އިންތިޚާބީ ރައީސް ޑރ މުހައްމަދު މުއިއްޒު އަކީ އަވަށްޓެރި އިންޑިޔާއާ ދެކޮޅު ބޭފުޅެއްގެ ގޮތުގައި ސިފަކުރާ ސިފަ ކުރުމަކީ ރަނގަޅު ސިފަކުރުމެއް ނޫން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

ރައީސް ނަޝީދު ވިދާޅުވި ގޮތުގައި، ޑރ. މުޢިއްޒު ރިޔާސީ އިންތިޚާބު ކާމިޔާބު ކުރެއްވުމާއި ގުޅިގެން ބޭރުގެ ގިނަ މީޑިއާ ތަކުން އެމަނިކުފާނު ސިފަ ކުރެއްވީ "ޕްރޯ-ޗައިނާ" ކެންޑިޑޭޓެއްގެ ގޮތުގައި ކަމަށެވެ. އަދި އިންތިޚާބުން ވަކިވެވަޑައިގެންނެވި ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަކީ "ޕްރޯ އިންޑިއާ" ކެންޑިޑޭޓެއް ކަމަށްވެސް ބޭރުގެ މީޑިއާތަކުން ބުނެފައިވާ ކަން ނަޝީދު ފާހަގަކުރެއްވިއެވެ. 

ނަޝީދު އިތުރަށް ވިދާޅުވީ އެމަނިކުފާނާއި ރަހުމަތްތެރި ބޭރުގެ ނޫސްވެރިއެއް ވެސް އެ މޭރުމުން ވާހަކަ ދެއްކެވުމުން އެކަން ގަބޫލު ނުކުރައްވާ ކަމަށް ވިދާޅުވި ކަމަށެވެ. 

ނަޝީދު ވިދާޅުވީ، އެމަނިކުފާނު ގަބޫލު ކުރައްވާ ގޮތުގައި ޑރ.މުއިއްޒު އިސްކަން ދެއްވާނީ ދިވެހިންނަށާއި ދިވެހީންގެ ހާލަތު ރަނގަޅު ކުރައްވައި ރާއްޖެއަށް ކުރިއެރުން ހޯއްދަވައި ދެއްވުމަށް ކަމަށެވެ. އަދި ރާއްޖޭގައި ވެރިކަން ކުރައްވާ ކޮންމެ ވެރިއެއްވެސް މަސައްކަތް ކުރައްވާނީ އެ މޭރުމުން ދިވެހިންނަށް އިސްކަންދެއްވައިގެން ކަމަށް ނަޝީދު ވިދާޅުވި އެވެ. 

މީގެތެރެއިން، ނަޝީދު ވިދާޅުވީ، ކުރީގެ ރައީސް، އަބްދުالله ޔާމީން އަބްދުލްގައްޔޫމް ގެންގުޅުއްވި ޚާރިޖީ ސިޔާސަތަކީ ބޮޑަށް ޗައިނާގެ ކޮޅަށް ބުރަވެފައި އޮތް ސިޔާސަތެއް ކަމަށެވެެ. 

އެހެންނަމަވެސް، ޑރ. މުޢިއްޒުގެ ސިޔާސަތަކީ ސްރީލަންކާ އާއި އިންޑިއާވެސް ހިމެނޭހެން އޭޝިޔާގެ ހުރިހާ ގައުމުތަކަށް،  އިސްކަންދެއްވާނެ، ސިޔާސަތެއް ކަމަށް ގަބޫލު ކުރައްވާ ކަމަށް ނަޝީދު ވިދާޅުވި އެވެ.