތިވެގެން ދާނެ ކަމަށް ލަފާކުރެވެއެވެ. 

ހެލްތު މިނިސްޓްރީން އިތުރަށް ބުނެފައިވާ ގޮތުގައި، ޣައްްޒާގެ ހާލަތު މިހާރުވަނީ ވަރަށް ބޮޑަށް ގޯސްވެފައެވެ. އަދި އެތަނުގެ ހޮސްޕިޓަލު ތަކުގައި މިވަގުތު ހުރި އެ އެމްބިއުލާންސްތައް އެންމެ ބޮޑަށް ހަލާކުވެ ގެއްލުންވެފައި ހުރި ސަރަހައްދު ތަކުގައި ބޭނުން ކުރަމުންދާ އިރު, އެ އެމްބިއުލާންސްތަކަށްވެސް ޔަހޫދީން އަންނަނީ ހުއްޓުވައި ހުރަސް އަޅަމުންނެވެ. އަދި ތެޔޮ ހުސްވަމުންދާތީ އެތަކެތި ދުއްވުމަށް ވަރަށް ބޮޑަށް ދަތިތަކާއި ކުރިމަތިވަމުންދާ ކަމަށް ބުނެފައިވެއެވެ. މިވަގުތު އެމްބިއުލެންސްތައް ދުއްވަމުން ދަނީ އާއްމުންގެ އެހީއާއެކު ލިބެމުންދާ ތެލުން ކަން ވެސް މިނިސްޓްރީން ފާހަގަކޮށްފައިވެއެވެ. 

ހެލްތު މިނިސްޓްރީން އިތުރަށް ބުނީ، ހުކުރު ދުވަހުގެރޭ މުވާސަލާތީ ޚިދުމަތްތައް މެދުކަނޑާލުމަށްފަހު ހަރުކަށި ޔަހޫދީން ދިން ވަރުގަދަ ހަމަލާތަކަށްފަހު، އަލުން މުވާސަލާތީ ޚިދުމަތްތައް ދޭން ފަށާފައިވާއިރު، ލިބެމުންދަނީ ވަރަށް ހިތްދަތި، އަދި ހިތް ނުތަނަވަސް ކުރުވާ ޚަބަރުތައް ކަމަށް އެ މިނިސްޓްރީން ވަނީ ބުނެފައެވެ. 

ހުކުރު ދުވަހުގެ ރޭގެ ހަމަލާތަކުގައި މީހުން ދިރިއުޅޭ 100 ޢިމާރާތެއް ބިމާއި ހަމަވެފައިވާ ކަމަށް ރިޕޯޓްތަކުން ވަނީ ބުނެފައެވެ.

ޣައްޒާއަށް އިސްރާއީލުން ދެމުން އަންނަ ހަމަލާތަކުގެ އިތުރުން އިންސާނިއްޔަތު ކަމެއް ނުބަހައްޓާ، ޣައްޒާގެ ރައްޔިތުންނަށް ބޯފެނާއި، އެހެނިހެން ތަކެތި ދިނުމަށް އިސްރާއީލުގެ ޔަހޫދީން ވަނީ ހުރަސް އަޅާފައެވެ.