ފަލަސްޠީން ރައްޔިތުން އަތުން ގަދަކަމުން ބިން ފޭރިގަނެގެން އެތަނުގައި ވަޒަންވެރިގެން ތިބި ޒަޔަނިސްޓް ޔަހޫދީން ފަލަސްތީނުގެ ނަސްލު ނައްތާލުމަށް ހިންގަމުންދާ ޖަރީމާ ތަކުގައި ޝަހީދުވަމުންދާ މީހުންގެ އަދަދު މައްޗަށް ގޮސް ގަބުރުސްތާނުތައް ފުރިއްޖެ އެވެ. 

ޣައްޒާގެ ޚަބަރުތައް ގެނެސްދެމުންދާ މީޑިއާތަކުން މަޢުލޫމާތު ދީފައިވާ ގޮތުގައި، މި އޮކްޓޯބަރ 7 ވަނަ ދުވަހުން ފެށިގެން ހައްދުފަހަނައަޅާފައިވާ އިސްރާއީލުގެ ސިފައިން ޣައްޒާއަށް ބޮން އަޅައި ދެމުންދާ ވަރުގަދަ ހަމަލާތަކުގައި މިހާތަނަށް ޝަހީދުވި މީހުންގެ އަދަދު 10,000 އާއި ގާތް ކުރަން ވަނީ ވެފައެވެ. 

ޣައްޒާގެ ޝަހީދުވެފައިވާ ބައެއް މީހުންގެ ހަށިތައް ގަބުރުސްތާން ބޭރުގައި ވަޅުލަނީ--

އަދި އެއްފަހަރާ އެތަކެއް ކުޑަކުދިންނާއި އަންހެނުން ހިމެނޭހެން މުސްލިމުން ޝަހީދުވަމުންދާއިރު، އެ މީހުން ވަޅުލާން ހުރި ގަބުރުސްތާނު ފުރިގެން، މިހާރު ހަށިތައް ވަޅުލަމުންދަނީ ގަބުރުސްތާނު ކައިރީގައި ވަޅުލެވެން ހުރި ތަން ތަނުގައި އެންމެ އެކުއެކީ ފިތިބާރުކޮށް ބަހަށްޓައިގެންނެވެ. 

ޣައްޒާގެ ޝަހީދުވެފައިވާ ބައެއް މީހުންގެ ހަށިތައް ގަބުރުސްތާން ބޭރުގައި ވަޅުލަނީ--

މިދިޔަ މަހުގެ 7 ވަނަ ދުވަހު ފަލަސްތީނުގެ މިނިވަން ކަމަށް މަސައްކަތް ކުރާ ހަމާސް ޖަމާއަތުގެ މުޖާހިދުން ނިރުބަވެރި އިސްރާއީލުގެ ސިފައިންނަށް ދޭން ފެށި ހަނގުރާމައަށް 28 ދުވަސް ވެގެން ގޮސްފައިވާއިރު، އެމީހުންގެ ހަމަލާތައް ގިނައިން އަމާޒުވެފައިވަނީ ފަލަސްޠީނުގެ އާއްމުން އެންމެ ގިނަ ތަންތަނަށެވެ. 

އެގޮތުން، ރެފިޔުޖީ ކޭމްޕް ތަކާއި، ހޮސްޕިޓާ ތަކާއި، ހާލުގައި ޖެހިފައިވާ މީހުން ބޯހިޔާވަހިކަން ހޯދަމުން އަންނަ ސްކޫލުތައް ފަދަ ތަންތަނަށް ޔަހޫދީންގެ ހަމާލާތައް އަންނަނީ އަމާޒުކުރަމުންނެވެ. އެ ހަމަލާ ތަކުގައި، އެތަކެއް އަނބިން ހުވަފަތްވެ، ދަރިން ޔަތީމުވެ، އަޅާލާނެ މީހެއް ނެތިފައި އެބަ ތިއްބެވެ.