މޯލްޑިވްސް ބްރޯޑްކާސްޓިން ކޮމިޝަނުން ދޫކުރާ ރީ-ބްރޯޑްކާސްޓް ކުރުމުގެ ލައިސަންސް ނުނަގާވެސް ގޭބީސީ ތަކުގައި ދެއްކުމަށާއި އަމިއްލަ ބޭނުން ތަކަށް ކޭބަލް ޓީވީ މެދުވެރިކޮށް ދައްކާ ޗެނަލްތައް ބެލޭނެ ގޮތަށް މޯލްޑިވްސް ބްރޯޑްކާސްޓް ކޮމިޝަނުން ގަވާއިދު އިސްލާހު ކޮށްފިއެވެ.

މީގެ ކުރިން އެމްބީސީގެ ގަވާއިދު ބުނާ ގޮތުން،ރާއްޖޭގައި ބްރޯޑްކާސްޓްކުރުމުގެ ހިދުމަތް ދޭންވާނީ، އެކަމަށް ގަވާއިދުގައި ކަނޑައަޅާފައިވާ އުސޫލުތަކާއި އެއްގޮތަށް މޯލްޑިވްސް ބްރޮޑްކާސްޓިން ކޮމިޝަނުން ދޫކުރާ ރީ-ބްރޯޑްކާސްޓް ކުރުމުގެ ލައިސަންސް ލިބިގެންނެވެ.  މޯލްޑިވްސް ބްރޮޑްކާސްޓިން ކޮމިޝަނުން ވަނީ މި ޤަވާއިދުގެ ދަށުން "ހިދުމަތް ދިނުމުގެ ލައިސަންސް" އާއި ގުޅޭ ފަސްވަނަ މާއްދާއަށް އިސްލާހު ގެނެސް،އެ އިސްލާހުތައް މިދިޔަ ބުރާސްފަތި ދުވަހު ސަރުކާރުގެ ގެޒެޓްގައި ޝާއިއު ކޮށްފައެވެ.

މި އިސްލާހުގައި ވާ ގޮތުން،އަމިއްލަ ބޭނުމަށް ފިޔަވާ ރާއްޖޭގެ އެހެން ތަނެއްގައި ރީ-ބްރޯޑްކާސްޓް ކުރުމުގެ ހިދުމަތް ދޭންވާނީ އެކަމަށް ގަވާއިދުގައި ކަނޑައަޅާފައިވާ އުސޫލުގެ ދަށުން ރީ-ބްރޯޑްކާސްޓް ކުރުމުގެ ލައިސަންސް އޮތް ފަރާތެއް މެދުވެރިކޮށް ކަމަށެވެ.

ފަހަތަށް އަކުރެއް އިތުރުކޮށް މޯލްޑިވްސް ބްރޯޑްކާސްޓިން ކޮމިޝަނުން ހިމަނާފައިވާ މާއްދާގައި ބުނެފައިވަނީ އަމިއްލަ ބޭނުމަކީ ގޭބީސީއެއްގެ ރީ-ބްރޯޑްކާސްޓް ހިދުމަތެއް ބޭނުން ކުރުން ކަމަށެވެ.

މި އިސްލާހު ތަކުގެ އިތުރުން އެ އިދާރާއިން ވަނީ ރީ-ބްރޯޑްކާސްޓް ކުރުމުގެ ލައިސަންސަށް އެދި ހުށައަޅާ ފަރާތަކީ ބްރޯޑްކާސްޓްކުރުމުގެ ހިދުމަތް ދޭ ނުވަތަ ކޯޕަރޭޓިވް ކުންފުންޏަކަށް ވެގެން ނުވާނެ ކަމަށް ބަޔާން ކޮށް ރީ-ބްރޯޑްކާސްޓް ކުރުމުގެ ލައިސަންސަށް އެދި ހުށައަޅާ ފަރާތްތަކުގައި  ހުންނަން ޖެހޭ ޝަރުތު ތަކަށް މި ގަވާއިދު އިތުރުކޮަށްފައެވެ.