އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމުގެ މަސްއޫލިއްޔަތުތަކާއި ހަވާލުވެ ވަޑައިގެންނެވުމަށްފަހު އެންމެ ފުރަތަމަވެސް ކުރައްވަންޖެހޭ މުހިންމު ދެ މަސައްކަތް، ކުރީގެ ރައީސް އަދި ޕީޕީއެމްގެ ލީޑަރ އަބްދުالله ޔާމީން އަބްދުލްގައްޔޫމް ވިދާޅުވެދެއްވައިފިއެވެ.
ރައީސް ޔާމީން ރަށު ބަންދަށް ބަދަލުކުރެއްވުމަށްފަހު ބޭއްވި ފުރަތަމަ ޖަގަހަ ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ، ޕީޕީއެމް-ޕީއެންސީގެ ކެންޑިޑޭޓް ޑރ. މުޢިއްޒަށް ރިޔާސީ އިންތިހާބުގައި ދިވެހި ރައްޔިތުން ވޯޓު ދެއްވީ އެމަނިކުފާނު ރައްޔިތުންނަށް ވެވަޑައިގެންނެވި ވަޢުދުތަކުގެ މައްޗަށް ބިނާކުރައްވައި ކަމަށެވެ. އަދި އެ ވަޢުދު ތަކުގެ ތެރެއިންވެސް އެންމެ ފުރަތަމަ ފުއްދަވަންޖެހޭ ވަޢުދަކީ، ނިމިގެން މިދާ ސަރުކާރުން ހެދި ގޯސްތައް ތަހުގީގުކޮށް، އެކަންކަން ރަނގަޅު ކުރުން ކަމަށް ޔާމީން ވިދާޅުވި އެވެ.
އަޅުގަނޑުމެން މިހުރިހާ ވާހަކައެއް ދައްކާފައި، ދިވެހިރައްޔިތުންގެ އިތުބާރު ހޯދައިގެން އެއަށް ދިން ވޯޓެއް، ޑރ. މުޢިއްޒަށް ލިބުނު ވޯޓަކީ. އަޅުގަނޑުމެންނަށް ދިވެހި ރައްޔިތުން ދެއްވި ވޯޓަކީ. އެއީ އަމާނާތެއް. އެ އަމާނާތް އަޅުގަނޑުމެން ދަމަހައްޓަށް ޖެހޭނެ. ރެސިޕްރޮކޭޓް ކުރަންޖެހޭނެ. ރެސިޕްރޮކޭޓް ކުރުމަކީ އެމީހުން އަޅުގަނޑުމެން ދެއްކި ވާހަކައިން އަޅުގަނޑުމެންނަށް ދިން ވޯޓަށް އަމަލު ކުރުން. އެހެންވީމާ މި ހިނގައިދިޔަ ގޯސްތައް ހިނގީ ކީއްވެތޯ އެންމެ ފުރަތަަމަ ކުރަންޖެހޭ ކަމަކީ ތަހުގީގު ކުރުން. ތަހުގީގު ކޮށްފައި އަޅުގަނޑުމެންގެ ސަރަހައްދު ހޯދަން މަސައްކަތް ކުރަންވާނެ. އަދި އިންޑިޔާ އާ އެކީ ރަހުމަތްތެރި ވާހަކަތަކެއް ދައްކައިގެން މުައްދަތު ތަކެއް ކަނޑައަޅައިގެން އެބަޖެހޭ އިންޑިއާ ސިފައިން ރާއްޖެއިން ފައިބަން. މި ފަސް އަހަރު ތެރޭގެ ބޮޑު ބައި ނުދަނީސް އިންޑިޔާ އަސްކަރިއްޔާ ރާއްޖެއިން ފައިބަން ވާނެ.
ރައީސް ޔާމީން އަބްދުލްގައްޔޫމް
ރައީސް ޔާމީން ވިދާޅުވީ ކޮރަޕްޝަނާ އެނޫންވެސް ރާއްޖޭގެ އިގްތިސާދު ކުރިއެރުވުން ފަދަ ކަންކަމަކީ ކުރެވޭނެ ކަންކަން ކަމަށާ، އެކަން ކަން ކުރަންވެސް ޖެހޭ ކަމަށެވެ.
އެހެން ނަމަވެސް، އެކަން ކަމަށްވުރެ މުހިންމީ ރާއްޖޭގެ ސަރަހައްދު ގެއްލުނު މައްސަލަ އާއި، އިންޑިޔާ ސިފައިން ރާއްޖޭގައި ތިބި މައްސަލަ ކަމަށާ އެ ދެ މައްސަލާގައި އެއްގޮތަކަށް ވެސް "ކޮންޕްރޮމައިޒް" ނުކުރެވޭނެ ކަމަށެވެ. އަދި އެ ދެ މައްސަލަ އައު ސަރުކާރުން ހައްލު ކުރެއްވުމުން އެމަނިކުފާނަށް "ފުދޭ" ކަމަށް ވިދާޅުވި އެވެ. އަދި އެކަން ކުރެވިއްޖެ ނަމަ ދިވެހިރައްޔިތުން ވެސް އެމަނިކުފާނަށް "ފާސް މާކުސް" ދޭނެ ކަމަށް ޔާމީން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
