އިސްރާއީލު ރަށްވެހިން ރާއްޖެ އެތެރެވުން ހުއްޓުވުމަށް ޕެޓިޝަނެއްގައި ސޮއިކުރަން ފަށައިފިއެވެ.

މި ޕެޓިޝަނަކީ "ރައިޓް މޫވްމަންޓުން" އިސްނަގައިގެން އިސްރާއީލުގެ ހައްދުފަހަނަ އަޅާފައިވާ ޔަހޫދީ ސަރުކާރުން ފަލަސްތީނު ނައްތާލުމަށް ކުރަމުންގެންދާ ލާއިންސާނީ އަމަލުތަކާއި ފަލަސްތީނުގެ ލޮބުވެތި އަހުންނާއި އުހްތުންނާ ދެކޮޅަށް ހިންގަމުންގެންދާ ލާއިންސާނީ އަމަލުތަކާއި ދެކޮޅަށް ދިވެހިން ތިބިކަން ހާމަކުރުމުގެ ގޮތުން އިސްރާއީލުގެ ރަށްވެހިން ރާއްޖެ އެތެރެކުރުން ހުއްޓުވުމަށް އެދި ހުށަހަޅާ ޕެޓިޝަނެކެވެ.

ރައިޓް މޫވްމަންޓުން ބުނެފައިވާ ގޮތުގައި މި ޕެޓިޝަންގައި ސޮއި ކުރުމުގެ މަސައްކަތް ރާއްޖޭގެ ހުރިހާ ސަރަހައްދެއްގައި ކުރިޔަށް ދާނެއެވެ. އަދި މި ޕެޓިޝަންގައި ސޮއި ކުރުމުގެ މަސައްކަތުގައި ރަށްރަށުގައި އިސްނަގައި މިހަރަކާތް އެރަށެއްގައި ހިންގުމަށް ބޭނުންވާ ފަރާތްތަކުން ފޯކަލް ޕޮއިންޓުންގެ ގޮތުގައި ބައިވެރިވުމަށް ވެސް އެ ޖަމިއްޔާ އިން ވަނީ އެދިފައެވެ. އެހެންކަމުން މިކަމުގައި ރައިޓް މޫވްމަންޓާއެކިީ މަސައްކަތް ކުރުމަށް ބޭނުންވާ ފަރާތްތަކުން ރައިޓް މޫވްމަންޓް ޕޭޖު މެދުވެރިކޮށް އެކަމަށް އެދުމަށް ވަނީ ބުނެފަ އެވެ. 

Advertisement

މީގެ އިތުރުން ރައިޓް މޫވްމަންޓް އިން ބުނީ، މާލޭގައި ޕެޓިޝަންގައި ސޮއިކުރުމަށް ބޭނުންވާ ފަރާތްތަކަށް ކޮންމެ ދުވަހަކުވެސް މާލޭގެ އެކި ސަރަހައްދުތަކުގައި ބަހައްޓާފައި ހުރި މޭޒުތަކުގައި އެއިންތިޒާމު ހަމަޖެހިފައިވާނެ ކަމަށާ، ސޮއި ކުރުމުގެ ހަރަކާތްތައް ކުރިޔަށްދާ ވަގުތު ރައިޓް މޫވްމަންޓުގެ ފޭސްބުކް ޕޭޖް މެދުވެރިކޮށް އެކަމުގެ މައުލޫމާތު ހިއްސާކުރަމުން ދާނެ ކަމަށެވެ.

ރައިޓް މޫވްމަންޓަކީ "ފަލަސްތީނާއެކު ދިވެހިން" މިނަމުގައި 2014 ވަނަ އަހަރު މާލޭގައި 22،000 އަށްވުރެން ގިނަ މީހުންނާއެކު ބޭއްވި ބޮޑު ހިނގާލުން އިންތިޒާމު ކުރި ޓީމުން އިސްނަގައިގެން ކުރިޔަށް ގެންދާ މޫވްމަންޓެކެވެ. ރައިޓް މޫވްމަންޓުން މިމަހުގެ 20 ވަނަ ދުވަހުވެސް ވަނީ މާލޭގައި ބޮޑު ހިނގާލުމެއް ބާއްވާފައެވެ. އެ ހިނގާލުން ކުރިޔަށް ގެންގޮސްފައިވަނީ ރަސްފަންނުން ފަށައިގެން މަޖީދީ މަގުން ގޮސް ހެންވޭރު ދަނޑަށް ނިންމާފައެވެ. އެހިނގާލުން ނިންމާލާފައިވަނީ ހާއްސަ ދުއާ އަކުންނެވެ.