ހުވާކުރައްވާތާ ދެތިން މަސްތެރޭ ފައްޓަވާނެކަމަށް އިންތިޚާބީ ރައީސް ޑރ މުހައްމަދު މުއިއްޒު ވައުދުވެވަޑައިގެންނެވި ފުށިދިއްގަރުފަޅު މަޝްރޫއަށް އަންނަ އަހަރަށް ލަފާކޮސް ދައުލަތުން ހުށައަޅާ ބަޖެޓުގައި 600 މިލިއަން ރުފިޔާ ހިމަނުއްވައިފި އެވެ. 

2024 ވަނަ އަހަރުގެ ބަޖެޓުގައި ޕީއެސްއައިޕީ މަޝްރޫއުތަކަށް 8.6 ބިލިއަން ރުފިޔާ ހިމަނާފައިވާއިރު، އިންތިޚާބީ ސަރުކާރުން ހިމަނާފައިވާ މުހިންމު މަޝްރޫއުތަކުގެ ތެރޭގައި ފުށިދިއްގަރު ފަޅު ހިއްކުމުގެ މަޝްރޫއު ވަނީ ހިމަނާފަ އެވެ. 

ފުށިދިއްގަރުފަޅު މަޝްރޫއަކީ މާލެ ސަރަހައްދުގައި ދިރިއުޅޭ 65000 މީހުންނަށް ބޯހިޔާވަހިކަން ފޯރުކޮށްދިނުމަށްޓަކައި ޑރ މުއިއްޒުގެ ސަރުކާރުން މާލެ ސަރަހައްދުގައި ހިންގާނެ އެންމެ ބޮޑު މަޝްރޫއުކަން ފާހަގަކޮށްލެވެއެވެ. 

Advertisement

އެ މަޝްރޫއަށް ފުށިދިއްގަރުފަޅުން 1282 ހެކްޓަރު ހިއްކުމަށް ވަނީ ނިންމާފައެވެ. އެއީ ބޮޑު މިނަށް ބަލާއިރު އެއީ ހުޅުމާލެ ދެ ފިޔަވަހި އެއްކޮށްލީމަ ވާ ވަރަށްވުރެ ތިން ގުނަ ބޮޑު ސަރަހައްދެކެވެ. 

ހުޅުމާލޭ ފުރަތަމަ ފިޔަވަހީގެ ރައްޔިތުންނާއި ބައްދަލުކުރައްވާ ވާހަކަދައްކަވަމުން ޑރ މުއިއްޒު ވިދާޅުވީ އެމަނިކުފާނު ވެރިކަމަށް ހުވާކުރައްވާތާ ދެތިން މަސްތެރޭގައި ފުށިދިއްގަރުފަޅު ހިއްކުމުގެ އަމަލީ މަސައްކަތް ފައްޓަވާނެ ކަމަށެވެ.

އެ ބިން ހިއްކުމަށްފަހު ސޭފް އައިލެންޑެއްގެ ގޮތުގައި ރައްކާތެރިކުރެވި ބޯހިޔާވަހިކަމުގެ މަޝްރޫއުތައް އެތަނުގައި ފައްޓަވާދެއްވާނެ ކަމަށާއި، މަސައްކަތް ފަށާ ފުރަތަމަ އަހަރުތެރޭ ބިން ހިއްކުމުގެ މަސައްކަތް ނިންމާލުމަކީ ސަރުކާރުގެ އަމާޒުކަމަށް ޑރ މުއިއްޒު ވިދާޅުވި އެވެ. 

އޭގެ އިތުރުން އެ މަޝްރޫއު މުޅިން ނިމި، ސަރުކާރުގެ ސިޔާސަތު ތަންފީޒުކުރެވެން ފެށުމާއެކު މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ ބޮޑުތަނުން ހައްލުވެގެންދާނެ ކަމަށް ގަބޫލުފުޅު ކުރައްވާކަމަށް ވެސް ޑރ މުއިއްޒު ވަނީ ވިދާޅުވެފަ އެވެ.