މިއަހަރުގެ ޖުލައިމަހުގެ 19 ވަނަ ދުވަހުގެ ރޭ ދަންވަރު މީހެއްގެ ކޭޝް ކާޑު ބޭނުންކޮށްގެން ވިޔަފާރިކުރި މީހަކު ޖަލަށްލުމަށް ކުރިމިނަލް ކޯޓުން ހުކުމް ކޮށްފިއެވެ.
އެ ކޯޓުގެ އިއްޔެ ހުކުމް ކޮށްފައިވަނީ، ގދ. ތިނަދޫ، ސްކޫނަރ މުހައްމަދު ވާސިފްގެ މައްޗަށެވެ. އޭނާގެ މައްޗަށް ދައުލަތުން ކޮށްފައިވަނީ މީހެއްގެ މުދަލުގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
ދައުވާގައި ވީގޮތުން އެރޭ ދަންވަރު ވާސިފް ވަނީ އެހެން މީހެއްގެ ކޭޝް ކާޑް ބޭނުންކޮށްގެން ތިން ފަހަރު މަތިން އެމްއެޗްއޭ މާޓް ފިހާރަ އިން 1،285ރ ގެ ވިޔަފާރިކޮށްފައެވެ. އެހެންނަމަވެސް ވާސިފް ވަނީ އޭނާގެ މައްޗަށް ކުރި ދައުވާއަށް އިންކާރުކޮށްފައެވެ.
ގާނޫނުލް އުގޫބާތުގައި މިފަދަ ކުށެއްގެ އަސާސީ އަދަބަކީ ހަތަރު މަހާއި 24 ދުވަހުގެ މުއްދަތަކަށް ޖަލަށް ލުމެވެ. އަދި ދައުވާ ރައްދުވާ ފަރާތުން ވީހާ ވެސް ލުއި އަދަބެއް ދިނުމަށް ޝަރީއަތުގައި އެދިފައިވެއެވެ.
އެ ހުރިހާ ކަމަށް ރިއާޔަތް ކުރުމަށް ފަހު ޝަރީއަތުން ކަނޑައަޅާފައިވަނީ އެއް ދަރަޖަ ދަށްކޮށް، ތިން މަހާއި 18 ދުވަހަށް ޖަލަށް ލުމަށެވެ. އަދި 21 ދުވަހަށް މުޖުތަމައަށް ހިދުމަތް ކުރުމަށް ވެސް ކޯޓުން ހުކުމްކޮށްފައިވެއެވެ.
Advertisement
This content is created and paid for by advertisers and does not involve Voice Journalists
