ހައްދުފަހަނައަޅާފައިވާ އިސްރާއީލުގެ ސިފައިން ފަލަސްތީނުގައި ހިންގަމުންދާ ޢުދުވާނުތަކާއި ދެކޮޅަށް ޖިހާދު ކުރުމަށް ފަލަސްތީނުގެ ވަށައިގެންވާ މުސްލިމު 4 ގައުމު ތަކުގެ އަސްކަރީ ފައުޖުތައް ފަލަސްޠީނަށް ފޮނުވުމަކީ ޝަރުޢީ ވާޖިބެއް ކަމަށް ބުނެ ފަތުވާ ނެރެފިއެވެ. 

މި ފަތުވާ ނެރެފައި ވަނީ، ދުނިޔޭގެ އެކި ގައުމުތަކުގައި ތިބި މުސްލިމު ދީނީ ޢިލްމުވެރިން ގުޅިގެން އުފައްދާފައި ޖަމިއްޔާ އެއް ކަމަށްވާ އިންޓަނޭޝަނަލް ޔޫނިއަން އޮފް މުސްލިމް ސްކޯލާސް އިންނެވެ. 

އެގޮތުން އެ ޔޫނިއަން އިން އިއްޔެ ބޭއްވި ބައްދަލުވުމަކަށް ފަހު، ކުރިއަށް ގެންދިޔަ ނޫސްވެރިންގެ ބައްދަލުވުމުގައި، ޔޫނިއަންގައި ހިމެނޭ ޢިލްމު ވެރިން ވަނީ، މައިގަނޑު ތިން ކަމެއް ފާހަގަކުރައްވާފައެވެ. 

Advertisement

އެގޮތުން ފާހަގަކުރެއްވި ފުރަތަަމަ ކަމަކީ، ފަލަސްޠީނުގެ ސަރުކާރާއި، އެ ސަރުކާރުގެ ރަސްމީ އަސްކަރިއްޔާގެ ސިފައިން، އިސްރާއީލާ ފަލަސްތީނާއި ދެމެދު ކުރިއަށްދާ ހަނގުރާމައިގެ ތެރެއަށް ވަދެ، ޣައްޒާގެ ތަންތަން ސުންނާފަތިކުރަމަށް ދެމުންދާ ހަމަލާ ތަކާއި އެތަނުގައި ހިނގަމުންދާ ގަތުލު ޢާއްމު ހުއްޓުވަން މަސައްކަތް ކުރަންޖެހޭ ކަމަށެވެ. 

ދެވަނަ ކަމަކަށް އެ ޔޫނިއަންގެ އިލްމުވެރިން ވިދާޅުވީ، ފަލަސްޠީނާއީ ޣައްޒާ، އަށް އަޅާނުލައި އެތަން ގެއްލި ހަލާކުވެދާން ދޫކޮށްލުމަކީ މާތް الله އެކަލާނގެ ރަސޫލާ ޞައްލައްالله ޢަލައިހި ވަސައްލަމް އަށް ވެސް ވެވޭ ބޮޑު ޚިޔާނާތެއް ކަމަާ، އަދި އެއީ ބޮޑުވެގެންވާ ފާފައެއް ކަމަށެވެ. 

މީގެ އިތުރުން، ފަލަސްޠީނުގެ ވަށައިގެންވާ މުސްލިމު 4 ގައުމު ކަމުގައިވާ، ލުބުނާނާއި، ސީރިޔާ އާއި، މިސްރު އަދި ޖޯޑަން އިން، ފަލަސްޠީނަށް އެހީވާން އެ ގައުމު ތަކުގެ އަސްކަރިއްޔާ ފޮނުވުމަކީ ޝަރުޢީ ގޮތުން ވާޖިބެއް ކަމަށް ވެސް ޢިލްމުވެރިން ވަނީ ފާހަގަކުރައްވާފައެވެ. 

އިންޓަނޭޝަނަލް ޔޫނިއަން އޮފް މުސްލިމް ސްކޯލާސް އިން މިފަދަ ފަތުވާއެއް ނެރެފައިވާއިރު، ހައްދުފަހަނައަޅާފައިވާ އިސްރާއީލުގެ ސިފައިން 7 އޮކްޓޫބަރުގައި ޣަައްޒާއަށް ދޭން ފެށި ހަމަލާތަކުގައި މިހާތަނަށް 8805 މީހަކު ވަނީ ޝަހީދުވެފައެވެ. އޭގެތެރޭގައިވެސް ގިނައީ މައުސޫމް ކުދިންނާއި އަންހެނުންނެވެ. 

މި ހަނގުރާމަ ނިމުމުގެ ކޮޅުމަތިވެސް ފެންނަން ނެތް އިރު އިސްރާއީލުން އަންނަނީ ހުޅަނގުގެ ގައުމު ތަކުގެ އެހީއާއެކު އެމީހުންގެ އަސްކަރިއްޔާ ވަރުގަދަކޮށް ފަލަސްޠީނުގެ އެކި ސަރަހައްދު ތަކަށް ހުއްޓުމެއްނެތި ބޮން އަޅަމުންނެވެ. އެ ހަމާލާތައް ހޮސްޕިޓާ ތަކާއި ސުކޫލް ތަކާއި ރެފިޔުޖީ ކޭންޕު ތަކަށް ވެސް އެމީހުން އަންނަނީ އަމާޒުކުރަމުންނެވެ.