ގިނަ މީހުން އެމީހުންނަށް ލިބޭ ހުސްވަގުތާއި، ދުޅަހެޔޮ ސިއްހަތުގެ ބޭނުން ކުރަނީ ބޭކާރު ކަންކަން ކުރުމުގައި ކަމަށް މިއަދުގެ ޚުތުބާގައި ބުނެފިއެވެ.
"ބަލިމީހާއަށް ޒިޔާރަތްކުރުން" މި މައުޟޫއަށް މިއަދު އިއްވި ޚުތުބާގައި ބުނީ، ކޮންމެ މުސްލިމަކު އަނެއް މުސްލިމަށް އަދާކުރަންޖެހޭ ޙައްޤުތަކެއް ވާކަމަށެވެ.
"މި ފަދަ ބައެއް ޙައްގުތައް ބަޔާންކޮށް ދެއްވައި ރަސޫލާ ހަދީޘް ކުރައްވާފައިވާ ބަސްފުޅެއްގެ މާނައިގައިވެއެވެ. "ކޮންމެ މުސްލިމަކު އަނެއް މުސްލިމާއަށް އަދާ ކޮށްދޭންޖެހޭ 6 ހައްގެއް ވެއެވެ. ދެންނެވުނެވެ. اللهގެ ރަސޫލާ އެވެ. އެއީ ކޮން ޙައްގުތަކެއްތޯއެވެ؟ ހަދީޘް ކުރެއްވި އެވެ. "އެއީ އޭނާއާ ބައްދަލުވެއްޖެނަމަ އޭނާއަށް ސަލާމް ގޮވައިލުމާއި، އޭނާއަށް ދަޢުވަތު ދީފިނަމަ އިޖާބަދިނުމާއި، ނަސޭޙަތަކަށް އެދިއްޖެނަމަ ނަސޭހަތް ދިނުމާއި، ކިބިއްސެއް އަޅައި الله އަށް ހަމްދުކޮށްފިނަމަ، އޭނާއަށް ރަހުމަތްލެއްވުން އެދި ދުޢާ ކުރުމާއި، އޭނާ ބަލިވެއްޖެނަމަ އޭނާއަށް ގޮވާލަން ދިޔުމާއި އޭނާ މަރުވެއްޖެނަމަ އޭނާގެ ޖަނާޒާގައި ބައިވެރިވުމެވެ."" ޚުތުބާގައި ބުނެފައިވެއެވެ.
މިއާއެކު ޚުތުބާގައި ބުނީ، ބަލިމީހާއަށް ގޮވައިލަން ދިޔުމުގެ މާތްކަމާއި، ޘަވާބާއި ގުޅޭގޮތުން ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރައްވާފައިވާ އިތުރު ބައެއް ބަސްފުޅުތަކުގެ މައްޗަށްވެސް އަލިއަޅުވާލައްވާފައެވެ.
"ބަލި މީހަކަށް ގޮވައިލަން ހަވީރުގެ ވަގުތެއްގައި މީހަކު ދިޔަ ނަމަ، އެމީހަކަށް ފާފަފުއްސަވައި ދެއްވުމަށް އެދި، ހަތްދިހަ ހާސް މަލާއިކަތުން ހެނދުނު ވަންދެން ދުޢާ ކުރައްވާނެތެވެ. އަދި ބަލި މީހަކަށް ގޮވައިލަން ހެނދުނުގެ ވަގުތެއްގައި މިހާކު ދިޔަ ނަމަ، އެމީހަކަށް ފާފަފުއްސަވައިދެއްވުމަށް އެދި، ހަތްދިހަ ހާސް މަލާއިކަތުން ހަވީރު ވަންދެން ދުޢާ ކުރައްވާނެތެވެ. އެމީހަކު ހުންނާނީ ސުވަރުގޭގެ ބަގީޗާތަކުގައެވެ." ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނީ، ސިއްޙަތާއި ދުޅަހެޔޮކަމަކީ، މާތް الله ދެއްވާފައިވާ އަގު ބޮޑު ނިޢުމަތެއް ކަމަށެވެ. އެހެންނަމަވެސް، ރަސޫލާ ޞައްލައްالله ޢަލައިހި ވަސައްލަމްގެ ހަދީޘްފުޅުގައި ވާފަދައިން ސިއްހަތާއި ހުސްވަގުތަކީ ވަރަށް ގިނަ މީހުން އެ ނިޢުމަތާއި މެދު ފަރުވާ ކުޑަ ކޮށްލާ ދެ ނިޢުމަތް ކަމަށް ޚުތުބާގައި ބުންޏެވެ.
"ވަރަށް ގިނަބަޔަކު އެމީހުންގެ ސިއްޙަތުންނާއި ހުސް ވަގުތުން ފައިދާ ނުހޯދައެވެ. އެމީހުން ސިއްޙަތާއި ހުސް ވަގުތު ލިބިފައި ވިޔަސް، ފައިދާ ހުރި ކަންކަމުގައި އެ ނިޢުމަތްތަކުގެ ބޭނުމެއް ނުކުރެއެވެ. الله ގެ ހަޟުރަތަށް ކުއްތަންވުމަށްޓަކައި ސިއްޙަތާއި ވަގުތުތައް ބޭނުން ކުރުމުގެ ބަދަލުގައި، ސިއްޙަތާއި ވަގުތުގެ ބޭނުންކުރަނީ ބޭކާރު ކަންކަމުގައެވެ. ދީނަށާއި، ވަތަނަށާއި، އެމީހުންގެ ޢާއިލާތަކަށް މަންފާއެއް ނެތް ކަންކަމުގައެވެ."
ހުކުރު ޚުތުބާ
މީގެ އިތުރުން ޚުތުބާގައި ވަނީ، ބަލިމީހުންނަށް ގޮވައިލަން ދިޔުމުގެ މާތް ކަމާއި، އެކަމުން ލިބޭ ޘަވާބާއި އަދި އެމީހުންނަށްޓަކައި ހެޔޮ ދުޢާ ކުރުމުގެ މުހިންމު ކަމުގެ މައްޗަށް އަލިއަޅުއްވާލައްވާފައެވެ. އެގޮތުން ބަލި މީހާއަށް ގޮވާލަން ގޮސް ހޭދަކުރެވޭ ވަގުތު ކޮޅަކީ މާތް الله ގެ ހަޟުރަތުގައި ހޭދަކުރެވޭ ވަގުތު ކޮޅެއް ކަމަށާށ އެވަގުތުގައި އެމީހެއްގެ އަމިއްލަ ނަފްސާއި ބަލިމީހާގެ ފާފަފުއްސެވުން އެދި ދުޢާ ކުރުމަށް ޚުތުބާގައި ވަނީ ނަސޭހަތްތެރިވެފައެވެ.
Advertisement
This content is created and paid for by advertisers and does not involve Voice Journalists
