މި މަހުގެ 17 ވާ ނޮވެމްބަރު ދުވަހަކީ ރައީސުލް ޖުމްހޫރިއްޔާ ކަމުގެ މަގާމަށް ޑރ.މުހައްމަދު މުއިއްޒު ޖުމްހޫރީ މައިދާނުގައި ހުވާ ކުރއްވާ ދުވަހަށް ވާތީ، ޖުމްހޫރީ މައިދާނާއި ވީ ފަރާތުން އިސްލާމީ މަރުކަޒަށް ވަދެވެން އޮންނަ މަގު ބަންދުކުރުމަށް އިސްލާމިކް މިނިސްޓްރީން ނިންމައިފިއެވެ.

މިނިސްޓްރީ އޮފް އިސްލާމިކް އެފެއާޒް އިން މިއަދު ނެރެފައިވާ އިއުލާނުގައި ބުނެފައިވަނީ 17 ނޮވެންބަރު ވާ ހުކުރު ދުވަހުގެ އަޞްރު ނަމާދާއި މަޣްރިބް ނަމާދަށް މަސްޖިދުލް ސުލްޠާން މުހައްމަދު ތަކުރުފާނުލް އައުޡަމްއަށް ވަޑައިގަންނަވާ ބޭފުޅުން ބޭނުންކުރައްވަން ވާނީ މެދުޒިޔާރަތް މަގާއި ދިމާލުގައިވާ އިސްލާމީ މަރުކަޒުގެ ދެކުނު ފަޅި ކަމަށެވެ. މިއީ ކުރީގައި ދިރާގުގެ މައި އޮފީސް ހުރި ފަޅި އާއި އަދި އިރުމަތީ ފަރާތު ނޭޝަނަލަ އާޓް ގެލެރީ ހުންނަ ފަޅިއެވެ.

އިންތިހާބީ ރައީސް ޑރ.މުހައްމަދު މުއިއްޒާއި ނައިބު ރައީސް އަލް އުސްތާޛު ހުސައިން މުހައްމަދު ލަޠީފް މަގާމުގެ ހުވާ ކުރެއްވުމުގެ ރަސްމިއްޔާތު އޮންނާނީ 17 ނޮވެންބަރު ވީ ހުކުރު ދުވަހުގެ 4:45 ގައި ޖުމްހޫރީ މައިދާނުގައެވެ. މި ރަސްމިއްޔާތަށް އަށް ރާއްޖެ އާއި ގާތް ގުޅުން އޮންނަ ވަރަށް ގިން ގައުމު ތަކަކަށް ދައުވަތު ދެވިފައި ވާއިރު ރަސްމިއްޔާތަށް ވާން ޖެހޭ ތައްޔާރިތައް ފެށިފައި ވާކަން ފާހަގަ ކޮށްލަން ޖެހެއެވެ.

Advertisement