މަޖިލީހުގެ ނާއިބު ރައީސް އީވާ އަބްދުالله ރިޔާސަތު ބަލަހައްޓަވަން އުޒުރުވެ ވަޑައިގެންނެވުމުން ރައްޔިތުންގެ މަޖިލީހުގައި ރައީސް، ރައީސް މުހައްމަދު ނަޝީދުގެ އިތުބާރު ނެތް މައްސަލަ މިއަދުވެސް ކެންސަލްވެއްޖެ އެވެ.
މިއަދުގެ މަޖިލީހުގެ ޖަލްސާގެ އެޖެންޑާގައިވެސް އޮތީ، ރައީސް ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ގެންދިއުމެވެ. މިހާރު އެ މައްސަލަ ކުރިއަށް ގެންދަން މަސައްކަތް ކުރަމުންދާތާ ހަފްތާއެއް ވަނީ އެވެ.
ނަމަވެސް އެފަދައިން އެޖެންޑާ ކޮށްފައި ވަނިކޮށް ރައްޔިތުންގެ މަޖިލީހަށް އީވާ ރޭ ފޮނުއްވި ސިޓީއެއްގައި ވިދާޅުވީ ނަޝީދު މަޤާމުން ވަކި ކުރުމުގެ މައްސަލާގައި ސުޕްރީމް ކޯޓުން ވަކި ގޮތެއް ނިންމުމުގެ ކުރިން މަޖިލީހުގެ ޖަލްސާތައް ކުރިޔަށް ގެންދިޔުމަށް ރިޔާސަތުގައި އިންނަވަން އޭނާ އުޒުރުވެރިވެވަޑައިގަންނަވާ ކަމަށެވެ.
އަދި ކޯޓުގައި މައްސަލައެއް ކުރިއަށް ދާއިރު، އެ މައްސަލައާއިމެދު މަޖިލީހުން ގޮތް ނިންމުމަކީ އެ މުއައްސަސާއިން އަމަލުކުރަމުން އައިސްފައިވާ އުސޫލެއް ނޫން ކަމަށާ ރައްޔިތުންގެ މަޖިލީހުގައި އެ މައްސަލަ ކުރިއަށް ގެންދިއުމުން ޝަރީއަތަށް ނުފޫޒު ފޯރާނެކަމަށް އޭނާ ވިދާޅުވި އެވެ.
ހަމައެހެންމެ، ސްޕްރީމް ކޯޓަށް މައްސަލައެއް ހުށައަޅާފައިވާއިރު، ކޯޓުގެ ނިންމުމަށް ބެލުމެއް ނެތި ވަކި ގޮތަކަށް މަޖިލީހުން ނިންމުމަށް މަސައްކަތްކުރުންވަނީ ކޯޓަށް ގަދަރާއި އިހުތިރާމް ކުޑަކުރުންކަމަށްވެސް ވިދާޅުވިއެވެ.
މީގެ އިތުރުން، އެހެން ޕާޓީތައްވެސް މި މައްސަލައަށް ތަދައްހުލްވަމުންދާކަން ފާހަގަކުރައްވައި އީވާ ވަނީ ބާރުތައް ވަކިވެފައި އޮންނަ އޮތުމުގެ ތަސައްވުރަށް ހިޔަނި ނޭޅުމުގެ ގޮތުން ސުޕްރީމް ކޯޓުގައި ކުރިއަށް ގެންދާ މައްސަލައިގައި ވަކި ގޮތެއް ނިމެންދެން ރައްޔިތުންގެ މަޖިލީހުގެ ރައީސް މަގާމުން ވަކި ކުރުމަށް ހުށައަޅާފައިވާ ގަރާރުގެ މަސައްކަތްތައް ކުރިއަށް ގެންދިއުމަށް ރިޔާސަތުގައި އިންނެވުމަށް އުޒުރުވެރިވެވަޑައިގަންނަވާކަމަށް ވިދާޅުވެފައެވެ.
އެމްޑީޕީން ސްޕްރީމް ކޯޓަށް ހުށަހަޅާފައިވާ ދުސްތޫރީ މައްސަލަ އެ ކޯޓުން ބަލައިގަނެފައިވާއިރު އެ މައްސަލަ މާދަމާ ހެނދުނު 10:00 އަށް ވަނީ ތާވަލުކޮށްފަ އެވެ.
Advertisement
This content is created and paid for by advertisers and does not involve Voice Journalists
