ޝަރުތު ހަމަވި ނަމަވެސް ގެދޮރުވެރިޔާ ސްކީމް އިން ފުރަތަމަ ދޫކުރާ 4000 ފްލެޓް ނުލިބޭ ފަރާތްތަކަށް ލިޔުމެއް ދިނުމަށް ހައުސިން މިނިސްޓްރީން ނިންމައިފިއެވެ.

ހައުސިން މިނިސްޓްރީން ވަނީ މިއަދު ފްލެޓް ލިބޭ 4000 މީހުންގެ ތަފްސީލު އާންމު ކޮށްފައެެވެ.

ސޯޝަލް ހައުސިން ހޯދުމަށް ސަރުކާރުން ހުޅުވައިލި ފުރުސަތުގައި ކުރިމަތިލީ 20،000 އަށްވުރެ ގިން މީހުންގެ ތެރެއިން 13،000 މީހުން ޝަރުތު ހަމަވެއެވެ. އެހެންނަމަވެސް ފަހި ދިރިއުޅުން ކޯޕަރޭޝަން (އެފްޑީސީ) އާއި ހަވާލު ކޮށްގެން ހުޅުމާލެ 2 ގައި އިމާރާތް ކުރުމުގެ މަސައްކަތް ހިނގަނީ 4000 ފްލެޓްގައެވެ.

ހައުސިން މިނިސްޓްރީން ކޮަށްފައިވާ އިއުލާނުގައި ބުނީ، 4000 ފްލެޓް ލިބޭ މީހުންގެ ތެރޭގައި ނުހިމެނުނު ނަމަވެސް ޝަރުތު ހަމަވާކަމަށް ދާއިމީ ލިސްޓުގައި ހިމެނުނު ފަރާތްތަކަށް ސަރުކާރުން ހިންގާ އެހެނިހެން މަޝްރޫއުތަކުން ފްލެޓް ދިނުމަށް ނިންމާފައިވާ ކަމުގެ ލިޔުން އެ މިނިސްޓްރީގެ ޕޯޓަލް މެދުވެރިކޮށް ފޮނުވާނެ ކަމަށެވެ.

4000 ފްލެޓް ގެ ތެރެއިން ފްލެޓް ލިބެނީ ޝަރުތު ހަމަވެ، ދާއިމީ ލިސްޓުގައި ހިމެނުނު ފަރާތްތަކުގެ ތެރެއިން ތިން ކޮޓަރީގެ އެޕާރޓްމެންޓް ލިބެނީ 76 ވުރެ ގިނަ ޕޮއިންޓް ލިބުނު ފަރާތްތަކަށެވެ. ދެ ކޮޓަރީގެ އެޕާރތްމެނޓް ލިބެނީ 73 އަށް ވުރެ ގިނަ ޕޮއިންޓް ލިބޭ ފަރާތް ތަކަށެވެ.