ކުރީގެ ރައީސް އަބްދުالله ޔާމިން އަބްދުލްގައްޔޫމްގެ ބަންދަށް އިތުރު ލުއި ދިނުމަށް އެމަނިކުފާނާ ކަރެކްޝަނާ ދެމެދު ވެފައިވާ އިގުރާރާ އެމަނިކުފާނު ހިލާފުވެވަޑައިގަންނަވާނަަމަ، ފިޔަވަޅު އަޅާނެކަމަށް ކަރެކްޝަނުން ބުނެފިއެވެ.
ވ އާރަށް ކުއްޔަށް ދިނުމުގައި މަނީ ލޯންޑަރިންނާއި ރިޝްވަތުގެ އަމަލު ހިންގާފައިވާ ކަމުގެ ކުށް ސާބިތުވެ ރައީސް ޔާމީން 11 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކުރީ ނިމިދިޔަ ޑިސެމްބަރު މަހުގެ ތެރޭގައެވެ.
ނަމަވެސް އިމްތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެދިލެއްވުމަށް މި މައްސަލައިގައި ކޮށްފައިވާ ޖަލު ހުކުމް ލުއިކޮށް ގޭބަންދަށް ބަދަލު ކުރުމަށްފަހު، މިހާރު ވަނީ އެމަނިކުފާނަށް އިތުރު ލުއިތަކެއް ވެސް ކަރެކްޝަނުން ދީފައެވެ.
އެގޮތުން ލުއި ދިނުމާއިއެކު ރޭގެ ވަގުތެއްގައި ރައީސް ޔާމީން ވަނީ އެމަނިކުފާނުގެ ސަޕޯޓަރުންނާ ބައްދަލުކުރެއްވުމަށް ހަރުގެއަށް ވަޑައިގެންފައެވެ.
އެކަމާއި ގުޅިގެން ގިނަ ބައެއްގެ ފާޑުކިޔުންތައް އަމާޒުވަމުންދާއިރު، އެ މައްސަލާގައި "ވޮއިސް" އަށް މައުލޫމާތު ދެއްވަމުން ކަރެކްޝަންސްގެ މީޑިއާ އޮފިޝަލް ވިދާޅުވީ، ރައީސް ޔާމީންގެ ފަރާތުން ބޭސްފަރުވާ އާއި ކަސްރަތުކުރުމަށް އިތުރު ލުއި ތަކެއް ދިނުމަށް އެ އިދާރާގައި އެދުމާއި ގުޅިގެން އެ ފުރުސަތު އެމަނިކުފާނަށް ދެއްވާފައިވާ ކަމަށެވެ. އަދި އޭގެ އިތުރުން, އެމަނިކުފާނު ކޮންމެހެން ބައްދަލުކުރެއްވުމަށް އެދޭ ފަރާތްތަކާ ބައްދަލުކުރެއްވުމުގެ ފުރުސަތު ވެސް ދެއްވާފައި ވާނެ ކަމަށާ އެ އެގޮތުން ބައްދަލު ކުރެވޭނީ ކަރެކްޝަންސްގައި ދެންނެވުމަށް ފަހުގައި ކަމަށްވެސް އެ އިދާރާއިން ބުނެފައިވެއެވެ.
"އޭގެ އިތުރުން ކުރުން މަނާ ކަންތައް ތަކެއްވެސް އިގުރާރުގައި ހިމެނިފައި ވާނެ. ވީމާ މި ސާވިސް އިން މިގެންދަނީ ރައީސް ޔާމީންގެ އަމަލުތައް މޮނީޓަރ ކުރަމުން. އިގުރާރާ ޚިލާފްވާނަމަ ފިޔަވަޅު އަޅާނެކަމުގައި ދަންނަވާފައިވާނެ." ކަރެކްޝަންސްގެ އޮފިޝަލް "ވޮއިސް" އަށް މައުލޫމާތު ދެއްވަމުން ވިދާޅުވި އެވެ.
ރައީސް ޔާމިން ރޭ ސަޕޯޓަރުންނާ ބައްދަލުކުރައްވައި ވަނީ ގިނަ ކަންތަތަކަކާ ވާހަކަ ދައްކަވައި މަޝްވަރާ ކުރައްވާއިފައެވެ. އެގޮތުން ރައީސް ޔާމިން ވިދާޅުވެފައިވަނީ ޕީއެންސީ އަދި ޕީޕީއެމްއަކީ އެއް ފިކުރެއްގެ ދެ ޕާޓީކަމަށެވެ. އަދި ޕީޕީއެމް ދޫކޮށް އެއްވެސް މެންބަރަކު ޕީއެންސީއާ ގުޅެން ނުޖެހޭނެކަމަށެވެ. އަދި ކުރިއަށް އޮތް މަޖިލިސް އިންތިޚާބުވެސް އެ ދެޕާޓީއަށް ކާމިޔާބު ވުމަކީ މުހިންމު ކަމެއް ކަމުގައި އެމަނިކުފާނު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
