ހައްދުފަހަނައަޅާފައިވާ ޔަހޫދީން ފަލަސްޠީނުގައި ހިންގަމުންދާ ޢުދުވާނުތަކާއި ގުޅިގެން، އިޒްރޭލާއި ސިޔާސީ ގުޅުން ކަނޑާލަން ބޮލީވިއާއިން ނިންމައިފިއެވެ.

އިއްޔެ ބޭއްވި ނޫސްވެރިންގެ ބައްދަލުވުމެއްގައި، ބޮލީވިއާއިން އިޒްރޭލާއި ގުޅުން ކަނޑައިލިކަން ހާމަކޮށް އެގައުމުގެ ފޮރިން މިނިސްޓްރީގެ ޑެޕިއުޓީ މިނިސްޓަރު ފްރެޑީ މާނީ ވިދާޅުވީ ބޮލީވިއާ އިން އެ ނިންމުން ނިންމީ އިސްރާއީލުގެ އަސްކަރީ ހަރުކަށި ހަމަލާތައް ކުށްވެރިކުރުމުގެ ގޮތުން ކަމަށާއި މިކަމަކީ ބައިނަލްއަގުވާމީ ސުލްހަ އާއި ސަލާމަތަށް އޮތް ނުރައްކަލެއް ކަަމަށެވެ. 

މި ނިންމުމާއިއެކު، ބޮލީވިއާ ވެފައި ވަނީ މިފަހަރުގެ ޤަތުލުއާއްމާއި ގުޅިގެން އިޒްރޭލާއި އޮންނަ ސިޔާސީ ގުޅުން ކަނޑައިލި ފުރަތަމަ ޤައުމަށެވެ.

Advertisement

އެ ޤައުމުގެ ކުރީގެ ރައީސް އީވޯ މޮރޭލްސް، ވަނީ އިޒްރޭލަކީ ނިރުބަވެރި ދަޢުލަތެއް ކަމަށް ނިންމަން، މިހާރުގެ ސަރުކާރަށް ގޮވާލައްވައިފައެވެ.

2009 ވަނަ އަހަރު ޣައްޒާއަށް ދިން ހަމަލާތަކާ ދެކޮޅަށް ބޮލީވިއާއިން އިސްރާއީލާއެކު ސިޔާސީ ގުޅުން ކަނޑާލިއެވެ. ނަމަވެސް 2020 ވަނަ އަހަރު އެ ގުޅުން އަލުން ގާއިމުކުރީ ރައީސް ޖެނީން އަނޭޒްގެ ވެރިކަމުގައެވެ.

ބޮލީވިއާއިން އިސްރާއީލާ ސިޔާސީ ގުޅުން ކަނޑާލާފައި ވާއިރު، ޗިލީ އާއި ކޮލޮމްބިއާއިންވެސް ވަނީ އިސްރާއީލުގެ ހަރުކަށި ޢަމަލުތައް ކުށްވެރިކޮށް އިސްރާއީލް ސިފައިން ފަލަސްތީނުގައި ހިންގަމުންދާ ގަތުލު ޢާއްމު ހުއްޓާލައި ޢައްޒާއަށް އެހީ ފޯރުކޮށްދިނުމަށް ގޮވާލާފައެވެ. 

އިޒްރާއިލްގެ މިފަހުން ދޭން ފެށި ހަމަލާތަކުގެ ސަބަބުން މިހާތަނަށް 8500 މީހުން ޝަހީދުވެފައިވާއިރު އޭގެ ތެރެއިން 3500 އަށްވުރެ ގިނަ ޝަހީދުންނަކީ ކުޑަކުދިންނެވެ. 2200 އަށްވުރެ ގިނަ ޝަހީދުންނަކީ އަންހެނުންނެވެ.